മസ്‌കുലാര്‍ അട്രോഫി: 2 മാസത്തിനകം സമാഹരിക്കേണ്ടത് 18 കോടി, ഈ കുഞ്ഞിനു വേണം കാരുണ്യം

സ്പൈനല്‍ മസ്‌കുലാര്‍ അട്രോഫി (എസ്.എം.എ.) രോഗം ബാധിച്ച ഒരു കുഞ്ഞുകൂടി ചികിത്സാസഹായം തേടുന്നു. മുഖ്യമന്ത്രി പിണറായി വിജയന്‍ പ്രതിനിധാനം ചെയ്യുന്ന ധര്‍മടം മണ്ഡലത്തില്‍പ്പെടുന്ന ചെമ്പിലോട് ഇരിവേരിയിലെ കെ.വി. സിദ്ദിഖ്-കെ. ഷബാന ദമ്പതിമാരുടെ മൂന്നുമാസം പ്രായമുള്ള കുഞ്ഞ് ആമിന ഇഫ്‌റത്തിനാണ് രോഗം. 18 കോടി രൂപയുടെ മരുന്നുവേണം ചികിത്സയ്ക്ക്. പിണറായിയും എം.പി.മാരായ കെ.പി.സി.സി. അധ്യക്ഷന്‍ കെ. സുധാകരന്‍, ഡോ. വി. ശിവദാസന്‍ എന്നിവരും രക്ഷാധികാരികളായി ചികിത്സാസഹായ കമ്മിറ്റി രൂപവത്കരിച്ചിട്ടുണ്ട്. പഞ്ചായത്ത് പ്രസിഡന്റ് കെ. ദാമോദരനാണ് ചെയര്‍മാന്‍. ഈ കുഞ്ഞിന്റെ മൂത്ത രണ്ടുസഹോദരങ്ങള്‍ ഏഴുമാസം പ്രായമായപ്പോള്‍ ഇതേ രോഗം ബാധിച്ച് മരിച്ചുവെന്ന് ദാമോദരനും മറ്റ് ഭാരവാഹികളും പത്രസമ്മേളനത്തില്‍ പറഞ്ഞു. പിള്ളവാതമെന്നാണ് കരുതിയത്. നേരത്തേ ഇതേ രോഗം ബാധിച്ച മാട്ടൂലിലും ചപ്പാരപ്പടവിലുമുള്ള കുഞ്ഞുങ്ങള്‍ക്കുവേണ്ടി നാട്ടുകാര്‍ ചികിത്സാസഹായ കമ്മിറ്റി രൂപവത്കരിച്ച് തുക സമാഹരിച്ചിരുന്നു. അപ്പോഴാണ് ഈ കുഞ്ഞിനും രോഗം ഇതാണെന്നും ചികിത്സാ സാധ്യതയുണ്ടെന്നും വ്യക്തമായത്. ടൈപ്പ് വണ്‍ രോഗമാണ് ആമിന ഇഫ്‌റത്തിന് ബാധിച്ചിട്ടുള്ളത്. ബെംഗളൂരുവിലെ മണിപ്പാല്‍ ആസ്പത്രിയിലാണ് ചികിത്സ. രണ്ടുമാസത്തിനകം ചികിത്സ തുടങ്ങണമെന്നാണ് ഡോക്ടര്‍മാരുടെ നിര്‍ദേശം. ബേക്കറി തൊഴിലാളിയായ സിദ്ദിഖിന് എട്ടുസെന്റ് സ്ഥലവും പണിപൂര്‍ത്തിയാകാത്ത വീടും വീടുപണിക്കായി എടുത്ത നാലുലക്ഷം രൂപ കടവുമാണ് സമ്പാദ്യം. അവരെക്കൊണ്ട് തുക സമാഹരിക്കാന്‍ കഴിയില്ലെന്ന് വ്യക്തമായതോടെയാണ് നാട്ടുകാര്‍ മുന്നോട്ടുവന്നത്. ഇതരജില്ലകളിലും ഗള്‍ഫിലും സഹായം അഭ്യര്‍ഥിച്ചിട്ടുണ്ട്. മുഖ്യമന്ത്രിയും പ്രത്യേക താത്പര്യമെടുത്തിട്ടുണ്ടെന്ന് ഭാരവാഹികള്‍ പറഞ്ഞു. സഹായം സ്വീകരിക്കാന്‍ കനറാ ബാങ്ക് ചക്കരക്കല്ല് ശാഖയില്‍ അക്കൗണ്ട് തുറന്നിട്ടുണ്ട്. നമ്പര്‍: 110020820136, ifsc: CNRB0004698. ഗൂഗിള്‍ പേ: 9539170140. ചികിത്സാസമിതിയുടെ ഓഫീസ് ആര്‍.വി. മെട്ടയില്‍ തിങ്കളാഴ്ച ആറിന് മുന്‍ ആരോഗ്യമന്ത്രി കെ.കെ. ശൈലജ എം.എല്‍.എ. ഉദ്ഘാടനം ചെയ്യും. ജനറല്‍ കണ്‍വീനര്‍ എം.സി. മോഹനന്‍, ജോ. കണ്‍വീനര്‍ ഷക്കീര്‍ മൗവ്വഞ്ചേരി, വൈസ് ചെയര്‍മാന്‍ എം. സുധാകരന്‍, ഖജാന്‍ജി സിറാജ് ഇരിവേരി എന്നിവരും പത്രസമ്മേളനത്തില്‍ പങ്കെടുത്തു.