വീട്ടമ്മയെ റോഡില്‍ നായ്ക്കള്‍ ആക്രമിച്ച സംഭവം; ഉടമ അറസ്റ്റില്‍

താമരശേരി അമ്പായത്തോടില്‍ വളര്‍ത്തുനായയുടെ കടിയേറ്റ് വീട്ടമ്മയ്ക്ക് പരുക്കേറ്റെന്ന പരാതിയില്‍ നായയുടെ ഉടമ വെഴുപ്പൂര്‍ എസ്റ്റേറ്റിലെ റോഷനെ പൊലീസ് അറസ്റ്റ് ചെയ്തു. റോഷനെ ഇന്നലെ കസ്റ്റഡിയിലെടുത്തിരുന്നു. അമ്പായത്തോട് മിച്ചഭൂമിയിലെ താമസക്കാരിയായ ഫൗസിയയ്ക്കാണു പരുക്കേറ്റത്. മദ്രസയില്‍ പോയ കുട്ടിയെ തിരികെ വിളിക്കാനായി പോയപ്പോഴായിരുന്നു ഫൗസിയയ്ക്ക് കടിയേറ്റത്. റോഡിലേക്കിറങ്ങിയതും നായ്ക്കള്‍ വളയുകയായിരുന്നു. രക്ഷപ്പെടാനായി ശ്രമിക്കുന്നതിനിടെ നിലത്തുവീണ ഫൗസിയയുടെ തലയ്ക്കും മുഖത്തും കൈയ്ക്കും കടിയേറ്റു. സമീപത്തുണ്ടായിരുന്നുവര്‍ എത്തിയാണു നായ്ക്കളെ ഓടിച്ച് ഫൗസിയയെ രക്ഷിച്ചത്.