കരിപ്പൂരില്‍ വന്‍ സ്വര്‍ണവേട്ട; മൂന്ന് യാത്രികരില്‍ നിന്ന് പിടികൂടിയത് നാലേമുക്കാല്‍ കിലോഗ്രാം സ്വര്‍ണ്ണം

കരിപ്പൂരില്‍ വീണ്ടും വന്‍ സ്വര്‍ണ്ണവേട്ട. മൂന്ന് യാത്രികരില്‍ നിന്നായി നാലേമുക്കാല്‍ കിലോഗ്രാം സ്വര്‍ണ്ണമാണ് വിമാനത്താവളത്തില്‍ പിടികൂടിയത്. കോഴിക്കോട് സ്വദേശി ഹനീഫ 2.28 കിലോഗ്രാം സ്വര്‍ണം ബഹറിനില്‍ നിന്നും തിരൂരങ്ങാടി സ്വദേശി രവീന്ദ്രന്‍ 2.06 കിലോഗ്രാം സ്വര്‍ണം ഷാര്‍ജയില്‍ നിന്നും മലപ്പുറം സ്വദേശി അബ്ദുള്‍ ജലീല്‍ 355 ഗ്രാം സ്വര്‍ണം ഷാര്‍ജയില്‍ നിന്നുമാണ് കൊണ്ടുവന്നത്. ഹനീഫയും രവീന്ദ്രനും അടിവസ്ത്രത്തിനുള്ളിലും ജലീല്‍ ശരീരത്തില്‍ ഒളിപ്പിച്ചുമാണ് സ്വര്‍ണ്ണം കടത്താന്‍ ശ്രമിച്ചത്. ഒരു കോടി തൊണ്ണൂറ് ലക്ഷം രൂപയുടെ സ്വര്‍ണ്ണമാണ് മൂന്നു പേരില്‍ നിന്നുമായി പിടികൂടിയത്. കരിപ്പൂര്‍ വഴിയുള്ള സ്വര്‍ണ്ണക്കടത്ത് വീണ്ടും സജീവമായ സാഹചര്യത്തില്‍ പിന്നിലെ വലിയ റാക്കറ്റിനായി അന്വേഷണം ആരംഭിച്ചു. കഴിഞ്ഞ ദിവസം എയര്‍ഹോസ്റ്റസിന്റെ കൈവശത്തുനിന്ന് അടക്കം സ്വര്‍ണ്ണം പിടിച്ചിരുന്നു.