നവജാത ശിശുവിന് 12 സെ.മി നീളമുള്ള വാല്; ശസ്ത്രക്രിയയിലൂടെ നീക്കം ചെയ്തു

പന്ത്രണ്ട് സെന്റിമീറ്റര്‍ നീളമുള്ള വാലുമായി നവജാത ശിശു പിറന്നു. ബ്രസീലിലാണ് ലോകത്തെ അമ്പരിപ്പിച്ച ഈ സംഭവം നടന്നത്. ഫോര്‍ട്ടലേസയിലെ ആല്‍ബേര്‍ട്ട് സാബിന്‍ ചില്‍ഡ്രന്‍സ് ആശുപത്രിയില്‍ നടന്ന ശസ്ത്രക്രിയയിലൂടെ കുഞ്ഞിന്റെ വാല് നീക്കം ചെയ്തതായി ജേണല്‍ ഓഫ് പീഡിയാട്രിക് സര്‍ജറി കേസ് റിപ്പോര്‍ട്ട് ചെയ്തു. ഗര്‍ഭകാലത്തിന്റെ 35-ാം ആഴ്ചയിലാണ് ബ്രസീലിയന്‍ യുവതി കുഞ്ഞിനെ പ്രസവിക്കുന്നത്. കുഞ്ഞ് ജനിച്ച് കഴിഞ്ഞപ്പോഴാണ് വാല് ഡോക്ടര്‍മാര്‍ ശ്രദിക്കുന്നത്. 12 സെന്റിമീറ്റര്‍ നീളം വരുന്ന വാലിന്റെ അറ്റത്ത് ചെറിയ ബോള്‍ ആകൃതിയിലുള്ള മാംസവും ഉണ്ടായിരുന്നു. ഗര്‍ഭപാത്രത്തിലായിരിക്കെ നാലാം ആഴ്ചയില്‍ മിക്ക കുഞ്ഞുങ്ങളിലും ഈ വാല് രൂപപ്പെടും. എന്നാല്‍ എട്ടാം ആഴ്ചയോടെ ഇത് അപ്രത്യക്ഷമാകാറാണ് പതിവ്. ഈ വാലാണ് ടെയില്‍ബോണ്‍ അല്ലെങ്കില്‍ കോക്കിക്സായി പരിണമിക്കുന്നത്. എന്നാല്‍ ചില അപൂര്‍വ സാഹചര്യങ്ങളില്‍ കുഞ്ഞുങ്ങളില്‍ ഈ വാല് അപ്രത്യക്ഷമാകില്ല. ഇതുവരെ ഇത്തരത്തില്‍ നാല്‍പത് കേസുകള്‍ മാത്രമേ റിപ്പോര്‍ട്ട് ചെയ്തിട്ടുള്ളു.ബ്രസീലിയന്‍ യുവതിയുടെ കുഞ്ഞിന് മറ്റ് ശാരീരിക പ്രശ്നങ്ങളൊന്നുമില്ലെന്ന് സ്ഥിരീകരിച്ച ശേഷം വാല് ശസ്ത്രക്രിയയിലൂടെ നീക്കം ചെയ്തു.