പാകിസ്താനില്‍ ആള്‍ക്കൂട്ടം തകര്‍ത്ത അമ്പലം പുനര്‍മനിര്‍മിച്ചു; ഉദ്ഘാടനം ചെയ്ത് ചീഫ് ജസ്റ്റിസ്

പാകിസ്താനില്‍ ആള്‍ക്കൂട്ടം തകര്‍ത്ത അമ്പലം പുനര്‍മനിര്‍മിച്ചു. വടക്കുപടിഞ്ഞാറന്‍ പാകിസ്താനിലെ ഒരു നൂറ്റാണ്ടോളം പഴക്കമുള്ള ശ്രീ പരം ഹാന്‍സ് ജി മഹാരാജ് അമ്പലമാണ് കഴിഞ്ഞ വര്‍ഷം തകര്‍ത്തത്. പിന്നീട് ഇത് പുനര്‍നിര്‍മിക്കുകയായിരുന്നു. ചീഫ് ജസ്റ്റിസ് ഗുല്‍സാര്‍ അഹ്മദ് അമ്പലം ഉദ്ഘാടനം ചെയ്തു. ജാമിയത്ത് ഉലമയെ ഇസ്ലാം ഫസല്‍ എന്ന രാഷ്ട്രീയ പാര്‍ട്ടിക്കാരും ചില ഇസ്ലാമിക ആത്മീയ നേതാക്കളും നയിച്ച സംഘമാണ് കഴിഞ്ഞ ഡിസംബറില്‍ അമ്പലം തകര്‍ത്തത്. അമ്പലം എത്രയും വേഗം പുനര്‍നിര്‍മിക്കണമെന്നും ഇതിനുള്ള പണം അമ്പലം പൊളിച്ചവരില്‍ നിന്ന് ഈടാക്കണമെന്നും ചീഫ് ജസ്റ്റിസ് ഗുല്‍സാര്‍ അഹ്മദ് അന്ന് ഉത്തരവിട്ടു. തുടര്‍ന്ന് ക്ഷേത്രം പുനര്‍നിര്‍മിക്കുകയും കഴിഞ്ഞ തിങ്കളാഴ്ച ദീപാവലി ആഘോഷങ്ങളോടനുബന്ധിച്ച് അമ്പലം പൊതുജനങ്ങള്‍ക്ക് തുറന്നുകൊടുക്കുകയുമായിരുന്നു. ഈ ചടങ്ങിലാണ് ജസ്റ്റിസ് ഗുല്‍സാര്‍ അഹ്മദ് പങ്കെടുത്തത്.