പെട്രോളിയം സംഭരണ കേന്ദ്രത്തിലെ വികസന പ്രവര്‍ത്തനങ്ങള്‍; നില്‍പ്പ് സമരവുമായി നാട്ടുകാര്‍

കോഴിക്കോട് എലത്തൂരില്‍ ഹിന്ദുസ്ഥാന്‍ പെട്രോളിയം സംഭരണ കേന്ദ്രത്തില്‍ നടക്കുന്ന വികസന പ്രവര്‍ത്തനങ്ങള്‍ക്കെതിരെ നാട്ടുകാരുടെ നില്‍പ്പ് സമരം. അടച്ചുപൂട്ടും എന്ന് ഉറപ്പുനല്‍കിയ സംഭരണ കേന്ദ്രത്തിലെ നിര്‍മാണ ജോലികള്‍ വീടുകള്‍ക്കും കുടിവെള്ള സ്രോതസ്സുകകള്‍ക്കും ഭീഷണിയാണെന്ന് നാട്ടുകാര്‍ ആരോപിച്ചു. പെട്രോളും ഡീസലും സംഭരിക്കാന്‍ കൂറ്റന്‍ ടാങ്കുകളാണ് ഭൂമിക്കടിയിലും മുകളിലും ആയി നിര്‍മ്മിക്കുന്നത്. ഇവിടെ നിന്നുള്ള മലിനജലം സമീപത്തെ ഓവുചാല്‍ വഴി ഒഴുകി വിടുന്നതായി നാട്ടുകാര്‍ പറയുന്നു. കുഴിച്ചെടുക്കുന്ന മണ്ണില്‍ എണ്ണയുടെ അംശം ഉണ്ടാകുമെന്നും പ്രദേശവാസികള്‍ക്ക് ആശങ്കയുണ്ട്. അങ്ങനെയാണ് സംഭരണ കേന്ദ്രത്തില്‍ മുമ്പില്‍ നാട്ടുകാര്‍ നില്‍പ്പ് സമരം നടത്തിയത്. ഏലത്തൂര്‍ ജനകീയ സംരക്ഷണ കൂട്ടായ്മയാണ് സമരത്തിന് നേതൃത്വം നല്‍കിയത്. ജില്ലാ ഭരണകൂടത്തിന് പലവട്ടം പരാതികള്‍ നല്‍കിയിട്ടും ഫലമുണ്ടായില്ല എന്ന് പ്രതിഷേധക്കാര്‍ പറയുന്നു. വിഷയത്തില്‍ ഇവര്‍ കോടതിയെയും സമീപിച്ചിട്ടുണ്ട്.