അഗ്രഹാര വീഥികളില്‍ 200 പേര്‍ മാത്രം, കല്‍പ്പാത്തി രഥോത്സവത്തിന് ഉപാധികളോടെ അന്തിമാനുമതി

ദിവസങ്ങള്‍ നീണ്ട ചര്‍ച്ചകള്‍ക്കൊടുവില്‍ കല്‍പ്പാത്തിരഥോത്സവത്തിന് ഉപാധികളോടെ സര്‍ക്കാര്‍ അന്തിമാനുമതി നല്‍കി. അഗ്രഹാര വീഥികളില്‍ 200 പേര്‍ക്ക് മാത്രം പങ്കെടുക്കാമെന്നതടക്കമുള്ള ഉപാധികളോടെയാണ് അനുമതി ലഭിച്ചത്. പൂര്‍ണമായും കൊവിഡ് മാനദണ്ഡം പാലിച്ചാവണം ഉത്സവം. ക്ഷേത്രത്തിനകത്ത് പരമാവധി നൂറുപേര്‍ക്കാണ് ചടങ്ങുകളില്‍ പങ്കെടുക്കാന്‍ അനുമതിയുള്ളത്. അഗ്രഹാര വീഥികളില്‍ രഥം വലിക്കുന്നതുള്‍പ്പെട 200 പേര്‍ മാത്രമായിരിക്കണം. ജനങ്ങളെ നിയന്ത്രിക്കുന്ന സംബന്ധിച്ച് കൃത്യമായ ആക്ഷന്‍ പ്ലാന്‍ സമര്‍പ്പിക്കാനും പാലക്കാട് ജില്ലാ കളക്ടര്‍ ആഘോഷ സമിതിക്ക് നിര്‍ദേശം നല്‍കി. എന്നാല്‍ 200 പേരെ പങ്കെടുപ്പിച്ച് രഥ പ്രയാണത്തിന് വലിയ രഥങ്ങള്‍ ഇറക്കാനാവില്ല എന്നാണ് ഉത്സവ കമ്മിറ്റി പറയുന്നത്. വലിയ രഥങ്ങള്‍ വലിക്കുന്നതിന് കൂടുതല്‍ ആളുകള്‍ വേണമെന്നാണ് ഉത്സവ കമ്മിറ്റി വിശദീകരിക്കുന്നത്. രഥോത്സവം വലിയ ആഘോഷപരമായി നടത്താന്‍ കഴിയാത്തതില്‍ കല്‍പ്പാത്തിക്കാര്‍ നിരാശയിലാണ്. പക്ഷേ കൊവിഡ് സാഹചര്യത്തില്‍ പൂര്‍ണമായും സര്‍ക്കാര്‍ നിര്‍ദേശങ്ങള്‍ പാലിക്കുമെന്നും നാട്ടുകാര്‍ പറയുന്നു. വലിയ രഥങ്ങള്‍ പ്രയാണത്തിന് ഇറങ്ങിയില്ലെങ്കില്‍ പ്രശസ്തമായ ദേവരഥ സംഗമം ഇത്തവണയും ഉണ്ടാവില്ല. ഈ മാസം 8 നാണ് രഥോത്സവത്തിന് കൊടിയേറുക.