‘ഫെയ്‌സ്ബുക്കിന്റെ ഭാവിക്ക് സക്കര്‍ബര്‍ഗ് രാജി വയ്ക്കണം; സുരക്ഷാപ്രശ്‌നം ആദ്യം തീര്‍ക്കണം’

സമൂഹമാധ്യമമായ ഫെയ്‌സ്ബുക്കിന്റെ റീബ്രാന്‍ഡിങ്ങിനും സിഇഒ മാര്‍ക് സക്കര്‍ബര്‍ഗിനും എതിരെ രൂക്ഷവിമര്‍ശനവുമായി മുന്‍ ജീവനക്കാരി ഫ്രാന്‍സസ് ഹോഗന്‍. ഫെയ്സ്ബുക്കിന്റെ ആഭ്യന്തര പ്രവര്‍ത്തനരീതിയെക്കുറിച്ചുള്ള റിപ്പോര്‍ട്ടു പുറത്തുവിട്ടതിനുശേഷം, വിസില്‍ ബ്ലോവറായ ഹോഗന്‍ നടത്തുന്ന ആദ്യ പ്രസ്താവനയാണിത്. സുരക്ഷാ പ്രശ്‌നങ്ങള്‍ പരിഹരിക്കാതെ റീബ്രാന്‍ഡിങ് നടത്തിയിട്ടു കാര്യമില്ലെന്നു പോര്‍ച്ചുഗല്‍ തലസ്ഥാനമായ ലിസ്ബനില്‍ നടന്ന വെബ് ഉച്ചകോടിയില്‍ ഹോഗന്‍ പറഞ്ഞു. മാര്‍ക്ക് സക്കര്‍ബര്‍ഗ് രാജിവയ്ക്കുന്നതാണ് കമ്പനിക്കു നല്ലത്. സക്കര്‍ബര്‍ഗ് സിഇഒയായി ഇരിക്കുന്നിടത്തോളം കമ്പനി ഈ രീതിയില്‍ തന്നെയായിരിക്കും പ്രവര്‍ത്തിക്കുക. സുരക്ഷയെക്കുറിച്ച് കൂടുതല്‍ ധാരണയുള്ള ഒരാള്‍ തലപ്പത്തേയ്ക്ക് എത്തിയാല്‍ കമ്പനിക്ക് ഗുണമാകുമെന്നും അവര്‍ ചൂണ്ടിക്കാട്ടി. ഫെയ്‌സ്ബുക്കിന്റെ മാതൃകമ്പനിയുടെ പേര് കഴിഞ്ഞയാഴ്ചയാണ് 'മെറ്റ' എന്നാക്കിയത്. ഫെയ്‌സ്ബുക്, ഇന്‍സ്റ്റഗ്രാം, വാട്‌സാപ് തുടങ്ങിയ ആപ്പുകളുടെ പേരുകള്‍ മാറില്ല. ഇവ ഇനി മെറ്റ എന്ന കമ്പനിയുടെ കീഴിലായിരിക്കും. സമൂഹമാധ്യമങ്ങള്‍ ഉണ്ടാക്കുന്ന ഗുരുതരമായ പ്രത്യാഘാതങ്ങളെക്കുറിച്ചുള്ള ആഭ്യന്തര റിപ്പോര്‍ട്ടുകള്‍ ഫെയ്‌സ്ബുക് സ്ഥിരമായി അവഗണിച്ചെന്ന വെളിപ്പെടുത്തലുകള്‍ക്കു പിന്നാലെയായിരുന്നു പേരുമാറ്റം. യുഎസ് നേരിടുന്ന അടിയന്തര ഭീഷണി ഫെയ്‌സ്ബുക് ആണെന്ന ഹോഗന്റെ വെളിപ്പെടുത്തല്‍ കമ്പനിക്ക് വലിയ തിരിച്ചടിയായിരുന്നു. ഇത്തരം വിവാദങ്ങളില്‍നിന്നു മുഖം രക്ഷിക്കാന്‍ കൂടിയാണ് റീബ്രാന്‍ഡിങ് എന്നും വിലയിരുത്തലുണ്ട്. ഭാവിയില്‍ വെര്‍ച്വല്‍ റിയാലിറ്റി അധിഷ്ഠിതമായി ഫെയ്‌സ്ബുക് നടപ്പാക്കാന്‍ ശ്രമിക്കുന്ന മെറ്റാവേഴ്‌സ് പദ്ധതിയിലേക്കുള്ള ആദ്യപടിയായും ഇതിനെ കാണുന്നു.