വഞ്ചനാ കേസ്: സണ്ണി ലിയോണിനെ വീണ്ടും ചോദ്യം ചെയ്യും

പണം വാങ്ങി വഞ്ചിച്ചുവെന്ന കേസില്‍ ബോളിവുഡ് നടി സണ്ണി ലിയോണിനെ വീണ്ടും ചോദ്യം ചെയ്യും. പരാതിക്കാരന്റെ മൊഴിയെടുത്ത ശേഷമായിരിക്കും ക്രൈംബ്രാഞ്ച് ചോദ്യം ചെയ്യുക. കേസില്‍ സണ്ണി ലിയോണിനെ ക്രൈംബ്രാഞ്ച് നേരത്തേ ചോദ്യം ചെയ്തിരുന്നു.
അതേസമയം, കേസ് അന്വേഷിച്ചിരുന്ന ഉദ്യോഗസ്ഥനെ സ്ഥലം മാറ്റി. ബഹ്റൈനിലെ ഉദ്ഘാടന പരിപാടിക്ക് പതിനാറ് ലക്ഷം രൂപ നല്‍കിയെന്ന ആരോപണത്തിലാണ് നടപടി. ക്രൈംബ്രാഞ്ച് ഡിവൈഎസ്പി സജീവിനാണ് പുതിയ ചുമതല.
കൊച്ചിയില്‍ വിവിധ ഉദ്ഘാടന പരിപാടികളില്‍ പങ്കെടുക്കാമെന്ന് വാഗ്ദാനം ചെയ്ത് 29 ലക്ഷം രൂപ വാങ്ങി വഞ്ചിച്ചുവെന്നാണ് കേസ്. പെരുമ്പാവൂര്‍ സ്വദേശിയാണ് പരാതിക്കാരന്‍. ബഹ്റൈനിലെ പരിപാടിയില്‍ പങ്കെടുക്കാമെന്ന് പറഞ്ഞ് പതിനാറ് ലക്ഷം വാങ്ങി വഞ്ചിച്ചുവെന്ന ആരോപണവും പരാതിക്കാരന്‍ പിന്നീട് ഉന്നയിച്ചു. കേസില്‍ സണ്ണി ലിയോണും ഭര്‍ത്താവ് ഡാനിയല്‍ വെബറും അടക്കം മൂന്ന് പേര്‍ സമര്‍പ്പിച്ച മുന്‍കൂര്‍ ജാമ്യഹര്‍ജി ഹൈക്കോടതി ഇന്ന് പരിഗണിക്കും. തനിക്കെതിരെയുള്ളത് തെറ്റായ ആരോപണങ്ങള്‍ മാത്രമാണെന്നും, അറസ്റ്റ് ചെയ്യുമെന്ന് ഭയപ്പെടുന്നതായും ചൂണ്ടിക്കാട്ടിയാണ് സണ്ണി ലിയോണ്‍ മുന്‍കൂര്‍ ജാമ്യ ഹര്‍ജി നല്‍കിയത്.