ഉത്തരാഖണ്ഡ് അപകടം; 150 പേര്‍ മരിച്ചതായി റിപ്പോര്‍ട്ട്, 100 ഓളം പേരെ കാണാതായി

ഉത്തരാഖണ്ഡിലെ ചമോലിയില്‍ മഞ്ഞുമല ഇടിഞ്ഞുവീണതിനെ തുടര്‍ന്നുണ്ടായ ദുരന്തത്തില്‍ 150 ഓളം പേര്‍ മരിച്ചതായി സംശയിക്കുന്നെന്ന് ഹിന്ദുസ്ഥാന്‍ ടൈംസ് റിപ്പോര്‍ട്ട്. മൂന്ന് പേരുടെ മൃതദേഹം കണ്ടെത്തിയെന്ന് എഎന്‍ഐ റിപ്പോര്‍ട്ട് ചെയ്തു. തപോപന്‍ മേഖലയില്‍ അപകടത്തില്‍പ്പെട്ട 100 ഓളം പേരെ കാണാതായെന്നും റിപ്പോര്‍ട്ടില്‍ പറയുന്നു.മഞ്ഞുമല ഇടിഞ്ഞതിനെത്തുടര്‍ന്ന് നദികളില്‍ വലിയ രീതിയില്‍ വെള്ളം പൊങ്ങിക്കൊണ്ടിരിക്കുകയാണ്. ഋഷികേശിനും ഹരിദ്വാറിനും കനത്ത ജാഗ്രതാ നിര്‍ദ്ദേശം നല്‍കി. ഗംഗാ നദിയുടെ തീരത്തെ ഗ്രാമങ്ങളെ ഒഴിപ്പിക്കുകയാണ്. ദേശീയ ദുരന്ത നിവാരണ സംഘം സ്ഥലത്തെത്തി രക്ഷാപ്രവര്‍ത്തനം ആരംഭിച്ചു. ചമോലിയിലുണ്ടായിരുന്ന ഋഷിഗംഗ ജലവൈദ്യുത പദ്ധതി തകര്‍ന്നു.
അളകനന്ദയുടെയും ചമോലിയുടെയും തീരുത്തുള്ളവരോട് എത്രയും പെട്ടെന്ന് ഒഴിയാന്‍ ആവശ്യപ്പെട്ടിരിക്കുകയാണ്. ഉത്തരാഖണ്ഡ് മുഖ്യമന്ത്രി ടിഎസ് റാവത്ത് അടിയന്തിര യോഗം വിളിച്ചിട്ടുണ്ട്. പൊലീസും ജില്ലാ ഭരണകൂടവും സ്ഥലത്തെത്തിയിട്ടുണ്ട്. ഉത്തരാഖണ്ഡിലെ പ്രധാന തീര്‍ത്ഥാടന കേന്ദ്രമായ ജോഷിമഠിന് സമീപമാണ് അപകടം. വലിയ മഞ്ഞുമലയാണ് ഇടിഞ്ഞുവീണത്. മിന്നല്‍ വെള്ളപ്പൊക്കത്തിന് സാധ്യതയുണ്ടെന്നും മുന്നറിയിപ്പ് സന്ദേശത്തില്‍ പറഞ്ഞു.