ബഹ്‌റൈനിലെ പരിപാടിയില്‍ പങ്കെടുക്കാമെന്ന് പറഞ്ഞ് പത്തൊന്‍പതര ലക്ഷം വാങ്ങി പറ്റിച്ചു

സണ്ണി ലിയോണിനെതിരെ കൂടുതല്‍ ആരോപണവുമായി പെരുമ്പാവൂര്‍ സ്വദേശി

പണം വാങ്ങി ഉദ്ഘാടനത്തില്‍ പങ്കെടുത്തില്ലെന്ന പരാതിയില്‍ ബോളിവുഡ് നടി സണ്ണി ലിയോണിനെതിരെ കൂടുതല്‍ ആരോപണവുമായി പെരുമ്പാവൂര്‍ സ്വദേശി ഷിയാസ്. കേരളത്തിലെ പരിപാടിയില്‍ പങ്കെടുക്കാന്‍ നല്‍കിയ 25 ലക്ഷത്തിന് പുറമേ ബഹ്‌റൈനില്‍ പരിപാടിയില്‍ പങ്കെടുക്കാമെന്ന് പറഞ്ഞ് പത്തൊന്‍പതര ലക്ഷം രൂപ വാങ്ങി സണ്ണി ലിയോണ്‍ വഞ്ചിച്ചെന്ന് ഷിയാസ് ആരോപിച്ചു.
പണം നല്‍കിയത് സണ്ണി ലിയോണിന്റെ അക്കൗണ്ടിലേയ്ക്കാണ്. പണം വാങ്ങിയശേഷം സണ്ണി ലിയോണ്‍ പരിപാടികളില്‍ നിന്ന് പിന്‍വാങ്ങുകയായിരുന്നു. സണ്ണി ലിയോണ്‍ ക്രൈംബ്രാഞ്ചിനോട് പറയുന്നത് കളവാണ്. നിയമ നടപടിയുമായി മുന്നോട്ടു പോകാനാണ് തീരുമാനമെന്നും ഷിയാസ് പറഞ്ഞു.പണം വാങ്ങി വഞ്ചിച്ചെന്ന പരാതിയില്‍ സണ്ണി ലിയോണിനെ ക്രൈംബ്രാഞ്ച് കൊച്ചി യൂണിറ്റ് ചോദ്യം ചെയ്തിരുന്നു. താന്‍ ആരെയും വഞ്ചിച്ചിട്ടില്ലെന്നും പരിപാടിയില്‍ പങ്കെടുക്കാന്‍ കഴിയാത്തത് സംഘാടകരുടെ പിഴവാണെന്നുമായിരുന്നു സണ്ണി ലിയോണ്‍ ക്രൈംബ്രാഞ്ചിന് നല്‍കിയ വിശദീകരണം.