പല പേരുകൾ സജീവം ബ്രിട്ടാസും ചർച്ചകളിൽ

തിരഞ്ഞെടുപ്പ് തീയതി അടുത്തതോടെ കേരളത്തിൽ മത്്‌സരിക്കാൻ സാധ്യതയുള്ള പ്രശസ്തരുടെ പേരുകൾ വീണ്ടും ചർച്ചകളിൽ സജീവമായി.
സുരേഷ് ഗോപി യുടെ പേര് ബി ജെ പി പറയുമ്പോൾ, ധർമ്മജൻ ബോൾഗാട്ടിയുടെയും, ഗായകൻ ജി വേണുഗോപാലിന്റെയും പേരുകളാണ് കോൺഗ്രസ് ക്യാമ്പിൽ നിന്ന് ഉയരുന്നത്.
സി പി എമ്മിൽ നടൻ മുകേഷ് ഒരിക്കൽ കൂടി മത്‌സരിക്കും എന്ന് കേൾക്കുമ്പോൾ ഉയർന്നുവരുന്ന മറ്റൊരു പേര്
ജോൺ ബ്രിട്ടാസിന്റേതാണ്. ഇത്തവണ നിയമസഭയിലേക്ക് മത്സരിക്കുമെന്ന് റിപ്പോർട്ടുകൾ പുറത്തുവന്നുകഴിഞ്ഞു.
. കണ്ണൂർ സ്വദേശിയായ ബ്രിട്ടാസിന് ജില്ലയിലെ തന്നെ ഒരു മണ്ഡലത്തിൽ നിന്ന് മൽസരിക്കുമെന്നാണ് വാർത്ത.

കഴിഞ്ഞ തവണ മാദ്ധ്യമപ്രവർത്തകരായ നികേഷ് കുമാറിനേയും വീണ ജോർജിനേയും തിരഞ്ഞെടുപ്പ് രംഗത്ത് സി പി എം പരീക്ഷിച്ചിരുന്നു. ഇതിന്റെ തുടർച്ചയായി ഈ നിയമസഭ തിരഞ്ഞെടുപ്പിലും അപ്രതീക്ഷിത സ്ഥാനാർത്ഥികൾ സി പി എമ്മിൽ നിന്നുണ്ടാകും എന്ന വാർത്തകൾക്കിടെയാണ് ജോൺ ബ്രിട്ടാസിന്റെ പേര് സജീവമായി ഉയരുന്നത്.

പാർട്ടി മുഖപത്രത്തിന്റെ ഡൽഹി ബ്യൂറോ ചീഫായിരുന്ന ബ്രിട്ടാസ് വർഷങ്ങളായി പാർട്ടി ചാനലിന്റെ മാനേജിംഗ് ഡയറക്ടറും എഡിറ്ററും കൂടിയാണ്. വർഷങ്ങൾക്ക് മുമ്പ് ഒഴിവ് വന്ന രാജ്യസഭ സീറ്റിലേക്ക് ബ്രിട്ടാസിന്റെ പേര് ഉയർന്നുകേട്ടിരുന്നെങ്കിലും ഒന്നും സംഭവിച്ചില്ല.

മുഖ്യമന്ത്രിയുടെ മുൻ പൊളിറ്റിക്കൽ സെക്രട്ടറിയും ഇപ്പോഴത്തെ സി പി എം കണ്ണൂർ ജില്ലാ സെക്രട്ടറിയുമായ എം വി ജയരാജന്റെ പേര് തിരഞ്ഞെടുപ്പ് രംഗത്തേക്ക് സജീവമായി വാർത്തകളിലുണ്ട്. ജില്ലാ സെക്രട്ടറിമാർ മത്സരിക്കണമോയെന്ന പാർട്ടി തീരുമാനത്തിന്റെ അടിസ്ഥാനത്തിലാകും ഇക്കാര്യത്തിൽ അന്തിമ തീരുമാനമുണ്ടാവുക.