രണ്ടു ദിവസത്തെ നഷ്ടം തുടച്ചുമാറ്റി സൂചികകള്‍ക്ക് ഇന്ന് കുതിച്ചുചാട്ടം

രണ്ടു ദിവസത്തെ നഷ്ടം തുടച്ചുമാറ്റി സൂചികകള്‍ക്ക് ഇന്ന് കുതിച്ചുചാട്ടമാണ് കാഴ്ചവച്ചത്. നിക്ഷേപകര്‍ ലാഭമെടുക്കുമോ, വിപണി ചെറിയ തിരുത്തലിന് വിധേയമാകുമോ, ഈ സംശയങ്ങളെല്ലാം നിലനിന്നിരുന്നുവെങ്കിലും കഴിഞ്ഞ രണ്ടുദിവത്തെ നഷ്ടത്തെ തുടച്ചുമാറ്റി ഇന്ന് ഇന്ത്യന്‍ ഓഹരി സൂചികകള്‍ മുന്നോട്ട് കുതിച്ചു. ഇന്ന് വ്യാപാരത്തിന്റെ ഒരുഘട്ടത്തില്‍ സെന്‍സെക്സ് 936 പോയ്ന്റ് കുതിച്ചുയര്‍ന്ന് 49,500 ല്‍ തൊട്ടു. എന്നാല്‍ ക്ലോസിംഗില്‍ ഇതില്‍ നിന്ന് അല്‍പ്പം താഴ്ന്ന്, 49,398.29 ലെത്തി. ഇന്ന് സെന്‍സെക്്സ് ഉയര്‍ന്നത് 834 പോയ്ന്റാണ്. 1.7 ശതമാനം വര്‍ധന.
സെന്‍സെക്സ് സൂചികാ കമ്പനികളില്‍ ബജാജ് ഫിന്‍സെര്‍വ്, എച്ച് ഡി എഫ് സി, ഐസിഐസിഐ ബാങ്ക്, എല്‍ & ടി എന്നിവയെല്ലാം ഇന്ന് മൂന്നുമുതല്‍ ഏഴ് ശതമാനം വരെയാണ് വര്‍ധന രേഖപ്പെടുത്തിയത്. എച്ച് ഡി എഫ് സി ബാങ്ക്, റിലയന്‍സ്, ടിസിഎസ് എന്നിവയെല്ലാം 1.5 - 2.5 ശതമാനത്തിനിടയില്‍ ഉയര്‍ച്ച രേഖപ്പെടുത്തി.നിഫ്റ്റി ഇന്ന് വ്യാപാരത്തിനിടെ 14,546 തൊട്ടു. ക്ലോസിംഗ് 14,521 ലായിരുന്നു. തൊട്ടുമുന്‍ദിവസത്തേക്കാള്‍ 239.85 പോയ്ന്റ്, അഥവാ 1.68 ശതമാനം വര്‍ധന.സ്മോള്‍, മിഡ് കാപ് സൂചികകളും ഇന്ന് മോശമാക്കിയില്ല. മിഡ് കാപ് സൂചിക 2.3 ശതമാനവും സ്മോള്‍ കാപ് സൂചിക 1.6 ശതമാനവും വര്‍ധിച്ചു. ചൈനയുടെ സാമ്ബത്തിക വളര്‍ച്ചാ കണക്കുകള്‍ ഏഷ്യന്‍ വിപണികളെ ഉയര്‍ത്തിയതിന്റെ ചുവടുപിടിച്ച് യൂറോപ്യന്‍ സൂചികകളും ഇന്ന് ഉയര്‍ന്നു. ഏഷ്യന്‍ സൂചികകള്‍ സര്‍വകാല റെക്കോര്‍ഡ് കുറിച്ചാണ് ക്ലോസിംഗ്.