മിണ്ടാപ്രാണിയോട് വീണ്ടും മനുഷ്യന്റ ക്രൂരത

കോട്ടയം: കാലിത്തൊഴുത്തില്‍ പിറന്നവനേയെന്ന ക്രിസ്മസ് കരോള്‍ ഗാനം കാതിലെത്തേണ്ട ഈ സമയം കോട്ടയത്തും മിണ്ടാപ്രാണിയോട് വീണ്ടും മനുഷ്യന്‍ ക്രൂരത കാട്ടിയിരിക്കുന്നു. മോഷ്ടിച്ച എരുമയെ മീറ്ററുകളോളം വാഹനത്തിന് പിന്നില്‍ കയറിട്ട് കെട്ടിവലിച്ച ശേഷം വഴിയില്‍ ഉപേക്ഷിച്ചു കടന്നു കളഞ്ഞു. ഈരാറ്റുപേട്ട തീക്കോയി ഒറ്റയീട്ടിയിലാണ് ഇന്നലെ പുലര്‍ച്ചെ മൂന്നരയോടെയായിരുന്നു ഈ കൊടും ക്രൂരസംഭവം അരങ്ങേറിയത്. എരുമയ്ക്ക് സാരമായ പരിക്കേറ്റിട്ടുണ്ട്. കൈകാലുകള്‍ക്കും ശരീരത്തിലും ആഴത്തില്‍ മുറിവു പറ്റിയ എരുമ തീര്‍ത്തും അവശനിലയിലാണ്. കാല്‍ മുട്ടുകള്‍ക്ക് താഴേയ്ക്ക് മാംസം നഷ്ടപ്പെട്ട് എല്ലുകള്‍ തെളിഞ്ഞ നിലയിലാണ് എരുമയുടെ അവസ്ഥ.

കൊച്ചിയില്‍ നായയെ വാഹനത്തില്‍ കെട്ടിവലിച്ചതിന് പിന്നാലെയാണ് ഈ സംഭവം. ശിക്ഷാ നടപടികള്‍ ഉണ്ടായിട്ടും മിണ്ടാപ്രാണികളോടുള്ള കൊടും ക്രൂരതകള്‍ തുടര്‍ക്കഥയാവുകയാണ്. മോഷ്ടിച്ച എരുമയെ വാഹനത്തില്‍ കയറ്റാന്‍ ശ്രമിച്ചത് വിഫലമായപ്പോള്‍ വാഹനത്തിന് പിന്നില്‍ കെട്ടി വലിക്കുകയായിരുന്നുവെന്നാണ് നിഗമനം. പിന്‍ഭാഗം കണ്‍ടെയ്‌നര്‍ ആയ ഒരു വാഹനം അതിവേഗം ഓടിച്ചു പോകുന്നതും പിന്നില്‍ കയറില്‍ കെട്ടിയ നിലയിലുള്ള എരുമയേയും, സംഭവ സ്ഥലത്തിനരികെയുള്ള സി.സി ടി വി ദൃശ്യങ്ങളിലുണ്ട്. അവശനിലയിലായ എരുമയെ റോഡില്‍ ഉപേക്ഷിച്ച് മോഷണ സംഘം കടന്നുകളയുകയായിരുന്നു.
സംഭവമറിഞ്ഞെത്തിയ നാട്ടുകാര്‍ എരുമയെ സമീപമുള്ള പുരയിടത്തിലെത്തിച്ച് പരിപാലിക്കുന്നുണ്ട്. സംഭവത്തില്‍ ഇവര്‍ പരാതി നല്‍കി. കുറ്റവാളികളെ എത്രയും വേഗം നിയമത്തിനു മുന്നില്‍ കൊണ്ടുവരണമെന്ന ആവശ്യമാണ് വിവിധയിടങ്ങളില്‍ നിന്നും ഉയരുന്നത്.