മുൻ എംഎൽഎ ടി ചാത്തു അന്തരിച്ചു

മുതിർന്ന സിപിഐ എം നേതാവും കർഷകതൊഴിലാളി യൂണിയൻ അഖിലേന്ത്യ വർക്കിങ്‌ കമ്മിറ്റി അംഗവും മുൻ എംഎൽഎയുമായ  കൊല്ലങ്കോട്‌ മുതലമട  പള്ളം ഹൗസിൽ ടി ചാത്തു (88) അന്തരിച്ചു. വാർധക്യ സഹജമായ ശാരീരിക അവശതയെ തുടർന്ന്‌ ഏറെ നാളുകളായി വീട്ടിൽ വിശ്രമത്തിലായിരുന്നു. തിങ്കളാഴ്‌ച രാവിലെ അസ്വസ്‌ഥത അനുഭവപ്പെട്ടതിനാൽ കൊല്ലങ്കോട്‌ സ്വകാര്യ ആശുപത്രിയിലെത്തിച്ചു. പകൽ 10.30 ന്‌ മരണപ്പെട്ടു. സംസ്‌കാരം ചൊവ്വാഴ്‌ച രാവിലെ ഒമ്പതിന്‌ വീട്ടുവളപ്പിൽ.

സിപിഐ എം ജില്ലാ കമ്മിറ്റിയംഗം, ജില്ലാ സെക്രട്ടറിയറ്റ്‌ അംഗം എന്നീനിലകളിൽ പ്രവർത്തിച്ച ചാത്തു, കാർഷകതൊഴിലാളികളെ സംഘടിപ്പിക്കുന്നതിൽ നേതൃപരമായ പങ്ക്‌വഹിച്ചു. നിരവധി സമരങ്ങളിലും പങ്കെടുത്തു.1991 മുതൽ 1996 വരെ കൊല്ലങ്കോട്‌  മണ്ഡലത്തിൽ നിന്നും  നിയമസഭാഅംഗമായി പ്രവർത്തിച്ചു.

ഏറ്റവും കൂടുതൽ ജയിൽവാസം അനുഭവിച്ച നേതാവുകൂടിയാണ്‌ അദ്ദേഹം. ജില്ലയിലെ ആദ്യ രക്തസാക്ഷി അരണ്ടപ്പള്ളം ആറു ജന്മിയുടെ ഗുണ്ടകളുടെ  വെടിയേറ്റ്‌ മരിച്ചപ്പോൾ ഒരു രാത്രിമുഴുവൻ മൃതദേഹത്തിന്‌ കാവലിരുന്നത്‌ ചാത്തുവായിരുന്നു. 1957   ഒക്ടോബർ ഒന്നിനായിരുന്നു അത്‌.  കമ്യൂണിസ്‌റ്റ്‌ പാർടി നിരോധിച്ച സമയത്ത്‌  ഒളിവിൽകഴിയുന്ന നേതാക്കൾക്ക്‌ കത്തും ബീഡിയും കൈമാറുന്ന ജോലിയായിരുന്നു ചാത്തുവിന്‌.

18-ാം വയസ്സിൽ കമ്യൂണിസ്‌റ്റ്‌ പാർടിയിൽ അംഗമായി.  അഖിലേന്ത്യാ കിസാൻസഭയിലൂടെയാണ്‌ പൊതുരംഗത്തേക്ക്‌ വന്നത്‌. ആദ്യം വില്ലേജ് സെക്രട്ടറി, താലൂക്ക്‌ സെക്രട്ടറി, 1966ൽ കെഎസ്‌കെടിയു രൂപീകരിച്ചപ്പോൾ ജില്ലാ ജോയിന്റ്‌ സെക്രട്ടറി, പിന്നീട്‌ സംസ്ഥാന ജോയിന്റ്‌ സെക്രട്ടറി, പി കെ കുഞ്ഞച്ചൻ അഖിലേന്ത്യാ സെക്രട്ടറിയായ സമയത്ത്‌ ഒരുവർഷം സംസ്ഥാന ആക്ടിങ്‌ സെക്രട്ടറിയായും പ്രവർത്തിച്ചു.  27 വർഷമായി കർഷകത്തൊഴിലാളി യൂണിയൻ അഖിലേന്ത്യാ വർക്കിങ് കമ്മിറ്റി അംഗമാണ്‌.  

   ഭാര്യ: ശകുന്തള. മക്കൾ: തിരുച്ചന്ദ്രൻ (സിപിഐ എം മുതലമട ലോക്കൽ സെക്രട്ടറി), രവിച്ചന്ദ്രൻ (അധ്യാപകൻ), സതീഷ്‌ചന്ദ്രൻ (ദേശാഭിമാനി, പാലക്കാട്‌), പുഷ്‌പലത (അധ്യാപിക), നിർമലത (തൃശൂർ). മരുമക്കൾ: പ്രിയ, സരിത (ജില്ലാ സഹ. ബാങ്ക്‌), ബിൻസി (അധ്യാപിക), ബിജു (അധ്യാപകൻ), തേജാറാം (ഗൾഫ്‌).