സുരേന്ദ്രനെ മാറ്റണം ബിജെപിയിലും പോര് മുറുകുന്നു

തദ്ദേശസ്വയംഭരണ തിരഞ്ഞെടുപ്പ് പരാജയത്തെ തുടര്‍ന്ന് ബി ജെ പിക്കുള്ളിലും തമ്മിലടി രൂക്ഷമാവുന്നു. നേതൃമാറ്റ ആവശ്യമാണ് പാര്‍ട്ടിക്കുള്ളില്‍ ഉയര്‍ന്നിരിക്കുന്നത്.
സുരേന്ദ്രനും മുരളീധരനും കേന്ദ്രനേതൃത്വത്തിന് നല്‍കിയ കണക്കിന്റെ മൂന്നിലൊന്ന് വിജയം പോലും പാര്‍ട്ടിക്കും മുന്നണിക്കും ലഭിക്കാത്തതില്‍ അസ്വസ്ഥരാണ് കേന്ദ്രനേതൃത്വം . വര്‍ഗീയകാര്‍ഡിറക്കി വിജയിക്കാം എന്ന പ്രതീക്ഷയും കേരളത്തില്‍ നടപ്പിലായില്ല.
ശബിമല വിവാദമാക്കിയെങ്കിലും നോം കിട്ടിയില്ല, രാഹുല്‍ തരംഗത്തില്‍ കേരളം കോണ്‍ഗ്രസ് നേടി എന്നായിരുന്നു കേന്ദ്ര ബി ജെ പി വിലയിരുത്തല്‍ .അതിനാല്‍ സുരേന്ദ്രനും പകരം തീവ്രരാഷ്ട്രീയം ഒഴിവാക്കിയുള്ള ഒരു നീക്കത്തിനാണ് ഇനി മുതിരരുക. കോണ്‍ഗ്രസില്‍ നിന്ന് പിണങ്ങി വരുന്നവരെയും ലക്ഷ്യമിടുന്നുണ്ട്.

കെ സുരേന്ദ്രനെ ബിജെപി സംസ്ഥാന അധ്യക്ഷ സ്ഥാനത്തുനിന്നും മാറ്റണമെന്ന ആവശ്യവുമായി ശോഭാ സുരേന്ദ്രന്‍ വിഭാഗവും കൃഷ്ണദാസ് പക്ഷവും. പാര്‍ട്ടി കേന്ദ്ര നേതൃത്വത്തിന് ഇരുവിഭാഗവും വെവ്വേറെ കത്തയച്ചു.

ശോഭാ സുരേന്ദ്രന്‍ വിഭാഗവും കൃഷ്ണദാസ് പക്ഷവും കൈകൊര്‍ത്ത് സുരേന്ദ്രനെതിരെ പടയൊരുക്കം നടത്തുകയാണ്. കേന്ദ്ര നേതൃത്വത്തിന് ഇരുപക്ഷവും വെവ്വേറെ നല്‍കിയ കത്തുകള്‍ സുരേന്ദ്രനെതിരായ കുറ്റപത്രം തന്നെയാണ്. 2015നെക്കാള്‍ ആകെ ജയിച്ച വാര്‍ഡുകളുടെ എണ്ണം കൂടിയെന്ന നേതൃത്വത്തിന്റെ അവകാശവാദം പൊള്ളയാണെന്നാണ് ഇരുപക്ഷത്തിന്റെയും വിമര്‍ശനം. ജില്ലാ പഞ്ചായത്തുകളിലും ബ്ലോക്കിലും പാര്‍ട്ടിക്കുണ്ടായത് കനത്തതോല്‍വിയാണ്. തിരുവനന്തപുരം കോര്‍പ്പറേഷനില്‍ പ്രതീക്ഷിച്ച നേട്ടത്തിന്റെ അടുത്തുപോലും എത്തിയില്ല. എല്ലാം സുരേന്ദ്രന്‍ ഒറ്റക്ക് തീരുമാനിക്കുന്നുവെന്നാണ് പ്രധാന ആക്ഷേപം.

തെരഞ്ഞെടുപ്പ് സമിതിയും കോര്‍കമ്മിറ്റിയും ചേര്‍ന്നില്ല. ശോഭാ സുരേന്ദ്രന്‍, പിഎം വേലായുധന്‍, കെപിശ്രീശന്‍ തുടങ്ങിയ മുതിര്‍ന്ന നേതാക്കളെ പരിഗണിക്കുന്നതേയില്ല എന്നതാണ് ശോഭാ വിഭാഗത്തിന്റെ കത്തിലെ കുറ്റപ്പെടുത്തല്‍.