കനത്ത തിരിച്ചടിയുമായി മൊബൈല്‍ മേഖലയും; ഇനി മുതല്‍ ഫോണ്‍ വാങ്ങുമ്പോള്‍ ചാര്‍ജറും ഇയര്‍ ഫോണും ലഭിക്കില്ല

കനത്ത തിരിച്ചടിയുമായി മൊബൈല്‍ മേഖലയും രംഗത്ത്. സാധാരണ ലഭിച്ചുകൊണ്ടിരിക്കുന്ന പോലെ ഇനി മുതല്‍ മൊബൈല്‍ ഫോണ്‍ വാങ്ങുമ്പോള്‍ ചാര്‍ജറും ഇയര്‍ഫോണും ലഭിക്കില്ല. അതിനും വേറെ കാശ് ചിലവാക്കേണ്ടി വരും. ഉതുകൊണ്ട് ഇനി മുതല്‍ മൊബൈല്‍ ഫോണ്‍ വാങ്ങുമ്പോള്‍ സൂക്ഷിക്കുക. ആ പാക്കറ്റില്‍ ചാര്‍ജറും ഇയര്‍ ഫോണും കണ്ടില്ലെന്ന് കരുതി അത്ഭുതപ്പെട്ടിട്ട് കാര്യമില്ല. ഫോണ്‍ മാത്രമേ കമ്പനി നല്‍കുകയുള്ളൂ എന്നാണ് തീരുമാനം.

ആപ്പിള്‍ ഇറക്കാന്‍ പോകുന്ന ഐ ഫോണ്‍ 13 ല്‍ ചാര്‍ജറും ഇയര്‍ ഫോണും ഉണ്ടാവില്ലത്രേ. ഇനിയിപ്പോള്‍ സാംസങ്ങ് അടക്കമുള്ള മറ്റു മൊബൈല്‍ ഫോണ്‍ നിര്‍മ്മാതാക്കള്‍ ഇതേ പാത പിന്തുടര്‍ന്നേക്കുമെന്നാണ് മൊബൈല്‍ ഇന്‍ഡസ്ട്രി വൃത്തങ്ങള്‍ നല്‍കുന്ന സൂചന. എല്ലാം തുടങ്ങി വയ്ക്കുന്നത് ആപ്പിള്‍ തന്നെ. ഐ ഫോണ്‍ 12 സീരീസ് ഇറക്കുന്ന വേളയില്‍ തന്നെ ആപ്പിള്‍ പറഞ്ഞിരുന്നു ഇനി മുതല്‍ എല്ലാ ഐ ഫോണ്‍ 12 മോഡലുകളും ഭാവിയില്‍ ഇറക്കാന്‍ പോകുന്ന ഐ ഫോണ്‍ സീരീസുകളും ചാര്‍ജറുകള്‍ ഇല്ലാതെയായിരിക്കും മാര്‍ക്കറ്റില്‍ ഇറക്കുകയെന്ന്. ഇങ്ങനെ ഓരോ മാറ്റങ്ങള്‍ കൊണ്ടു വരുമ്പോഴും ഉപഭോക്താക്കളുടെ മനസ്സറിയാന്‍ ആപ്പിള്‍ കമ്പനി സര്‍വ്വേകള്‍ നടത്താറുണ്ട്. അത്തരം ഒരു സര്‍വേയില്‍ ഉപഭോക്താക്കള്‍ ഉപയോഗിക്കുന്നത് ഫോണിനൊപ്പം വരുന്ന ഇയര്‍ ഫോണുകള്‍ തന്നെയാണോ എന്ന ചോദ്യം ആപ്പിള്‍ ഉന്നയിച്ചിരുന്നു. ഇതോടെ ഇനി പുറത്തു വരുന്ന ഐ ഫോണ്‍ 13 സീരീസില്‍ ചാര്‍ജറും ഉണ്ടാവില്ല, ഇയര്‍ ഫോണും ഉണ്ടാവില്ല എന്നുറപ്പായി. മൊത്തത്തില്‍ ഐ ഫോണുകള്‍ക്ക് വില കൂടുമെന്നു സാരം.

മാത്രമല്ല ഇനിയിപ്പോള്‍ ഐ ഫോണിന്റെ സുപ്രധാന ഫീച്ചറുകളില്‍ ഒന്നായ കോള്‍ ചെയ്യുമ്പോള്‍ തെളിഞ്ഞു വരുന്ന ഫേസ് ഐ ഡിയും ഐ ഫോണില്‍ നിന്ന് എടുത്തു കളഞ്ഞേക്കും എന്ന സൂചനകളാണ് പുറത്തുവരുന്നത്. കാരണം ഫേസ് ഐ ഡി യുടെ കാര്യത്തില്‍ സംതൃപ്തരാണോ എന്ന ചോദ്യം ഉന്നയിക്കപ്പെട്ടിരിക്കുകയാണ് മറ്റൊരു സര്‍വേയില്‍. ഐ ഫോണ്‍ 12 പ്രൊ മാക്‌സ് ഉപഭോക്താക്കളോടാണ് ചോദ്യം ഉന്നയിക്കപ്പെട്ടത്. ഫേസ് ഐ ഡിയുടെ കാര്യത്തില്‍ സംതൃപ്തരാണോ എന്ന ചോദ്യത്തിന് ഇല്ല എന്നാണ് ഉത്തരം നല്‍കുന്നതെങ്കില്‍ അത്തരക്കാരോട് പിന്നെയും ചോദ്യങ്ങള്‍ വന്നു. പല ഓപ്ഷന്‍സ് ആയിരുന്നു ആപ്പിള്‍ കൊടുത്തത്. സുരക്ഷിതത്വം, സ്വാകാര്യത എന്നീ കാര്യങ്ങളിലുള്ള ഭയം കാരണമാണോ ഫേസ് ഐ ഡിയുടെ കാര്യത്തില്‍ അതൃപ്തി, ഫേസ് ഐ ഡി കണ്ടു കൊണ്ട് തന്റെ ഫോണ്‍ പിക്ക് ചെയ്യാന്‍ ഇഷ്ടമല്ല, ഫോണിന്റെ പെര്‍ഫോമന്‍സ് സ്ലോ ആകുന്നു, എല്ലാ സാഹചര്യങ്ങളിലും തന്റെ മുഖം വ്യക്തമായി കാണിക്കുന്നില്ല (കുറഞ്ഞ വെളിച്ചത്തില്‍, വ്യത്യസ്ത ആംഗിളില്‍, കിടക്കുമ്പോള്‍, സണ്‍ ഗ്ലാസ് ഉപയോഗിക്കുമ്പോള്‍ ), തനിക്ക് ടച്ച് ഐ ഡി യാ ണിഷ്ടം, ഫേസ് ഐ ഡി വിശ്വസിക്കാന്‍ കൊള്ളില്ല, ഫേസ് ഐ ഡിയുള്ളത് കാരണം എല്ലായ്പ്പോഴും ഫോണ്‍ അണ്‍ലോക്ക് ആകുന്നില്ല, ഇങ്ങനെ പല ഓപ്ഷന്‍സ് ആണ് ഉപഭോക്താക്കള്‍ക്ക് മറുപടിയായി തിരഞ്ഞെടുക്കാന്‍ കൊടുത്തത്. എന്നാല്‍ ഇക്കാര്യങ്ങളില്‍ കമ്പനിയുടെ ഭാഗത്തു നിന്ന് ഔദ്യോഗിക അറിയിപ്പുകള്‍ ഒന്നും ഉണ്ടായിട്ടില്ലെന്നതിനാല്‍ കാത്തിരുന്നു കാണേണ്ടി വരും ഇനി ഇറങ്ങുന്ന ഐ ഫോണിന്റെ കൂടെ ഏതെല്ലാം അക്സെസ്സറികള്‍ ഉണ്ടാവില്ലെന്ന്. ഇനി ചിലപ്പോ ഐ ഫോണ്‍ 13 വാങ്ങിക്കുന്ന ഉപഭോക്താക്കളെ മാഗ് സേഫ് ചാര്‍ജറുകള്‍ കൂടി വാങ്ങിപ്പിക്കാന്‍ നിര്‍്ബന്ധിതരാക്കുന്ന വല്ല തന്ത്രവുമാണോ എന്നും അറിയില്ല.