വില കൂട്ടാനൊരുങ്ങി മാരുതി..!! വർദ്ധനവ് വ്യത്യസ്‍ത മോഡലുകൾക്ക് അനുസൃതമോ..

രാജ്യത്തെ ഏറ്റവും വലിയ കാർ നിർമാതാക്കളായ മാരുതി സുസുക്കി 2021 ജനുവരി മുതൽ കാറുകളുടെ വില കൂട്ടാന്‍ ഒരുങ്ങുകയാണെന്ന് റിപ്പോര്‍ട്ട്. അസംസ്‍കൃത സാധനങ്ങളുടെ ചെലവ് ഉയർന്നതാണ് ഈ നീക്കത്തിനു കാരണമെന്നും റിപ്പോർട്ടിൽ പറയുന്നു.

നിലവിൽ 2.95 ലക്ഷം വിലവരുന്ന അൾട്ടോ മുതൽ 11.52 ലക്ഷം രൂപ വിലവരുന്ന മൾട്ടി പർപ്പസ് വെഹിക്കിളായ എക്സ്എൽ6 വരെ ഉള്‍പ്പെടുന്നതാണ് മാരുതിയുടെ ശ്രേണി.

ഈ നവംബറിൽ കാർ വിൽപനയിൽ 2.4 ശതമാനം ഇടിവാണുണ്ടായതെന്നും മുൻ വർഷം ഇതേമാസം 1,39,133 ലക്ഷം കാർ വിറ്റ സ്ഥാനത്ത് ഇത്തവണ 1,35,775 കാറുകളാണ് വിൽക്കാൻ കഴിഞ്ഞതെന്നുമാണ് റിപ്പോര്‍ട്ടുകള്‍.

അതേസമയം, കയറ്റുമതി ഉൾപ്പെടെ ആകെ വിൽപനയിൽ കമ്പനിക്ക് വളർച്ച നേടാൻ കഴിഞ്ഞു. 2019 നവംബറിൽ 1,50,630 യൂണിറ്റുകൾ വിറ്റസ്ഥാനത്ത് ഇപ്പോൾ ഇത് 1,53,223 ആയി വർധിച്ചു.

1.7 ശതമാനമാണ് വളർച്ച.ലോക്ക്ഡൗൺ വരുത്തിയ തിരിച്ചടികളിൽ നിന്ന് കമ്പനി കരകയറുന്നതിനിടെയാണ് വില വർധന പ്രഖ്യാപിച്ചിരിക്കുന്നത്.