ലോക്ക് ഡൗണില്‍ കാട്ടിലകപ്പെട്ടു; നാല് മാസത്തിന് ശേഷം ഇതര സംസ്ഥാന തൊഴിലാളിയുടെ അസ്ഥികൂടം കണ്ടെത്തി

കൊവിഡ് ലോക്ഡൗണ്‍ സമയത്ത് കേരളത്തിലേക്കുള്ള യാത്രയ്ക്ക്‌ടെ കര്‍ണ്ണാടക വനമേഖലയില്‍ കാണാതായ ആളുടെ തലയോട്ടി കണ്ടെടുത്തു. മാക്കൂട്ടം ചുരം വഴി വരവെ കാട്ടിലകപ്പെട്ട് പോയ ഫെഡ്രിക് ബാര്‍ലയുടെ അസ്ഥികൂടമാണ് നാല് മാസത്തിന് ശേഷം കിട്ടിയത്. കൊവിഡിന്റെ തുടക്കം മുതല്‍ മാസങ്ങളോളം അടച്ചിട്ട കര്‍ണ്ണാടക കേരള അതിര്‍ത്തിയായ മാക്കൂട്ടം ചുരം കഴിഞ്ഞ ആഗസ്റ്റിലാണ് തുറന്നത്. കൂര്‍ഗില്‍ അകപ്പെട്ടുപോയ ഒരു സംഘം ഇതര സംസ്ഥാന തൊഴിലാളികള്‍ റോഡ് തുറന്നതോടെ കണ്ണൂരേക്ക് ബസ്സില്‍ എത്തിയിരുന്നു.
വനത്തിനുള്ളില്‍ ഭക്ഷണം കഴിക്കാനായി വണ്ടി നിര്‍ത്തിയപ്പോള്‍ സംഘത്തിലുള്ള ഫെഡ്രിക് ബാര്‍ലയെ കാണാതാവുകയായിരുന്നു. കര്‍ണ്ണാകട മേഖല ആയതിനാല്‍ വീരാജ് പേട്ട പൊലീസ് സ്റ്റേഷനില്‍ കേസ് ഫയല്‍ ചെയ്ത് തിരിച്ചില്‍ നടത്തി. പിന്നീട് സംഘം കണ്ണൂര്‍ ഇരിട്ടിയിലെത്തി കേരള പൊലീസിനോടും ഈ വിവരം പറഞ്ഞു. കേരള പൊലീസും അന്വേഷിച്ചിറങ്ങിയെങ്കിലും വനാതിര്‍ത്തിയിലൂടെ ഒഴുകുന്ന ബാരാപോള്‍ പുഴ കരകവിഞ്ഞതിനാല്‍ തിരച്ചില്‍ ദുഷ്‌കകരം ആയിരുന്നു.
ആളെ കാണാതായി നാല് മാസത്തിന് ശേഷമാണ് വനാതിര്‍ത്തിയില്‍ ഒരു തലയോട്ടി കണ്ടകാര്യം നാട്ടുകാര്‍ പൊലീസിനെ അറിയിച്ചത്. പ്രദേശത്ത് പരിശോധിച്ചപ്പോള്‍ തലയോട്ടിയും തുടയെല്ലുകളുമാണ് കിട്ടിയത്. ജീന്‍സ് പാന്റിന്റെ അവശിഷ്ടത്തില്‍ നിന്നും തിരിച്ചറിയല്‍ രേഖകളും കിട്ടി. ഒഡീഷ സുന്ദര്‍ഘര്‍ ജില്ല സ്വദേശിയായ ഫെഡ്രിക് ബാര്‍ലയ്ക്ക് 45 വയസ് പ്രായമുണ്ട്. ടെലിഫോണ്‍ കമ്പനിയുടെ കരാറ് പണിക്കാരായി എത്തിയതായിരുന്നു ഒഡീഷയില്‍ നിന്നുള്ള ഈ സംഘം. ഫൊറന്‍സിക് വിദഗ്ധരെത്തി സ്ഥലത്ത് പരിശോധന നടത്തി. അസ്ഥികൂടം കുടുതല്‍ പരിശോധനയ്ക്കായി പരിയാരം മെഡിക്കല്‍ കോളേജിലേക്ക് മാറ്റി. ബന്ധുക്കളെ വിവരം അറിയിച്ചിട്ടുണ്ടെന്നും സംഭവത്തില്‍ മറ്റ് ദുരൂഹതകള്‍ ഇല്ലെന്നും ഇരിട്ടി പൊലീസ് പറയുന്നു.