ടൂറിസം കൗണ്‍സിലിലെ ദിവസവേതനക്കാരുടെ ശമ്പളം : എത്രയും വേഗം തിരുമാനമെടുക്കണമെന്ന് മനുഷ്യാവകാശ കമ്മീഷന്‍

ഇടുക്കി : ജില്ലാ ടൂറിസം പ്രമോഷന്‍ കൗണ്‍സിലിന് കീഴിലുള്ള ജീവനക്കാരുടെ സേവന വേതന വ്യവസ്ഥകള്‍ പഠിച്ച് ശുപാര്‍ശ സമര്‍പ്പിക്കാന്‍ ടൂറിസം വകുപ്പ് നിയോഗിച്ചിരുന്ന കമ്മിറ്റി താല്‍ക്കാലിക, ദിവസ വേതന ജീവനക്കാരുടെ വേതനം സംബന്ധിച്ച് എത്രയും വേഗം തീരുമാനമെടുക്കണമെന്ന് സംസ്ഥാന മനുഷ്യാവകാശ കമ്മീഷന്‍.

ഇടുക്കി ജില്ലാ ടൂറിസം കൗണ്‍സില്‍ സെക്രട്ടറിക്കാണ് കമ്മീഷന്‍ അദ്ധ്യക്ഷന്‍ ജസ്റ്റിസ് ആന്റണി ഡൊമിനിക് ഉത്തരവ് നല്‍കിയത്.

വാഗമണ്‍ ഡസ്റ്റിനേഷന്‍ മാനേജ്‌മെന്റ് കൗണ്‍സിലിനു കീഴില്‍ വാഗമണ്‍ ടൂറിസ്റ്റ് കേന്ദ്രത്തില്‍ ജോലി ചെയ്യുന്ന ഗാര്‍ഡുമാരുടെ ശമ്പളം വര്‍ധിപ്പിക്കണമെന്നാവശ്യപ്പെട്ട് സമര്‍പ്പിച്ച പരാതിയിലാണ് നടപടി. ദിവസം 350 രൂപ ശമ്പളത്തിലാണ് ഇവര്‍ ജോലി ചെയ്യുന്നത്.

സന്ദര്‍ശകരില്‍ നിന്നും ഈടാക്കുന്ന തുച്ഛമായ ഫീസില്‍ നിന്നാണ് ശമ്പളം നല്‍കുന്നതെന്ന് ഇടുക്കി ജില്ലാ ടൂറിസം പ്രമോഷന്‍ കൗണ്‍സില്‍ സെക്രട്ടറി സമര്‍പ്പിച്ച റിപ്പോര്‍ട്ടില്‍ പറയുന്നു.12,000 രൂപവരെ ദിവസവേതനക്കാര്‍ക്ക് ശമ്പളം നല്‍കുന്നുണ്ട്. ഒ.ജെ. ജോണ്‍ സമര്‍പ്പിച്ച പരാതിയിലാണ് നടപടി.