കെ.എം. ഷാജിയോട് കൂടുതല്‍ രേഖകള്‍ ഹാജരാക്കാന്‍ ആവശ്യപ്പെട്ട് ഇഡി

പ്ലസ്ടു കോഴ കേസുമായി ബന്ധപ്പെട്ട് കൂടുതല്‍ രേഖകള്‍ ഹാജരാക്കണമെന്ന് കെ.എം ഷാജി എം.എല്‍.എയോട് ഇഡി ആവശ്യപ്പെട്ടു. രേഖകള്‍ സമര്‍പ്പിക്കാന്‍ പത്ത് ദിവസം അനുവദിച്ചതായി കെ.എം. ഷാജി പറഞ്ഞു. രണ്ടാം ദിവസം 16 മണിക്കൂറാണ് ഇഡി കെ.എം. ഷാജിയെ ചോദ്യം ചെയ്തത്.
ഇന്നലെ രാവിലെ പത്ത് മണിക്ക് തുടങ്ങിയ ചോദ്യം ചെയ്യല്‍ ഇന്ന് പുലര്‍ച്ചെ രണ്ട് മണിക്കാണ് അവസാനിച്ചത്. പതിനാറ് മണിക്കൂര്‍ നേരത്തെ ചോദ്യം ചെയ്യല്‍. ഇനിയും രേഖകള്‍ ഹാജരാക്കേണ്ടതുണ്ട്.
അഴീക്കോട് സ്‌കൂളിന് പ്ലസ്ടു അനുവദിക്കുന്നതിന് കോഴ വാങ്ങിയെന്ന കേസ്, കോഴിക്കോട്ടെ വീട് നിര്‍മാണത്തിന് പണം എവിടെ നിന്ന്, 2012 ലെ നിയമസഭാ തെരഞ്ഞെടുപ്പ് സമയത്തെ ചെലവ്, ജനപ്രതിനിധി ആയ ശേഷമുള്ള സാമ്പത്തിക സ്രോതസ് തുടങ്ങിയ കാര്യങ്ങളാണ് ഇഡി അന്വേഷിച്ചത്. വിശദമായി ചോദ്യം ചെയ്തു. തികഞ്ഞ ആത്മവിശ്വാസത്തോടെയാണ് ചോദ്യങ്ങളെ നേരിട്ടതെന്ന് ഷാജി പറഞ്ഞു. കോഴിക്കോട്ടെ വീട് നിര്‍മിച്ചതുമായി ബന്ധപ്പെട്ട് ഷാജിയുടെ ഭാര്യ ആശയെയും ഇഡി നേരത്തെ ചോദ്യം ചെയ്തിരുന്നു. രാഷ്ട്രീയ പ്രേരിത കേസുകള്‍ ഇനിയും വരുമെന്ന് അറിയാമെന്നും ഷാജി പറഞ്ഞു.