ജോസഫിന്റെ സീറ്റില്‍ മത്‌സരിക്കുക ഐ ഗ്രൂപ്പിന്റെ സ്ഥാനാര്‍ത്ഥികള്‍

കോട്ടയം ജില്ലയില്‍ ഉമ്മന്‍ചാണ്ടിയുടെ ആധിപത്യത്തിന് തടയിടാന്‍ ഐ ഗ്രൂപ്പ് നടത്തിയ നീക്കത്തില്‍ അമ്പരന്ന് എ വിഭാഗം. ആറു സീറ്റില്‍ കൂടുതല്‍ ജോസഫ് വിഭാഗത്തിന് നല്‍കരുതെന്ന ഉമ്മന്‍ചാണ്ടി വിഭാഗത്തിന്റെ നിര്‍ദേശം മറികടന്നാണ് ചെന്നിത്തലയും സംഘവും 9 സീറ്റ് നല്‍കിയത്.
ഐ ഗ്രൂപ്പിന്റെ പോരാളിയായി മടങ്ങി എത്തിയ ജോസഫ് വാഴയ്ക്കനും, ഉമ്മന്‍ചാണ്ടിയോട് അകന്നു നില്‍ക്കുന്ന തിരുവഞ്ചൂര്‍ രാധാകൃഷ്ണനുമാണ് ഈ നീക്കങ്ങള്‍ക്ക് ചുക്കാന്‍ പിടിച്ചിരിക്കുന്നത്.
കോണ്‍ഗ്രസ് താഴേത്തട്ടില്‍ നിന്ന് എടുത്ത കണക്ക് അനുസരിച്ച് നാലു സീറ്റുകളാണ് ജോസഫ് ഗ്രൂപ്പിന് മത്‌സരിക്കാന്‍ വിട്ടുകൊടുക്കാന്‍ തീരുമാനിച്ചത്. പരമാവധി ആറു സീറ്റ് വരെ ആകുന്നതില്‍ വിരോധമില്ല എന്നും ജില്ലാ കോണ്‍ഗ്രസ് നേതാക്കള്‍ പറഞ്ഞിരുന്നു, പക്ഷെ അതെല്ലാം മറികടന്നാണ് തീരുമാനം വന്നത്.
പത്രസമ്മേളനം നടന്നപ്പോഴാണ് ജില്ലയിലെ ഉമ്മന്‍ചാണ്ടി വിശ്വസ്ഥരെല്ലാം കാര്യങ്ങള്‍ അറിയുന്നത്. ഒന്‍പത് ജില്ലാ പഞ്ചായത്ത് സീറ്റ് കൊടുത്തവര്‍ക്ക് എത്ര നിയമ സഭാ സീറ്റുകള്‍ കോട്ടയത്ത് നല്‍കും എന്നതാണ് ഇവരുടെ ചോദ്യം. ആ സീറ്റ് മോഹിച്ച് ജോലി തുടങ്ങിയ യുവജനനേതാകളും കടുത്ത നിരാശയിലാണ്.
ഇതിനെ തുടര്‍ന്നാണ് മുല്ലപ്പള്ളി പങ്കെടുത്ത കോട്ടയം ഡി സി സി യിലെ യോഗത്തില്‍ കുഞ്ഞ് ഇല്ലംപള്ളി അടക്കമുള്ള നേതാക്കള്‍ പ്രതിഷേധവുമായി രംഗത്തു വന്നത്.
എന്നാല്‍ അവരെയെല്ലാം അമ്പരപ്പിക്കുന്ന പുതിയ വിവരമാണ് പുറത്തുവരുന്നത്. ജോസഫിന് നല്‍കിയിരിക്കുന്ന പല സീറ്റിലും സ്ഥാര്‍ത്ഥികളെ നല്‍കാമെന്ന് ഏറ്റിരിക്കുന്നത് ഐ ഗ്രൂപ്പ് നേതാക്കളാണന്നാണ്. തങ്ങള്‍ക്ക് വേണ്ട ആളുകളുടെ ബന്ധുക്കളെ ജോസഫിന്റെ സീറ്റില്‍ സ്വതന്ത്ര ആക്കി മത്‌സരിപ്പിക്കാനാണ് ശ്രമം. ഇതിന് തിരുവഞ്ചൂര്‍ രാധാകൃഷ്ണനും പൂര്‍ണ്ണ പിന്‍തുണയാണ് നല്‍കിയിരിക്കുന്നത്. ഫലത്തില്‍ ആറു സീറ്റില്‍ ജോസഫും , മൂന്ന് സീറ്റില്‍ ഐ ഗ്രൂപ്പും എന്നതായിരിക്കും കോട്ടയത്ത് സീറ്റ് വിഭജനം. കോട്ടയം കോണ്‍ഗ്രസില്‍ ഉമ്മന്‍ചാണ്ടിയുടെ സംഘത്തിന്റെ മേല്‍കൈ തകര്‍ക്കുകയാണ് ഇവരുടെ ലക്ഷ്യം.
കാലങ്ങളായി ഉമ്മന്‍ചാണ്ടി കൈവശം വച്ചിരുന്ന കോട്ടയം ഐ എന്‍ ടി യു സി രഹസ്യ നീക്കത്തിലൂടെ തിരുവഞ്ചൂര്‍ ഐ ഗ്രൂപ്പ് സഖ്യം പിടിച്ചെടുത്തിരുന്നു. അതിന്റെ തുടര്‍ച്ചയാണ് പുതിയ കളികള്‍.