വീണ്ടും വിവാദം ; പുതിയ പരസ്യവും പിന്‍വലിച്ച് തനിഷ്‌ക

ഒരു പരസ്യം കൂടി പിന്‍വലിച്ച് പ്രമുഖ ജൂവലറി ബ്രാന്‍ഡായ തനിഷ്‌ക്. പടക്കങ്ങളില്ലാതെ ദീപാവലി ആഘോഷിക്കണമെന്ന് ആഹ്വാനം ചെയ്യുന്ന പരസ്യമാണ് കടുത്ത വിമര്‍ശനത്തെ തുടര്‍ന്ന് തനിഷ്‌ക് പിന്‍വലിച്ചത്. പരസ്യത്തില്‍ അഭിനയിച്ച നീന ഗുപ്ത, സയാന ഗുപ്ത, അലയ എഫ്, നിംറത് കൗര്‍ എന്നിവര്‍ക്കെതിരെയും കടുത്ത വിമര്‍ശനങ്ങള്‍ ഉയരുന്നുണ്ട്. ബോയ്കോട്ട് തനിഷ്‌ക് ഹാഷ്ടാഗ് സമൂഹമാധ്യമങ്ങളില്‍ വൈറലാണ്. ബിജെപി ദേശീയ ജനറല്‍ സെക്രട്ടറി സിടി രവി പരസ്യത്തെ വിമര്‍ശിച്ച് ട്വിറ്ററിലൂടെ രംഗത്തെത്തി. 'എങ്ങനെ ആഘോഷിക്കണമെന്ന് ഹിന്ദുക്കളെ മറ്റുള്ളവര്‍ പഠിപ്പിക്കുന്നത് എന്തിനാണ്? കമ്പനികള്‍ തങ്ങളുടെ ഉത്പന്നം വിറ്റഴിക്കുന്നതില്‍ ശ്രദ്ധിക്കുക. പടക്കം പൊട്ടിക്കരുതെന്ന് ഞങ്ങളെ പഠിപ്പിക്കാതിരിക്കുക. ഞങ്ങള്‍ വിളക്ക് കത്തിക്കും, മധുരം വിളമ്പും, ഗ്രീന്‍ പടക്കങ്ങള്‍ പൊട്ടിക്കും' സിടി രവി ട്വീറ്റ് ചെയ്തു.
മറ്റൊരു ബിജെപി നേതാവ് ഗൗരവ് ഗോയല്‍, സിനിമാ സംവിധായകന്‍ വിവേക് അഗ്നിഹോത്രി തുടങ്ങിയവരൊക്കെ പരസ്യത്തിനെതിരെ രംഗത്തെത്തി. തങ്ങളെ പഠിപ്പിക്കാന്‍ തനിഷ്‌ക് ആരാണെന്നാണ് അവരുടെ ചോദ്യം. കഴിഞ്ഞ മാസം മറ്റൊരു പരസ്യം കൂടി തനിഷ്‌ക് പിന്‍വലിച്ചിരുന്നു. ഭിന്നമത വിവാഹം പ്രമേയമാക്കി ചിത്രീകരിച്ച പരസ്യം ലവ് ജിഹാദിനെ പ്രോത്സാഹിപ്പിക്കുന്നു എന്ന് വിമര്‍ശനങ്ങള്‍ ഉയര്‍ന്നതിനെ തുടര്‍ന്നായിരുന്നു ഇത്.