എം.സി കമറുദ്ദീനെ നേരിട്ട് കോടതിയില്‍ ഹാജരാക്കാന്‍ നിര്‍ദേശം

ഫാഷന്‍ ഗോള്‍ഡ് നിക്ഷേപ തട്ടിപ്പുകേസില്‍ റിമാണ്ടില്‍ കഴിയുന്ന എം.സി കമറുദ്ദീന്‍ എംഎല്‍എയുടെ ജാമ്യാപേക്ഷ ഹൊസ്ദുര്‍ഗ് ജുഡീഷ്യല്‍ ഒന്നാംക്ലാസ് മജിസ്ട്രേട്ട് (ഒന്ന്) കോടതി പരിഗണിച്ചു. തിങ്കളാഴ്ച രാവിലെ 11.30 മണിയോടെ ജാമ്യാപേക്ഷയുമായി ബന്ധപ്പെട്ട നടപടി ക്രമങ്ങള്‍ ആരംഭിച്ചത്. മുതിര്‍ന്ന അഭിഭാഷകനും ഡിസിസി മുന്‍ പ്രസിഡണ്ടുമായ സി.കെ ശ്രീധരന്‍ കമറുദ്ദീന് വേണ്ടി കോടതിയില്‍ ഹാജരായി. ഇതിനിടെ എംഎല്‍എയെ നേരിട്ട് ഹാജരാക്കാന്‍ കോടതി അവശ്യപ്പെട്ടു. ഉച്ചകഴിഞ്ഞ് 2.30ന് ഹാജരാക്കാനാണ് നിര്‍ദേശിച്ചിരിക്കുന്നത്. ഹാജരാക്കിയ ശേഷം ഹര്‍ജിയുടെ തുടര്‍ നടപടികള്‍ പരിഗണിക്കാമെന്ന് കോടതി പറഞ്ഞു. അതിനിടെ കേസിലെ മറ്റൊരു പ്രതിയായ ടി.കെ പൂക്കോയ തങ്ങള്‍ കോടതിയില്‍ ഹാജരാകുമെന്ന വിവരത്തെ തുടര്‍ന്ന് കോടതി പരിസരത്ത് പൊലീസ് സുരക്ഷ ഏര്‍പ്പെടുത്തി. അന്വേഷണ ഉദ്യോഗസ്ഥര്‍ ലുക്കൗട്ട് നോട്ടീസ് പുറപ്പെടുവിച്ചതോടെ പൂക്കോയ തങ്ങള്‍ കോടതിയില്‍ കീഴടങ്ങുമെന്നാണ് സൂചന.