ജുവല്ലറി തട്ടിപ്പ് ഉന്നതരിലേക്ക് അങ്കലാപ്പില്‍ ലീഗ്

ഫാഷന്‍ ജുവല്ലറി തട്ടിപ്പു കേസില്‍ എം സി കമറുദ്ദീന്‍ എംഎല്‍എക്കെതിരെ കുരുക്ക് ലീഗിലെ പ്രമുഖരിലേക്കും നീങ്ങുന്നു. തട്ടിപ്പില്‍ എം സി കമറുദ്ദീന്‍ എം എല്‍ എക്കെതിരായ വഞ്ചനാ കേസുകളുടെ എണ്ണം നൂറ് കടന്നു. പതിനഞ്ച് പുതിയ കേസുകള്‍ കൂടി രജിസ്റ്റര്‍ ചെയ്തതോടെയാണ് കേസുകളുടെ എണ്ണം നൂറിന് മേലെ എത്തിയത്. പന്ത്രണ്ട് പേരില്‍ നിന്നായി രണ്ട് കോടി 65 ലക്ഷം രൂപയും മൂന്ന് പേരില്‍ നിന്നായി 167 പവന്‍ സ്വര്‍ണവും വാങ്ങി വഞ്ചിച്ചെന്നാണ് പുതിയ കേസുകള്‍.

ചന്തേര സ്റ്റേഷനില്‍ അഞ്ചും കാസര്‍കോട് എട്ടും പയ്യന്നൂരില്‍ രണ്ട് കേസുകളുമാണ് പുതുതായി കമറുദ്ദീനെതിരെ രജിസ്റ്റര്‍ ചെയ്തത്.അതേസമയം മുസ്ലിം ലീഗ് കാസര്‍കോട് ജില്ലാ ട്രഷററും ജുവലറി നിക്ഷേപകരുടെ പ്രശ്‌നങ്ങളില്‍ ലീഗ് മദ്ധ്യസ്ഥനുമായ കല്ലട്ര മാഹിന്‍ ഹാജിയെ പ്രത്യേക അന്വേഷണ സംഘം വിളിച്ചു വരുത്തി മൊഴിയെടുത്തു. ഇന്നലെ ഉച്ചയ്ക്കായിരുന്നു വിളിച്ചു വരുത്തിയത്. മൂന്ന് മണിക്കൂറോളം നേരം അദ്ദേഹത്തില്‍ നിന്ന് വിവരങ്ങള്‍ ചോദിച്ചറിഞ്ഞു.
കേസില്‍ പെട്ടിരിക്കുന്ന സ്ഥാപനത്തില്‍ പല ലീഗ് വമ്പന്‍മാരുടെയും ഇടപാടുകള്‍ ഉണ്ടെന്നാണ് പുറത്തുവരുന്ന വിവരം അതിന്റെ അടിസ്ഥാനത്തില്‍ അന്വേഷണം ശക്തമാക്കിയിരിക്കുകയാണ് പൊലീസ് . കൃത്യമായ തെളിവുകള്‍ കയ്യിയില്‍ കിട്ടിയിട്ടും മതി ഉന്നതരിലേക്കുള്ള നീക്കം എന്നാണ് പൊലീസ് നിലപാട്. അല്ലങ്കില്‍ രാഷ്ട്രീയ വിവാദമാക്കി പ്രതികള്‍ രക്ഷപെടാനുള്ള സാധ്യതയുണ്ടെന്ന് പൊലീസ് പറയുന്നു.

എം സി ഖമറുദ്ദീന്‍ എംഎല്‍എയുടെ സ്വര്‍ണ നിക്ഷേപത്തട്ടിപ്പില്‍ മുസ്ലിംലീഗ് നേതൃത്വം മധ്യസ്ഥനായി നിയോഗിച്ച കാസര്‍കോട് ജില്ലാ ട്രഷറര്‍ കല്ലട്ര മാഹിന്‍ഹാജിയെ ക്രൈംബ്രാഞ്ച് പ്രത്യേക അന്വേഷകസംഘം ചോദ്യംചെയ്തു. കാസര്‍കോട് പൊലീസ് ആസ്ഥാനത്തെ എസ്ഐടി ഓഫീസില്‍ വിളിച്ചുവരുത്തിയാണ് മൂന്ന് മണിക്കൂറോളം ചോദ്യംചെയ്തത്. ലീഗ് ജില്ലാ പ്രസിഡന്റ് ടി ഇ അബ്ദുള്ള, സെക്രട്ടറി എ അബ്ദുള്‍റഹിമാന്‍ ഉള്‍പ്പെടെയുള്ള നേതാക്കളെയും വരും ദിവസങ്ങളില്‍ ചോദ്യംചെയ്യും.

ജ്വല്ലറി എംഡി ടി കെ പൂക്കോയതങ്ങളും ഡയറക്ടര്‍മാരില്‍ ചിലരും ആക്ഷന്‍ കമ്മിറ്റി ഭാരവാഹികളും നല്‍കിയ വിവരങ്ങളിലും അന്വേഷകസംഘം ശേഖരിച്ച തെളിവുകളിലും തട്ടിപ്പില്‍ ലീഗ് നേതൃത്വത്തിലെ ചിലരുടെ പങ്ക് വ്യക്തമായിരുന്നു.