ക്ലാസിലിരിക്കാന്‍ ഫോണിന് റേഞ്ച് തേടിപ്പോയ 16 കാരിയെ പീഡിപ്പിക്കാന്‍ ശ്രമം

ജീപ്പ് ഡ്രൈവര്‍ അറസ്റ്റില്‍

ഓണ്‍ലൈന്‍ ക്ലാസിലിരിക്കാന്‍ മൊബൈല്‍ ഫോണിന് റെഞ്ചുള്ള സ്ഥലത്തേക്ക് ജീപ്പില്‍ പോയ പെണ്‍കുട്ടിയെ പീഡിപ്പിക്കാന്‍ ശ്രമം. മൂന്നാറിലാണ് സംഭവം. നെറ്റ്വര്‍ക്ക് കവറേജുള്ള സ്ഥലത്തേക്ക് പോവുകയായിരുന്ന പെണ്‍കുട്ടിയെ ജീപ്പ് ഡ്രൈവര്‍ വഴിയില്‍ വാഹനം നിര്‍ത്തിയിട്ട് പീഡിപ്പിക്കാന്‍ ശ്രമിക്കുകയായിരുന്നു. കുട്ടിയുടെ മാതാപിതാക്കള്‍ നല്‍കിയ പരാതിയില്‍ ഡ്രൈവര്‍ പി ശിവകണ്ണനെ പൊലീസ് അറസ്റ്റ് ചെയ്തു. മൂന്നാറില്‍ നിന്ന് 10 കിലോമീറ്റര്‍ ദൂരെ ലക്ഷ്മി എസ്റ്റേറ്റിലാണ് പ്ലസ് ടു വിദ്യാര്‍ത്ഥിനിയായ പെണ്‍കുട്ടിയുടെ വീട്. വീടിനു സമീപം മൊബൈലിനു റേഞ്ചില്ലാത്തതിനാല്‍ ബന്ധുവിന്റെ വീട്ടിലെത്തിയാണ് ഓണ്‍ലൈന്‍ ക്ലാസില്‍ പങ്കെടുത്തിരുന്നത്. അവിടേക്ക് പോകുന്നതിനായാണ് പെണ്‍കുട്ടി ഇന്നലെ ശിവകണ്ണന്റെ ജീപ്പില്‍ കയറിയത്. കുട്ടി മാത്രമാണ് ജീപ്പില്‍ ഉണ്ടായിരുന്നത്. തുടര്‍ന്നാണ് പീഡിപ്പിക്കാനുള്ള ശ്രമം നടത്തിയത്. കുട്ടി ബഹളം വച്ചതോടെ ഇയാള്‍ പിന്തിരിഞ്ഞു. പെണ്‍കുട്ടി ക്ലാസില്‍ പങ്കെടുക്കാതെ തിരിച്ച് വീട്ടിലെത്തി മാതാപിതാക്കളെ വിവരം അറിയിച്ചു. തുടര്‍ന്ന് മൊബൈല്‍ ലൊക്കേഷന്‍ നടത്തി നാലു മണിക്കൂറോളം തിരച്ചില്‍ നടത്തിയാണ് ശിവകണ്ണനെ കണ്ടെത്തിയത്.തേയിലത്തോട്ടത്തില്‍ ഒളിച്ചിരിക്കുകയായിരുന്നു ഇയാള്‍.