കോവിഡ് ; കേരളത്തിന് ആര്‍ ബി ഐ പ്രശംസ

കോവിഡ് പകര്‍ച്ചവ്യാധിയെ പ്രതിരോധിക്കുന്നതില്‍ കേരളത്തിന്റെ മികവിന് റിസര്‍വ്വ് ബാങ്കിന്റെ പ്രശംസ. സംസ്ഥാനങ്ങളുടെ ധനകാര്യത്തെക്കുറിച്ചുള്ള റിസര്‍വ്വ് ബാങ്കിന്റെ 2020-21 ലെ റിപ്പോര്‍ട്ടിലാണ് ''പ്രതിരോധത്തിന്റെ കേരള മോഡല്‍ തദ്ദേശഭരണ സ്ഥാപനങ്ങളുടെ പങ്ക്'' എന്ന തലക്കെട്ടില്‍ ഒന്നാംപേജ് ഇതിനായി നീക്കിവച്ചിട്ടുള്ളത്.
കോവിഡ് വ്യാപനത്തിന്റെ ഒന്നാംഘട്ടം ഏറ്റവും ഫലപ്രദമായി കൈകാര്യം ചെയ്തു. എന്നാല്‍ പുറത്തുനിന്നുള്ള പകര്‍ച്ചവ്യാധി പ്രദേശങ്ങളില്‍ നിന്ന് മലയാളികള്‍ തിരിച്ചുവന്നതുമായി ബന്ധപ്പെട്ട രണ്ടാംഘട്ടത്തില്‍ വ്യാപനം തടയാനായില്ല. ഇന്ന് സജീവകേസുകളുടെ കാര്യത്തില്‍ മൂന്നാംസ്ഥാനം കേരളത്തിനാണ്. എന്നാല്‍ ഫലപ്രദമായ ആതുരശുശ്രൂഷയിലൂടെ മരണനിരക്ക് താഴ്ത്തിനിര്‍ത്തുന്നതില്‍ വിജയിച്ചിട്ടുണ്ട്. കേരളത്തിന്റെ മരണനിരക്ക് 0.3 ശതമാനമായിരിക്കുമ്പോള്‍ അഖിലേന്ത്യാ ശരാശരി 1.5 ശതമാനമാണ്. കോവിഡ് ഫസ്റ്റ്‌ലൈന്‍ ട്രീറ്റ്‌മെന്റ് സെന്ററുകള്‍ ഫലപ്രദമായി പ്രവര്‍ത്തിക്കുന്നതും കേരളത്തിലാണ്. ഇവയടക്കം കേരളം സ്വീകരിച്ചിരിക്കുന്ന നടപടികള്‍ റിപ്പോര്‍ട്ടില്‍ പരാമര്‍ശിക്കുന്നു.
ഈ പ്രതിരോധത്തില്‍ തുടക്കം മുതല്‍ തദ്ദേശസ്വയംഭരണ സ്ഥാപനങ്ങള്‍ വഹിച്ച പങ്കിനെ റിപ്പോര്‍ട്ടില്‍ സവിസ്തരം പ്രതിപാദിക്കുന്നുണ്ട്. പ്രാദേശിക സര്‍ക്കാരുകളെ ശാക്തീകരിക്കുന്നതിന് രണ്ടുപതിറ്റാണ്ടിലേറെയായി കേരളം സ്വീകരിച്ചുവരുന്ന നടപടികളുടെ ഫലമാണിത്. 2020-21ല്‍ സംസ്ഥാനത്തെ പ്രതീക്ഷിത സ്വന്തം നികുതി വരുമാനത്തിന്റെ (ബജറ്റ് എസ്റ്റിമേറ്റിന്റെ) 17.4 ശതമാനം കേരള സര്‍ക്കാര്‍ പ്രാദേശിക സര്‍ക്കാരുകള്‍ക്ക് നല്‍കുന്നുണ്ട്. ഇന്ത്യയില്‍ ഈ തോത് 12.3 ശതമാനമേ വരുന്നുള്ളൂ. സംസ്ഥാനത്തിന്റെ മൊത്തം വരുമാനമായി കണക്കാക്കിയാല്‍ കേരളം 10.3 ശതമാനം കീഴോട്ട് നല്‍കുന്നു. അഖിലേന്ത്യാ ശരാശരി 5.3 ശതമാനം മാത്രമാണ്.
ആദ്യമായിട്ടാണ് റിസര്‍വ്വ് ബാങ്കിന്റെ വാര്‍ഷിക റിപ്പോര്‍ട്ടില്‍ തദ്ദേശഭരണ സ്ഥാപനങ്ങളെക്കുറിച്ച് പ്രത്യേക സെക്ഷന്‍ ഉള്‍ക്കൊള്ളിക്കുന്നത്.
ഇതിനു പ്രേരണയായത് കേരളത്തിന്റെ അനുഭവമാണ്. ഇതടക്കം കോവിഡ് പകര്‍ച്ചവ്യാധി വിവിധ സംസ്ഥാനങ്ങളെ എങ്ങനെ വ്യത്യസ്തമായി ബാധിച്ചൂവെന്നതു സംബന്ധിച്ച് പഠനം ഈ റിപ്പോര്‍ട്ടിലുണ്ട് (അധ്യായം 3).