കള്ളപ്പണകേസിലെ അറസ്റ്റ് നിർണ്ണായകം

കള്ളപ്പണം വെളുപ്പിക്കാൻ കൂട്ടുനിന്ന കേസിൽ മുൻ ഐടി സെക്രട്ടറി അറസ്റ്റിലാകുമ്പോൾ നനി തെളിയാനുള്ളത് സ്വർണകടത്തിന്റെ രഹസ്യങ്ങൾ. ഇഡിയുടെ കേസിലെ അറസ്റ്റ് രാഷ്ട്രീയ ഭൂകമ്പം സ്ൃഷ്ടിക്കുന്നുണ്ടെങ്കിലും പ്രധാന കേസിലേക്ക് വഴിതുറക്കുന്ന തെളിവുകൾ ഒന്നും ഇതുവരെ ലഭിച്ചിട്ടില്ലന്നാണ് ഇന്നു വരെ പുറത്തുവന്ന വിവരങ്ങൾ നൽകുന്ന സൂചന.
ശിവശങ്കറിനെ കോടതിയിൽ ഹാജരാക്കുമ്പോൾ പതിവ് ആരോപണങ്ങൾക്കപ്പുറം കേസിലെ ഇടപെടൽ വ്യക്തമാക്കുന്ന തെളിവുകൾ അന്വേഷണ സംഘം ഹാജരാക്കുമോ എന്നുള്ളതാണ് എല്ലാവരും കാത്തിരിക്കുന്നത്. ഇപ്പോൾ
കള്ളപ്പണം വെളുപ്പിച്ചതിനും ബിനാമി ഇടപാടിനും ആണ് ശിവശങ്കർ അറസ്റ്റിലായത്.
ഇക്കാര്യത്തിൽ മൊഴികൾക്കപ്പുറമുള്ള തെളിവുകൾ ഹാജരാക്കിയാൽ മാത്രമേ കേസിൽ ശിക്ഷിക്കപ്പെടാൻ സാധ്യതയുള്ളൂ.
കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) 7 വർഷം വരെ തടവുശിക്ഷ ലഭിക്കാവുന്ന വകുപ്പാണു ചുമത്തിയിരിക്കുന്നത്. ഇത്തരമൊരു കേസിൽ മുതിർന്ന ഐഎഎസ് ഉദ്യോഗസ്ഥൻ അറസ്റ്റിലാകുന്നത് സംസ്ഥാന സിവിൽ സർവീസ് ചരിത്രത്തിൽ ആദ്യമാണ്. ശിവശങ്കറിനെ ഇന്ന് എറണാകുളം പ്രിൻസിപ്പൽ സെഷൻസ് കോടതിയിൽ ഹാജരാക്കും.

സ്വർണക്കടത്തു കേസ് പ്രതി സ്വപ്ന സുരേഷിനു കള്ളപ്പണം ബാങ്ക് ലോക്കറിൽ സൂക്ഷിക്കാൻ സൗകര്യം ഒരുക്കിയതു സംബന്ധിച്ച് അസി.ഡയറക്ടർ പി.രാധാകൃഷ്ണന്റെ നേതൃത്വത്തിൽ നടത്തിയ ചോദ്യംചെയ്യലിൽ കസ്റ്റംസ് ഉദ്യോഗസ്ഥരും സന്നിഹിതരായിരുന്നു. ഇഡി സ്‌പെഷൽ ഡയറക്ടർ പി.സുശീൽകുമാർ, ജോയിന്റ് ഡയറക്ടർ ഗണേഷ്‌കുമാർ എന്നിവരും കൊച്ചിയിലെത്തിയിരുന്നു. സ്‌പെഷൽ പ്രോസിക്യൂട്ടർ ടി.എ. ഉണ്ണികൃഷ്ണനും ഇഡി ഓഫിസിലെത്തി.

വിദേശത്തേക്കു ഡോളർ കടത്താൻ സ്വപ്നയെ സഹായിച്ചെന്ന കേസിൽ ഇനി കസ്റ്റംസും ശിവശങ്കറെ ചോദ്യം ചെയ്യും. ഈ കേസിൽ ചോദ്യം ചെയ്യാൻ 16നു കസ്റ്റംസ് കസ്റ്റഡിയിലെടുത്തപ്പോഴാണു ശിവശങ്കർ വൈദ്യസഹായം ആവശ്യപ്പെട്ടതും തിരുവനന്തപുരത്തെ സ്വകാര്യ ആശുപത്രിയിലും മെഡിക്കൽ കോളജിലും ചികിത്സ തേടിയതും.
എന്നാൽ അന്വേഷണം തുടങ്ങിയ സ്വർണകടത്ത് കേസിൽ ഇതുവരെ കാര്യമായ കണ്ടത്തലുകൾ ഒന്നും പുറത്തുവന്നിട്ടില്ല. ദുബായിൽ നിന്ന് സ്വർണം അയച്ചു എന്നു പറയുന്ന വ്യക്തിയെ ഇതുവരെ പിടികൂടിയിട്ടില്ല. കേസിൽ ശിവശങ്കർ കസ്റ്റംസിനെ വിളിച്ചു എന്നാണ് ഇഡി പറയുന്നത്. എന്നാൽ ഇതേ കേസ് അന്വേഷിക്കുന്ന എൻ ഐ എ ഇക്കാര്യം ഇതുവരെ കോടതിയിൽ പറഞ്ഞിട്ടില്ല എന്നതും കേസിനെ കൂടുതൽ ദുരൂഹമാക്കുന്നു.