സംവരണ വിരുദ്ധസമരം മലക്കം മറിഞ്ഞ് വെള്ളാപ്പള്ളി , കാര്യം പിടികിട്ടാതെ അണികൾ

പിണറായി സർക്കാരിന്റെ മുന്നോക്ക സംവരണത്തിനെതിരെ സമരം പ്രഖ്യാപിച്ച വെള്ളാപ്പള്ളി നടേശൻ രാത്രി ഇരുട്ടി വെളുക്കുമുൻപേ വീണ്ടും നിലപാട് മാറ്റി. യോഗം തിരഞ്ഞെടുപ്പ് അടുത്തു നിൽക്കുന്ന ഘട്ടത്തിൽ സി പി എം വിരുദ്ധതയുമായി ഇറങ്ങിത്തിരിച്ചാൽ പണികിട്ടും എന്ന സൂചനകൾ കൊണ്ടാണ് വെള്ളാപ്പള്ളി നിലപാട് മാറിയതെന്ന് സൂചനയുണ്ട്.
ഉമ്മൻചാണ്ടിവഴി യു ഡി എഫിലക്ക് അടുക്കാൻ നടത്തിയ ശ്രമങ്ങളുടെ ഭാഗമായിട്ടായിരുന്നു വെള്ളാപ്പള്ളി സംവരണത്തിനെതിരെ രംഗത്തു വന്നത്. എന്നാൽ മുന്നണി പ്രവേശന കാര്യത്തിൽ ഉമ്മൻചാണ്ടിയിൽ നിന്ന് അനുകൂല തീരുമാനം ഒന്നും വന്നില്ല അതാണോ നിലപാട് മാറ്റത്തിന് കാരണം എന്നു വ്യക്തമല്ല.
പൊതു മെരിറ്റിലെ അമ്പതു ശതമാനത്തിൽ നിന്നാണ് മുന്നാക്കക്കാരിലെ പിന്നാക്കക്കാർക്ക് പത്തുശതമാനം സംവരണം നൽകുന്നതെങ്കിൽ എതിർക്കില്ലെന്ന് എസ് എൻ ഡിപി ഇപ്പോൾ വ്യക്തമാക്കുന്നത്. ഇതിനു മുൻപ് സംവരണ പ്രശ്‌നത്തിൽ സുപ്രീം കോടതിയിൽ നൽകിയ കേസിൽ നിന്ന് വെള്ളാപ്പള്ളി പിൻമാറിയത് സമുദായത്തിൽ കടുത്ത പ്രതിഷേധം ഉയർത്തിരുന്നു. അന്ന് മകന്റെ ബിജെപി ബാന്ധവത്തിനുവേണ്ടിയായിരുന്നു ആ തീരുമാനങ്ങൾ. ഇപ്പോഴത്തെ പുതിയ ലക്ഷ്യം ബിഡിജൈസ് നേതാക്കൾക്കോ എസ് , എൻ ഡി പി യോഗം നേതാക്കൾക്കോ പിടി കിട്ടിയിട്ടില്ല.

മുന്നാക്കസംവരണവിഷയത്തിൽ മുസ്ലിംസംഘടനകളുമായിച്ചേർന്നുള്ള സമരം ഇപ്പോൾ പരിഗണനയിലില്ലെന്ന് എസ്.എൻ.ഡി.പി. യോഗം അറിയിച്ചു. ഇരുകൂട്ടരും മുന്നാക്കസംവരണത്തിനെതിരാണെങ്കിലും അടുത്തകാലത്തായി മുസ്ലിംലീഗ് എടുത്ത പലനിലപാടുകളോടും യോഗത്തിനു യോജിപ്പില്ല. യു.ഡി.എഫിൽ ലീഗിനാണ് മുൻകൈയെന്നും യോഗം കരുതുന്നു. ശ്രീനാരായണഗുരു ഓപ്പൺ സർവകലാശാല വൈസ് ചാൻസലറായി ഡോ. പി.എം. മുബാറക് പാഷയെ നിയമിച്ചതിനെ വെള്ളാപ്പള്ളി നടേശൻ വിമർശിച്ചിരുന്നു. ഇതിനെതിരേ ലീഗ് മുഖപത്രം അതിരൂക്ഷമായാണ് പ്രതികരിച്ചത്. 'മുസ്ലിം പേരിനോട് ഓക്കാനമോ' എന്ന തലക്കെട്ടിലായിരുന്നു മുഖപ്രസംഗം. സംഘപരിവാറിന്റെ അന്ധമായ ന്യൂനപക്ഷവിരുദ്ധതയാണ് വെള്ളാപ്പള്ളിയുടെ പ്രസ്താവനയ്ക്കുപിന്നിലെന്നായിരുന്നു ആക്ഷേപം.

യോജിച്ചുള്ള പ്രക്ഷോഭം സംബന്ധിച്ച് മുസ്ലിംസംഘടനാ നേതാക്കളാരും ബന്ധപ്പെട്ടിട്ടില്ലെന്ന് വെള്ളാപ്പള്ളി നടേശൻ മാധ്യമങ്ങളോട് പറഞ്ഞു. വിവിധ മുസ്ലിം സംഘടനകൾ യോഗംചേരുന്നകാര്യം മാധ്യമങ്ങളിലൂടെയാണ് അറിഞ്ഞത്. വിവാഹപ്രായം കൂട്ടുന്നതിലും ചില മുസ്ലിം സംഘടനകൾക്ക് എതിർപ്പുള്ളതായറിഞ്ഞു. അത് എസ്.എൻ.ഡി.പി. യോഗത്തിന്റെ അജൻഡയിലില്ലാത്ത വിഷയമാണന്നും അദ്ദേഹം വ്യക്തമാക്കി.