ഷാജിക്ക് കെണിയാകുമോ ഇഡി യുടെ നീക്കങ്ങള്‍

കോഴപ്പണകേസ് അന്വേഷിക്കുന്ന ഇഡി കെ എം ഷാജി എം എല്‍ എ യുടെ വീടിന്റെ അളവ് എടുത്തത് അദ്ദേഹത്തിന് കുടുക്കാകുമെന്ന് സൂചന.
വീടിന്‌കോടികള്‍ വിലയിട്ട് അത് നിര്‍മ്മിക്കാനുള്ള വരുമാനമാണ് ഇഡി ഇപ്പോള്‍ തേടുന്നതെന്നാണ് പുറത്തുവരുന്ന വിവരം.
മൂന്നരക്കോടി രൂപയുടെ വീട് നിര്‍മിക്കാനുള്ള സാമ്പത്തിക സ്രോതസ്സ് എന്തെന്നുള്‍പ്പെടെയുള്ള വിവരങ്ങളാണ് ഇഡി തേടുന്നത്. ഷാജിയുടെ ഭാര്യ ആശാ ഷാജിക്കും ചോദ്യംചെയ്യലിന് ഹാജരാകാന്‍ ഇഡി നോട്ടീസ് നല്‍കിയിട്ടുണ്ട്.

കോഴപ്പണം വീട് നിര്‍മാണത്തിന് ഉപയോഗിച്ചിട്ടുണ്ടെന്ന് നേരത്തെ ആക്ഷേപമുണ്ടായിരുന്നു. ഇത് ഇഡി വിശദമായി പരിശോധിക്കും. ഇതിന് മുന്‍പ് നല്‍കിയ ആദായ നികുതി സ്ലഖകളും ഇഡി പരിശോധിച്ചതായിട്ടാണ് വിവരം.
2014ലാണ് അഴീക്കോട് ഹൈസ്‌കൂളില്‍ പ്ലസ്ടു അനുവദിക്കാന്‍ കോഴ വാങ്ങിയെന്ന ആക്ഷേപമുയരുന്നത്. ഇതേ സമയത്താണ് കോഴിക്കോട് വേങ്ങേരിയില്‍ ഷാജി വീടുണ്ടാക്കാന്‍ തുടങ്ങിയത്. കോഴപ്പണവും വീട് നിര്‍മാണവും മുസ്ലിംലീഗില്‍ അക്കാലം മുതല്‍ ചര്‍ച്ചയായിരുന്നു. കോഴക്കേസ് ഇഡി ഏറ്റെടുത്തതോടെയാണ് വീട് നിര്‍മാണത്തില്‍ സ്രോതസ്സില്ലാത്ത പണം ഉപയോഗിച്ചിട്ടുണ്ടോയെന്ന് അന്വേഷണം തുടങ്ങിയത്. എപ്പോള്‍ സ്ഥലം വാങ്ങി, നിര്‍മാണം ആരംഭിച്ചത് എപ്പോള്‍, എത്ര തുക ചെലവിട്ടു തുടങ്ങിയ വിവരങ്ങളാണ് പ്രധാനമായും തേടുന്നത്. വിവരങ്ങള്‍ കൈമാറാന്‍ ഇഡി കോഴിക്കോട് കോര്‍പറേഷന് നിര്‍ദേശം നല്‍കി. ഇതനുസരിച്ചാണ് കോര്‍പറേഷന്‍ അധികൃതര്‍ വ്യാഴാഴ്ച പരിശോധനക്കെത്തിയത്. പിന്നാലെ ഇഡി ഉദ്യോഗസ്ഥരും വീട്ടിലെത്തി. ഈ സമയം ഷാജിയും ഭാര്യയും വീട്ടിലില്ലായിരുന്നു.

മുസ്ലിംലീഗ് സംസ്ഥാന സെക്രട്ടറി കെ എം ഷാജി എംഎല്‍എ ഭാര്യയുടെ പേരില്‍ നിര്‍മിച്ച ആഡംബര വീടിന്റെ മറവില്‍ ലക്ഷങ്ങള്‍ നികുതി വെട്ടിച്ചതായി ആക്ഷേപം മുണ്ട്. കോഴിക്കോട് വേങ്ങേരിയിലെ വീടിന്റെ നികുതിയാണ് ഇതുവരെ അടയ്ക്കാത്തത്. നിര്‍മാണ ചട്ടങ്ങള്‍ ലംഘിച്ചതായും രേഖകള്‍ വ്യക്തമാക്കുന്നു. ഇഡി നിര്‍ദേശപ്രകാരം കോര്‍പറേഷന്‍ അധികൃതര്‍ വ്യാഴാഴ്ച നടത്തിയ പരിശോധനയിലും ചട്ടലംഘനവും നികുതിവെട്ടിപ്പും കണ്ടെത്തിയത്.

2016ലാണ് വീട് നിര്‍മാണം പൂര്‍ത്തിയായത്. 3000 ചതുരശ്ര അടിയില്‍ താഴെയുള്ള വീടിനാണ് അനുമതി വാങ്ങിയത്. എന്നാല്‍ 5260 ചതുരശ്ര അടി വലിപ്പത്തിലാണ് വീട് നിര്‍മിച്ചത്. 3000ല്‍ കൂടുതലുള്ളവയ്ക്ക് ആഡംബര നികുതി അടയ്ക്കണമെന്നിരിക്കെയാണ് എംഎല്‍എ നാലുവര്‍ഷമായി വെട്ടിപ്പ് തുടരുന്നത്. രണ്ട് നില വീടിന് നല്‍കിയ അനുമതിയില്‍ മൂന്ന് നില വീട് നിര്‍മിച്ചതായും കണ്ടെത്തി. 2016ല്‍ വില്ലേജ് ഓഫീസര്‍ അളന്നപ്പോഴാണ് വീട്ടിന്റെ യഥാര്‍ഥ വലിപ്പം വ്യക്തമായത്. തുടര്‍ന്ന് ആഡംബര നികുതിയൊടുക്കാന്‍ 2016 നവംബര്‍ 30ന് തഹസില്‍ദാര്‍ നോട്ടീസ് നല്‍കിയിരുന്നു. അത് ലംഘിച്ചാണ് ഈ നികുതി വെട്ടിപ്പ്. കൂടാതെ അനുമതി ലഭിച്ചാല്‍ മൂന്ന് വര്‍ഷത്തിനകം നിര്‍മാണം പൂര്‍ത്തിയാക്കി കംപ്ലീഷന്‍ സര്‍ട്ടിഫിക്കറ്റ് നല്‍കണമെന്ന ചട്ടവും കെ എം ഷാജി കാറ്റില്‍ പറത്തി.

മാനേജ്മെന്റ് പ്രതിനിധികളെ ഇഡി ചോദ്യംചെയ്തു
കെ എം ഷാജി എംഎല്‍എ ഉള്‍പ്പെട്ട പ്ലസ്ടു കോഴക്കേസില്‍ സ്‌കൂള്‍ മാനേജ്‌മെന്റ് പ്രതിനിധികളെ ഇഡി ചോദ്യംചെയ്തു. അഴീക്കോട് ഹയര്‍ സെക്കന്‍ഡറി സ്‌കൂള്‍ മുന്‍ മാനേജര്‍ പി വി പത്മനാഭന്‍, ഡയറക്ടര്‍ ബോര്‍ഡ് അംഗം റഫീഖ് എന്നിവരെയാണ് വ്യാഴാഴ്ച ചോദ്യംചെയ്തത്.

അഴീക്കോട് ഹൈസ്‌കൂളില്‍ പ്ലസ്ടു അനുവദിക്കാന്‍ ഷാജിക്ക് 25 ലക്ഷം രൂപ കോഴ നല്‍കിയെന്ന് മാനേജ്‌മെന്റ് റിപ്പോര്‍ട്ടിലുണ്ടായിരുന്നു. എന്നാല്‍ കോഴവിവരം പുറത്തായതോടെ ഇക്കാര്യം നിഷേധിക്കുകയായിരുന്നു. ഇതുസംബന്ധിച്ച വിശദാംശങ്ങളാണ് ഇഡി തേടിയത്.