ഇടതുപക്ഷത്ത് ഇനി ലയനകാലം

കേരള കോണ്‍ഗ്രസ് മാണിവിഭാഗം ഇടതുപക്ഷത്തേക്ക് എത്തിയതോടെ ഇനി മുന്നണിയില്‍ ലയന കാലം .
കേരള കോണ്‍ഗ്രസ് (ബി), ജനാധിപത്യ കേരള കോണ്‍ഗ്രസ്, കേരള കോണ്‍ഗ്രസ് (സ്‌കറിയ തോമസ് വിഭാഗം) എന്നിവയാണ് എല്‍ഡിഎഫിലെ മറ്റു കേരള കോണ്‍ഗ്രസുകള്‍.
ഈ കേരള കോണ്‍ഗ്രസുകളിലെ ഏക എംഎല്‍എ കേരള കോണ്‍ഗ്രസ്- ബിയിലെ കെ.ബി. ഗണേഷ് കുമാറാണ്. മന്ത്രിസ്ഥാനം അനുവദിക്കാത്ത ആ പാര്‍ട്ടിക്ക് മുന്നോക്ക സമുദായ കോര്‍പ്പറേഷന്‍ അധ്യക്ഷ സ്ഥാനത്തിന് ക്യാബിനറ്റ് പദവി കൊണ്ട് തൃപ്തിപ്പെടേണ്ടി വന്നു.

ഈ മൂന്നു കേരള കോണ്‍ഗ്രസുകള്‍ ഇങ്ങനെ തുടരുന്നതില്‍ സിപിഎമ്മിന് താല്പര്യമില്ല. അതില്‍ ജനാധിപത്യ കേരളാ കോണ്‍ഗ്രസിലും സ്‌കറിയ തോമസ് വിഭാഗത്തിലും പിളര്‍പ്പുണ്ടായതില്‍ സിപിഎം അസംതൃപ്തി പ്രകടിപ്പിക്കുകയും ചെയ്തിരുന്നു. കേരള കോണ്‍ഗ്രസുകളുടെ ലയനത്തിനോ, മുന്നണിയിലെ മറ്റേതെങ്കിലും കക്ഷികളില്‍ ലയിക്കുന്നതിനോ സാധ്യതയുണ്ട്.

എല്‍ജെപിയും ജനതാദള്‍ - എസും തമ്മിലുള്ള ലയനം വൈകാതെ ഉണ്ടാകും. എല്‍ജെപിക്ക് നിലവില്‍ എംഎല്‍എമാരില്ല. എന്നാല്‍ ജനതാദള്‍ എസിന് ഒരു മന്ത്രി ഉള്‍പ്പെടെ മൂന്ന് എംഎല്‍എമാരുണ്ട്. സ്ഥാനങ്ങള്‍ സംബന്ധിച്ച തര്‍ക്കമായിരുന്നു ലയനം നീളാന്‍ കാരണം. ഇതു സംബന്ധിച്ച് ഏകദേശ ധാരണയായിട്ടുണ്ട്. ഈയാഴ്ച രണ്ടു പാര്‍ട്ടികളിലേയും നേതാക്കള്‍ ചര്‍ച്ച നടത്താന്‍ തീരുമാനിച്ചിട്ടുണ്ട്.

ആര്‍എസ്പി (ലെനിനിസ്റ്റ്) വിഭാഗത്തിന് മുന്നണി പ്രവേശനം അഭ്യര്‍ഥിച്ച് കോവൂര്‍ കുഞ്ഞുമോന്‍ എംഎല്‍എ കത്തുനല്‍കിയിട്ടുണ്ട്. കുഞ്ഞുമോനും ഏതെങ്കിലും പാര്‍ട്ടിയില്‍ ലയിക്കണമെന്നാണ് സിപിഎം സി പി ഐ താത്പര്യം. നിലവില്‍ കുഞ്ഞുമോന്റെ പാര്‍ട്ടിക്ക് എല്‍ഡിഎഫ് അംഗത്വം എളുപ്പമല്ല. അതിനാല്‍ ഒരു പക്ഷെ അവരും ലയനത്തിന് ക്കരുങ്ങും.