ജോസഫ് ഗ്രൂപ്പില്‍ അടിതുടങ്ങി കനിവ് തേടി മാണിഗ്രൂപ്പ് വിട്ടവര്‍

കോണ്‍ഗ്രസില്‍ നിന്ന് വലിയ പരിഗണന കിട്ടും എന്നു കരുതി പി ജെ ജോസഫിനൊപ്പം പോയ പ്രാദേശിക നേതാക്കളും മുതിര്‍ന്ന നേതാക്കളും ജോസ് കെ മാണിക്കൊപ്പം മടങ്ങിയെത്താന്‍ ശ്രമം തുടങ്ങി.
ജനാധിപത്യ കേരള കോണ്‍ഗ്രസില്‍ എങ്കിലും കയറിപറ്റാന്‍ പറ്റുമോ എന്ന ശ്രമത്തിലാണ് ഇവര്‍. നിലവില്‍ നിയമസഭയില്‍ പരമാവധി ഏഴു സീറ്റ് വരെ മാത്രമേ ജോസഫ് വിഭാഗത്തിന് നല്‍കൂ എന്ന് സൂചന നല്‍കിയിട്ടുണ്ട്. ഇതില്‍ പൂഞ്ഞാര്‍ സീറ്റില്‍ മുസ്‌ളീം ലീഗ് അവകാശവാദം ഉന്നിയിച്ചിട്ടുണ്ട്. അങ്ങനെ സംഭവിച്ചാല്‍ സീറ്റ് ആറാകും.
തൊടുപുഴയില്‍ മകന്‍ അപ്പുവിനെ സ്ഥാനാര്‍ത്ഥിയാക്കി മറ്റൊരു സുരക്ഷിത മണ്ഡലം പിജെ ജോസഫും ആഗ്രഹിക്കുന്നു. ഫ്രാന്‍സിസ് ജോര്‍ജ്, ജോണി നെല്ലൂര്‍, വിക്ടര്‍ ടി തോമസ്, സജി മഞ്ഞക്കടമ്പന്‍, ജോസഫ് എം പുതുശ്ശേരി എന്നിവര്‍ക്ക് പോലും സീറ്റ് ഉറപ്പില്ലാത്ത അവസ്ഥ.
Fന്നാല്‍ മറുവശത്ത് 10 മുതല്‍ 12 സീറ്റുവരെ ജോസ് കെ മാണി വിഭാഗത്തിന് ലഭിച്ചേക്കും. രാജ്യസഭ അവര്‍ക്ക് തന്നെ ആണെങ്കില്‍ സീറ്റ് 9 ലോ പത്തിലോ ഒതുങ്ങിയേക്കും. എന്നാല്‍ ഇതിനിടെ മുന്നണി സ്ഥിരം നഷ്ടപ്പെടുത്തുന്ന ചില കോണ്‍ഗ്രസ് സീറ്റുകള്‍ ഇവര്‍ക്ക് നല്‍കാന്‍ സാധ്യതയുണ്ടെന്ന് സൂചനകള്‍ വന്നുകഴിഞ്ഞു അങ്ങനെ ആണെങ്കില്‍ 15 സീറ്റുവരെ കിട്ടാന്‍ സാധ്യതയുണ്ട്. ഇത് മനസ്സിലാക്കിയതോടെയാണ് ജോസഫിനൊപ്പം പോയ നേതാക്കള്‍ക്ക് നെഞ്ചിടിപ്പ് കൂടിയത്.

കഴിഞ്ഞ തവണ മത്സരിച്ച തദ്ദേശ, നിയമസഭ സീറ്റുകള്‍ വേണമെന്നാണ് ജോസഫ് ആവശ്യപ്പെടുന്നത്. ഇത് കോണ്‍ഗ്രസ് അംഗീകരിക്കില്ല. ഇടതുമുന്നണി സഹകരണം പ്രഖ്യാപിച്ച ജോസ് കെ. മാണി പക്ഷവും തദ്ദേശ തെരഞ്ഞെടുപ്പില്‍ ശക്തി തെളിയിക്കാനുള്ള ശ്രമത്തിലാണ്. പരമാവധി തദ്ദേശ സീറ്റുകളില്‍ മത്സരിക്കാനുള്ള ശ്രമത്തിലാണ് സിപിഎമ്മുമായി ചര്‍ച്ച നടത്തിയിട്ടുള്ളത്. മധ്യകേരളത്തിലെ കേരള കോണ്‍ഗ്രസ് ശക്തികേന്ദ്രങ്ങളില്‍ ജോസ് പക്ഷത്തിന് പരമാവധി സീറ്റ് നല്‍കാന്‍ സിപിഎമ്മും ഉദാരമനസ്‌കത കാട്ടുന്നുണ്ട്.

ഇതിനെല്ലാം കാരണം വിവിധ ജില്ലാ കമ്മറ്റികള്‍ നല്‍കിയ റിപ്പോര്‍ട്ടാണ്. ജോസ് കെ മാണി ഇടതു പക്ഷത്തേക്ക് വരാന്‍ താല്‍പ്പര്യം അറിയച്ചപ്പോള്‍ തന്നെ എല്ലാ ജില്ലാ കമ്മറ്റികളോടും അവരുടെ സ്വാധീനത്തെ കുറിച്ച് വിശദ റിപ്പോര്‍ട്ട് നല്‍കാന്‍ സിപിഎം സംസ്ഥാന നേതൃത്വം ആവശ്യപ്പെട്ടു. കോട്ടയത്തേയും പത്തനംതിട്ടയിലേയും ഇടുക്കിയിലേയും എറണാകുളത്തേയും കമ്മറ്റിയുടെ റിപ്പോര്‍ട്ട് ജോസ് കെ മാണിയുടെ കരുത്തിന് തെളിവായിരുന്നു. തദ്ദേശ തെരഞ്ഞെടുപ്പിലും നിയമസഭാ തെരഞ്ഞെടുപ്പിലും തൂത്തു വാരലിന് ജോസ് കെ മാണിയുടെ കൂട്ടുകെട്ടിലൂടെ കഴിയുമെന്നായിരുന്നു റിപ്പോര്‍ട്ട്. കോഴിക്കോട്ടേയും കണ്ണൂരിലേയും വയനാട്ടിലേയും മലപ്പുറത്തേയും കാസര്‍കോട്ടേയും മലയാര മേഖലയിലും വോട്ട് നന്നായി കേരളാ കോണ്‍ഗ്രസിനുണ്ട്. ഇതിനൊപ്പം തൃശൂരിലും വോട്ടുണ്ടെന്ന റിപ്പോര്‍ട്ട് കിട്ടി.