പരാതിപ്രവാഹം മുരളീധരന് പിടിവള്ളി നഷ്ടമാവുന്നു

ബിജെപിയില്‍ ആധിപത്യം പിടിച്ചെടുത്ത മുരളീധരപക്ഷത്തിന് പുതിയ സാഹചര്യത്തില്‍ പിടിവള്ളി നഷ്ടമാവുന്നു. മഹിളാമോര്‍ച്ച നേതാവുമായി ബന്ധപ്പെട്ട വിവാദത്തിന് പുറമെ ആര്‍ എസ് എസിന്റെ അപ്രീതിയുമാണ് നിലവിലെ പ്രതിസന്ധി.
കഴിഞ്ഞ മുൂന്നുമാസത്തെ പ്രവര്‍ത്തന മികവുകൊണ്ട് കെ സുരേന്ദന്‍ അമിത്ഷാ, മോദി സംഘത്തിന് പ്രിയപ്പെട്ടവനായി. അതോടെ മുരളിക്ക് അവിടെയും പിടിവള്ളി കുറഞ്ഞു.
ഏറ്റവും ഒടുവില്‍ സ്മിതാ മേനോന്‍ വിവാദം മുരളിയെ കൂടുതല്‍ പ്രതിരോധത്തില്‍ ആക്കിയിരിക്കുകയാണ്. സ്വര്‍ണകടത്ത് കേസിലെ ചിലരുമായി കേന്ദ്രമന്ത്രിക്ക് സൗഹൃദങ്ങളുണ്ടെന്ന് സി പി എം ആരോപണം ഉന്നയിക്കുന്നുണ്ട്.
ഇതിനിടെ ബിജെപി ദേശീയ ജനറല്‍ സെക്രട്ടറി സ്ഥാനത്തേക്ക് പരിഗണിച്ച ആര്‍ ബാലശങ്കറിനെ തഴഞ്ഞതിന് പിന്നില്‍ കേന്ദ്രസഹമന്ത്രി വി മുരളീധരനെന്ന പരാതിയുമായി ആര്‍എസ്എസ്. കുമ്മനം രാജശേഖരന്‍, ശോഭ സുരേന്ദ്രന്‍ എന്നിവരെ വെട്ടിയതിനൊപ്പമാണ് മുരളീധരപക്ഷം ബാലശങ്കറിനെയും ഒഴിവാക്കിയത്. സംഘടനാ ജനറല്‍ സെക്രട്ടറി ബി എല്‍ സന്തോഷിനെ ഉപയോഗിച്ച് മുരളീധരന്‍ ഒതുക്കുന്നുവെന്നാണ് ആര്‍എസ്എസ് നേതൃത്വത്തിന്റെ ആക്ഷേപം. കൊച്ചിയില്‍ കഴിഞ്ഞയാഴ്ച ചേര്‍ന്ന ആര്‍എസ്എസ് നേതൃയോഗത്തില്‍ പുനഃസംഘടനയിലുള്ള എതിര്‍പ്പ് മേല്‍ത്തട്ടില്‍ അറിയിക്കാനും തീരുമാനിച്ചിട്ടുണ്ട്.

ബിജെപി ദേശീയ വൈസ് പ്രസിഡന്റായി നിയമിതനായ എ പി അബ്ദുള്ളക്കുട്ടിയും വക്താവ് ടോം വടക്കനും മുരളീധരന്റെ നോമിനികളാണെന്നും ഇവര്‍ കുറ്റപ്പെടുത്തുന്നു. ആര്‍എസ്എസിന്റെ ബുദ്ധികേന്ദ്രമായറിയപ്പെടുന്ന മലയാളിയായ ആര്‍ ബാലശങ്കര്‍ വര്‍ഷങ്ങളായി ഡല്‍ഹി കേന്ദ്രീകരിച്ചാണ് പ്രവര്‍ത്തനം. മുരളീധരന്‍ ഗ്രൂപ്പിന്റെ സംരക്ഷകനായാണ് സംഘടനാ ജനറല്‍ സെക്രട്ടറി ബി എല്‍ സന്തോഷിന്റെ പ്രവര്‍ത്തനമെന്ന് ബിജെപി ദേശീയ നിര്‍വാഹകസമിതി അംഗം പി കെ കൃഷ്ണദാസിന്റെ നേതൃത്വത്തിലുള്ള പക്ഷം കുറച്ചുകാലമായി കുറ്റപ്പെടുത്തുന്നുണ്ട്. ഈ വാദം ശരിവച്ചാണ് ആര്‍എസ്എസിലെ പ്രമുഖരും പരാതിയുമായി എത്തിയത്.