ഇടുക്കിയില്‍ കോണ്‍ഗ്രസ് നേതാക്കളുടെ പ്രളയഫണ്ട് തട്ടിപ്പ്

ഇടുക്കി കൊന്നത്തടി പഞ്ചായത്തിലെ പ്രളയഫണ്ട് തട്ടിപ്പില്‍ കൂടുതല്‍ നടപടികളുമായി കലക്ടര്‍ എച്ച് ദിനേശന്‍. സര്‍ക്കാര്‍ പണം തട്ടിയെടുത്ത നാല് യുഡിഎഫ് നേതാക്കള്‍ നവംബര്‍ 30നകം പണം തിരിച്ചടയ്ക്കണമെന്ന് ജില്ലാഭരണം നോട്ടീസ് നല്‍കി.
മുന്‍ പഞ്ചായത്ത് പ്രസിഡന്റും മഹിളാ കോണ്‍ഗ്രസ് നേതാവുമായ മേഴ്‌സി ജോസഫ് മ്ലാക്കുഴി നടത്തിയ ആറുലക്ഷം രൂപയുടെ തട്ടിപ്പ് ആദ്യഘട്ട അന്വേഷണത്തില്‍ കണ്ടെത്തിയിരുന്നു. ഭര്‍ത്താവിന്റെ പേരില്‍ പട്ടയസ്ഥലം ഉണ്ടെന്ന വിവരം മറച്ചുവച്ച് ഭൂമി നഷ്ടപ്പെട്ടതായി വ്യാജരേഖയുണ്ടാക്കിയാണ് ഇവര്‍ തുക തട്ടിയെടുത്തത്. മേഴ്‌സി ജോസഫ് കഴിഞ്ഞദിവസം ആറുലക്ഷം രൂപ തിരിച്ചടച്ചിരുന്നു.

ഇടുക്കി തഹസില്‍ദാര്‍ വിന്‍സന്റ് ജോസഫിന്റെ അന്വേഷണ റിപ്പോര്‍ട്ടിന്‍മേലാണ് ഇപ്പോഴത്തെ നടപടി.
കൊന്നത്തടി മുന്‍ പഞ്ചായത്ത് പ്രസിഡന്റ് ജയ വിജയന്റെ ഭര്‍ത്താവ് വിജയന്‍ താളനാനിയില്‍ 65,000 രൂപയും നിലവില്‍ പഞ്ചായത്തംഗവും കോണ്‍ഗ്രസ് നേതാവുമായ മുരളി നെല്ലിക്കുന്നുംപുറത്ത് ഭാര്യ സോമവല്ലിയുടെ പേരില്‍ സ്വന്തമാക്കിയ 1,90,000 രൂപ, യൂത്ത് കോണ്‍ഗ്രസ് നേതാവായ ബിജു അഗസ്റ്റ്യന്‍ നാടിക്കുന്നേല്‍ 1,25,000 രൂപയും പാറത്തോട് സ്വദേശിയായ കോണ്‍ഗ്രസ് നേതാവ് സജി മുട്ടത്തുകുന്നേല്‍ 65,000 രൂപയും തിരിച്ചടയ്ക്കണമെന്നാണ് ആവശ്യപ്പെട്ടിരിക്കുന്നത്.

പ്രളയതട്ടിപ്പ് അന്വേഷിക്കണമെന്ന് ആവശ്യപ്പെട്ട് സിപിഐ എം ജില്ലാ സെക്രട്ടറി കെ കെ ജയചന്ദ്രന്‍ മുഖ്യമന്ത്രിക്ക് പരാതി നല്‍കിയിരുന്നു. മുഖ്യമന്ത്രിയുടെ നിര്‍ദേശാനുസരണം റവന്യു വകുപ്പ് നടത്തിയ അന്വേഷണത്തിലാണ് ക്രമക്കേട് കണ്ടെത്തിയത്.
കൊന്നത്തടി പഞ്ചായത്തിലെ ഭരണസ്വാധീനം ഉപയോഗിച്ചായിരുന്നു തട്ടിപ്പ്. ഇതിന് കൂട്ടുനിന്ന വില്ലേജ് ഓഫീസര്‍ക്കും മറ്റ് റവന്യു, പഞ്ചായത്ത് ഉദ്യോഗസ്ഥര്‍ക്കുമെതിരെ നടപടി വേണമെന്നും കുറ്റക്കാര്‍ക്കെതിരെ ക്രിമിനല്‍ കേസെടുക്കണമെന്നാവശ്യപ്പെട്ട് കോടതിയെ സമീപിക്കാനൊരുങ്ങുകയാണ് ജനകീയ കൂട്ടായ്മ.