തിരഞ്ഞെടുപ്പ് ഒരുക്കങ്ങള്‍ അന്തിമഘട്ടത്തില്‍ ബൂത്തുകള്‍ കൂടുതല്‍ ഒരുങ്ങും

തദ്ദേശഭരണ സ്ഥാപന തെരഞ്ഞെടുപ്പിനുള്ള അന്തിമ വോട്ടര്‍പട്ടികയായി. പട്ടിക 15നകം രാഷ്ട്രീയ പാര്‍ടികള്‍ക്ക് നല്‍കും. അന്തിമമായി പേര് ചേര്‍ക്കാനും പരാതി ഉന്നയിക്കാനും തെരഞ്ഞെടുപ്പിന് മുമ്പ് ഒരവസരംകൂടി ലഭിക്കും. പട്ടികയില്‍ 2,71,20,823 പേരാണുള്ളത്. (സ്ത്രീകള്‍ 1,41,94,775, പുരുഷന്മാര്‍ 1,29,25,766 , ട്രാന്‍സ്‌ജെന്‍ഡര്‍ 282).
ആഗസ്ത് 12ലെ കരട് പട്ടികയില്‍ ആകെ 2.62 കോടി വോട്ടര്‍മാര്‍ ഉണ്ടായിരുന്നു

941 ഗ്രാമപഞ്ചായത്ത് (15,962 വാര്‍ഡ്), 152 ബ്ലോക്ക് പഞ്ചായത്ത് (2,080 വാര്‍ഡ്), 14 ജില്ലാപഞ്ചായത്ത് (331 വാര്‍ഡ്), 86 മുനിസിപ്പാലിറ്റി (3,078 വാര്‍ഡ്), ആറ് കോര്‍പറേഷന്‍ (414 വാര്‍ഡ്) എന്നിവിടങ്ങളിലാണ് തെരഞ്ഞെടുപ്പ്. നവംബര്‍ 11ന് ഭരണസമിതികളുടെ കാലാവധി തീരുന്നതിനാല്‍ ഒക്ടോബര്‍ അവസാനം തെരഞ്ഞെടുപ്പ് നടത്തേണ്ടതാണ്. കോവിഡിന്റെ സഹചര്യത്തില്‍ തെരഞ്ഞെടുപ്പ് നീട്ടിവയ്ക്കാനുള്ള അഭ്യര്‍ഥ സംസ്ഥാന തെരഞ്ഞെടുപ്പ് കമീഷന്‍ അംഗീകരിച്ചിട്ടുണ്ട്.

ആവശ്യമെങ്കില്‍ പുതിയ പോളിങ് സ്റ്റേഷന്‍
കോവിഡ് സാഹചര്യത്തില്‍ അന്തിമപട്ടികയിലെ വോട്ടര്‍മാരുടെ എണ്ണം പരിശോധിച്ച് ആവശ്യമെങ്കില്‍ പുതിയ പോളിങ് സ്റ്റേഷനുകള്‍ സ്ഥാപിക്കുമെന്ന് സംസ്ഥാന തെരഞ്ഞെടുപ്പ് കമീഷണര്‍ വി ഭാസ്‌കരന്‍ പറഞ്ഞു. വോട്ടര്‍മാരുടെ സൗകര്യത്തിനാണിത്.

കോവിഡ് മാനദണ്ഡങ്ങള്‍ കര്‍ശനമായി പാലിച്ചാകും വോട്ടെടുപ്പ്. പഞ്ചായത്തുകളില്‍ പരമാവധി 1200 വോട്ടര്‍മാരെയും മുനിസിപ്പാലിറ്റിയില്‍ 1500 വോട്ടര്‍മാരെയും ഉള്‍പ്പെടുത്തി പോളിങ് സ്റ്റേഷനുകള്‍ പുനഃക്രമീകരിക്കും. ത്രിതല പഞ്ചായത്തുകള്‍ക്കായി 29,210 ഉം മുനിസിപ്പാലിറ്റികളിലും കോര്‍പറേഷനുകളിലും 5,213 ഉം പോളിങ് സ്റ്റേഷനാണ് ഇപ്പോഴുള്ളത്. ഇവിടം സന്ദര്‍ശിച്ച് ജില്ലാ തെരഞ്ഞെടുപ്പ് ഉദ്യോഗസ്ഥര്‍ക്ക് റിപ്പോര്‍ട്ട് നല്‍കാന്‍ തദ്ദേശ സെക്രട്ടറിമാരോട് നിര്‍ദേശിച്ചിരുന്നു. ഈ റിപ്പോര്‍ട്ടിന്റെ അടിസ്ഥാനത്തിലാണ് പോളിങ് സ്റ്റേഷന്‍ പുനഃക്രമീകരണം.

പുതിയത് സ്ഥാപിക്കുകയോ നിലവിലുള്ളവ മാറ്റുകയോ ചെയ്യേണ്ടി വന്നാല്‍ ജില്ലാതെരഞ്ഞെടുപ്പ് ഉദ്യോഗസ്ഥര്‍ തദ്ദേശ സ്ഥാപനങ്ങളിലെ രാഷ്ട്രീയപാര്‍ടി പ്രതിനിധികളുടെ യോഗം വിളിക്കും. നിലവിലുള്ള പോളിങ് സ്റ്റേഷന്‍ പറ്റുന്നില്ലെങ്കില്‍ 500 മീറ്റര്‍ ചുറ്റളവില്‍ പുതിയ കേന്ദ്രം കണ്ടെത്തും.