വി മുരളീധരനെ മാറ്റി കുമ്മനത്തെ മന്ത്രിയാക്കാന്‍ നീക്കം

കേരളത്തിലെ ബിജെപി യില്‍ സാമുദായികസമവാക്യം നിലനിര്‍ത്താന്‍ നിലവില്‍ കേന്ദ്രമന്ത്രിയായ വി മുരളീധരനെ ആ സ്ഥാനത്തുനിന്ന് മാറ്റി കുമ്മനം രാജശേഖരനെ മന്ത്രിയാക്കാന്‍ നീക്കം. പാരമ്പര്യമായി ബിജെപിക്കൊപ്പം നില്‍ക്കുന്ന സമുദായങ്ങളെ അവഗണിച്ച് പാര്‍ട്ടിയിലെയും ഭരണത്തിലെയും സ്ഥാനങ്ങള്‍ ഒരേ സമുദായം കൊണ്ടുപോകുന്നതില്‍ കടുത്ത അമര്‍ഷം രേഖപ്പെടുത്തി. ആര്‍ എസ് എസ് നേതാക്കള്‍ വഴിയാണ് ഇവര്‍ തങ്ങളുടെ അമര്‍ഷം അറിയിച്ചിരിക്കുന്നത്. എ.പി.അബ്ദുല്ലക്കുട്ടിയെ ദേശീയ വൈസ് പ്രസിഡന്റായി നിയമിച്ച തീരുമാനം കൂടിവന്നതോെടെ ബിജെപി സംസ്ഥാന കമ്മിറ്റിയില്‍ ഭൂരിപക്ഷ നേതാക്കള്‍ തങ്ങളുടെ വിയോജിപ്പ് അറിയിച്ചിട്ടുണ്ട്. ഇന്നലെ കൊച്ചിയില്‍ നടന്ന പാര്‍ട്ടി കോര്‍ കമ്മിറ്റി യോഗത്തില്‍ പങ്കെടുത്തവരില്‍ പലരും ഇക്കാര്യം തുറന്നു പറഞ്ഞു. മിസോറം ഗവര്‍ണര്‍ പദവി വിട്ടു സജീവ രാഷ്ട്രീയത്തിലേക്കുവന്ന കുമ്മനം രാജശേഖരനു ദേശീയ നേതൃത്വത്തില്‍ പദവി നല്‍കാതിരുന്നതിലും പ്രതിഷേധമുണ്ടായി. കേന്ദ്ര മന്ത്രിസഭാ പുനഃസംഘടനയില്‍ കുമ്മനത്തിനു കാബിനറ്റ് മന്ത്രിപദം നല്‍കണമെന്ന ആവശ്യം ആര്‍എസ്എസ് സംസ്ഥാന നേതൃത്വം ബിജെപി ദേശീയ നേതൃത്വത്തിനു മുന്നില്‍ വച്ചതായാണു വിവരം. ഇന്നലെ കോര്‍ കമ്മിറ്റി യോഗത്തിനു കൊച്ചിയിലുണ്ടായിരുന്ന സംഘടനാ ചുമതലയുള്ള ദേശീയ ജനറല്‍ സെക്രട്ടറി ബി.എല്‍. സന്തോഷ് ആര്‍എസ്എസ് സംസ്ഥാന കാര്യാലയത്തിലെത്തിയപ്പോഴാണ് നേതൃത്വം ഈ ആവശ്യം മുന്നോട്ടുവച്ചത്. കുമ്മനത്തിനു സംഘടനാ പദവി നല്‍കാതിരുന്നതിലെ അതൃപ്തിയും ആര്‍എസ്എസ് സംസ്ഥാന നേതൃത്വം പ്രകടിപ്പിച്ചു. കോര്‍ കമ്മിറ്റി യോഗത്തില്‍ നിന്നു മുന്‍ സംസ്ഥാന പ്രസിഡന്റ് സി.കെ.പത്മനാഭന്‍ വിട്ടുനിന്നു. അബ്ദുള്ളക്കുട്ടിയുടെ സ്ഥാനലബ്ധിയില്‍ കൂടുതല്‍ അതൃപ്തി പ്രകടിപ്പിച്ചതു കൃഷ്ണദാസ് പക്ഷമാണ്. പി.കെ.കൃഷ്ണദാസ് പക്ഷത്തെ അവഗണിക്കുകയാണെന്ന പരാതി ആ വിഭാഗത്തിനുണ്ട്. സംഘടനാ പ്രവര്‍ത്തനത്തില്‍ സജീവമായിരുന്ന പ്രമുഖ വനിതാ നേതാവ് ശോഭാ സുരേന്ദ്രന്‍ അടക്കമുള്ളവര്‍ അവഗണിക്കപ്പെടുന്നുവെന്ന പരാതിയുള്ളവരാണ്.