ലോകം വീണ്ടും ലോക് ഡൗണിലേക്ക്

കോവിഡ് വ്യാപനം നിയന്ത്രണാതീതമായതോടെ വിവിധ രാജ്യങ്ങള്‍ വീണ്ടും ലോക്ഡൗണ്‍ പ്രഖ്യാപിച്ചു. നിയന്ത്രണങ്ങളുടെ പേരില്‍ പലയിടത്തും വന്‍ പ്രതിഷേധം. യുഎസിലെ വിവിധ നഗരങ്ങള്‍ക്കൊപ്പം ഇസ്രയേലിലും ബ്രിട്ടനിലും ലോക്ഡൗണ്‍ വിരുദ്ധ പ്രക്ഷോഭങ്ങള്‍ നടന്നു. ലണ്ടനില്‍ പൊലീസും പ്രതിഷേധക്കാരും ഏറ്റുമുട്ടി. ഇറാനില്‍ വീണ്ടും ലോക്ഡൗണ്‍ ഏര്‍പ്പെടുത്താന്‍ പ്രസിഡന്റ് ഹസന്‍ റൂഹാനി പ്രവിശ്യകള്‍ക്ക് അധികാരം നല്‍കി. നിയന്ത്രണങ്ങള്‍ പ്രവിശ്യാ ഗവര്‍ണര്‍മാര്‍ക്കു തീരുമാനിക്കാം. ആകെ മരണം 25,589. ആകെ കേസുകള്‍ 4.4ലക്ഷം കടന്നു. ശനിയാഴ്ച മാത്രം 3,204. സ്‌പെയിലില്‍ തലസ്ഥാന നഗരമായ മഡ്രിഡില്‍ സ്ഥിതി വഷളായി ; ഭാഗിക ലോക്ഡൗണ്‍ നീട്ടി. വെള്ളിയാഴ്ച മാത്രം 12,272 കേസുകള്‍. ആകെ കേസുകള്‍ 7.35 ലക്ഷം, മരണം 31,000 കടന്നു. ഇസ്രയേലില്‍ കോവിഡ് നിയന്ത്രണങ്ങള്‍ ശക്തമാക്കിയതിനെതിരെ പ്രധാനമന്ത്രി ബെഞ്ചമിന്‍ നെതന്യാഹുവിന്റെ വസതിക്കു മുന്നില്‍ പ്രകടനം. ജോലി നഷ്ടമായവരാണു പ്രതിഷേധക്കാരില്‍ ഏറെയും. പ്രതിദിനം 7,000 കേസുകള്‍, ആകെ കേസുകള്‍ 2.3 ലക്ഷം കടന്നു ലണ്ടന്‍ നഗരത്തില്‍ ലോക്ഡൗണ്‍ വിരുദ്ധ റാലി അക്രമാസക്തമായി. 10 പേര്‍ അറസ്റ്റിലായി. 6 പേരിലേറെ ഒത്തുകൂടരുത് എന്നതുള്‍പ്പെടെയുള്ള നിയന്ത്രണങ്ങളില്‍ പ്രതിഷേധിച്ചായിരുന്നു പ്രകടനം. യുകെയില്‍ കഴിഞ്ഞദിവസം 6,042 പോസിറ്റീവ് കേസുകളാണ് റിപ്പോര്‍ട്ട് ചെയ്തത്. ആകെ കേസുകള്‍ 4.3 ലക്ഷം കടന്നു.