സൂക്ഷിച്ചാല്‍ ദുഖിക്കേണ്ട , വേണ്ടിവന്നാല്‍ കേരളം അടച്ചിടും

സംസ്ഥാനത്ത് വരുംദിനങ്ങളില്‍ കൂടുതല്‍ കോവിഡ് രോഗികളുണ്ടാകുമെന്ന് മന്ത്രി കെ കെ ശൈലജ. വലിയ പോരാട്ടം നടത്തേണ്ട നാളുകളാണ് വരാനിരിക്കുന്നത്. ചില രാജ്യങ്ങളില്‍ കോവിഡിന്റെ രണ്ടാം തരംഗമാണ്. പ്രതിരോധ കുത്തിവയ്പ് കണ്ടുപിടിക്കുംവരെ കോവിഡ് നിലയ്ക്കില്ല. എന്നാലും നിരാശപ്പെടേണ്ട സ്ഥിതിയില്ല. ലോക്ഡൗണ്‍ ദിനങ്ങളില്‍ കേരളം നന്നായി ഒരുങ്ങി. ആവശ്യത്തിന് കിടക്കയും വെന്റിലേറ്ററും ഒഴിവുണ്ട്. അടുത്ത മാസംവരെ ആവശ്യമുള്ള ആരോഗ്യപ്രവര്‍ത്തകരെയും പരിശീലിപ്പിച്ചു. എന്നാല്‍ ദിവസവും വലിയ കുതിച്ചുചാട്ടമുണ്ടായാല്‍ ഇതെല്ലാം മാറും. ഇപ്പോള്‍ പകര്‍ച്ചാനിരക്ക് 12 ശതമാനമായി ഉയര്‍ന്നു. ഓണത്തിന് ഇളവ് നല്‍കിയത് രോഗം വര്‍ധിപ്പിച്ചു. സമരങ്ങള്‍ ഗ്രാഫ് വീണ്ടും ഉയര്‍ത്തി. ഇനിയുള്ള ദിനങ്ങള്‍ നിര്‍ണായകമാണ്. മാനദണ്ഡങ്ങള്‍ കൃത്യമായി പാലിച്ചാല്‍ രണ്ടുമാസത്തിനുള്ളില്‍ കോവിഡിനെ നിയന്ത്രിക്കാനാകുമെന്നാണ് പ്രതീക്ഷയെന്നും മന്ത്രി പറഞ്ഞു. ലോക്ഡൗണ്‍ വേണ്ടെന്നാണു പൊതുനിലപാടെങ്കിലും കോവിഡ് വ്യാപനം കൂടുതലുള്ള മേഖലകളില്‍ ലോക്ഡൗണിനു സമാനമായ നിയന്ത്രണങ്ങള്‍ ഉള്‍പ്പെടെയുള്ള കാര്യങ്ങളില്‍ തീരുമാനമുണ്ടാകും. കോഴിക്കോട് കോര്‍പറേഷന്‍ പരിധിയില്‍ 14 ദിവസത്തേക്കു നിയന്ത്രണങ്ങള്‍ കടുപ്പിച്ചു. സംസ്ഥാനത്ത് കഴിഞ്ഞ ദിവസത്തെക്കാള്‍ 4286 സാംപിള്‍ കുറവാണ് ഇന്നലെ പരിശോധിച്ചത്. എന്നിട്ടും 439 കേസുകള്‍ കൂടി. ടെസ്റ്റ് പോസിറ്റിവിറ്റി റേറ്റ് 13.6 % ആയി. പരിശോധിക്കുന്ന 7 പേരിലൊരാള്‍ വീതം പോസിറ്റീവ് ആകുന്നു. 3 ജില്ലകളില്‍ കേസുകള്‍ 900 കടന്നു; കോഴിക്കോട് 956. എറണാകുളം 924, മലപ്പുറം 915. മറ്റു ജില്ലകളിലും സ്ഥിതി ഗുരുതരം; തിരുവനന്തപുരം 853, കൊല്ലം 690, തൃശൂര്‍ 573, പാലക്കാട് 488, ആലപ്പുഴ 476, കോട്ടയം 426, കണ്ണൂര്‍ 332, പത്തനംതിട്ട 263, കാസര്‍കോട് 252, വയനാട് 172, ഇടുക്കി 125. ഇന്നലെ 21 മരണം കൂടി സ്ഥിരീകരിച്ചതോടെ സംസ്ഥാനത്ത് ആകെ മരണം 677. സ്ഥിതി നിയന്ത്രണാതീതമായാല്‍ എല്ലാം പൂട്ടിയിടേണ്ടിവരുമെന്നു മന്ത്രി കെ.കെ. ശൈലജ പറഞ്ഞു. കേരളത്തില്‍ മറ്റു സംസ്ഥാനങ്ങളെക്കാള്‍ വ്യാപന സാധ്യതയുണ്ട്. കോവിഡിന്റെ രണ്ടാം വ്യാപനമാണിത്. മരണനിരക്ക് ഉയരാന്‍ കാരണമാകുന്ന ജീവിതശൈലീ രോഗങ്ങളും ഇവിടെ കൂടുതലാണ്. ചെറുപ്പക്കാര്‍ക്കു കോവിഡ് വരില്ലെന്നതു മിഥ്യാധാരണയാണ്. കേരളത്തിലെ കോവിഡ് ബാധിതരില്‍ 28 % ചെറുപ്പക്കാരാണെന്നും മന്ത്രി പറഞ്ഞു.