ഇടതുമുന്നണിക്ക് തുടര്‍ഭരണം ലഭിക്കും; കാനം രാജേന്ദ്രന്‍

സമീപകാല വിവാദങ്ങളുടെ ഭാഗമായി അല്‍പ്പം മങ്ങല്‍ ഏറ്റിട്ടുണ്ടെങ്കിലും കേരളത്തില്‍ ഇടതുപക്ഷ സര്‍ക്കാരിന് തിരിച്ചുവരാനുള്ള സഹാചര്യമാണ് നിലനില്‍ക്കുന്നതെന്ന് സി പി ഐ സെക്രട്ടറി കാനം രാജേന്ദ്രന്‍ പറഞ്ഞു. പ്രശ്‌നങ്ങള്‍ അന്വേഷിക്കാന്‍ എന്‍ഐഎ വന്നിട്ട് 80 ദിവസം കഴിഞ്ഞു. സംസ്ഥാന സര്‍ക്കാരിനെതിരെ അത്യാവശ്യം പ്രചാരണം നടത്താനുള്ള സൗകര്യം ഒരുക്കിക്കൊടുക്കുകയല്ലാതെ സ്വര്‍ണം അയച്ചവരെക്കുറിച്ചോ കോണ്‍സുലേറ്റിന് അതിലുള്ള പങ്കോ അന്വേഷിച്ചോ? കേന്ദ്ര ഏജന്‍സികളെക്കൊണ്ട് കേരളസര്‍ക്കാരിനെ പുകമറയില്‍ നിര്‍ത്തുകയാണ്. രാജ്യത്തു പലയിടത്തും അവരെ ഉപയോഗിച്ചു സര്‍ക്കാരുകളെ അട്ടിമറിക്കുന്നത് അനുഭവിക്കുന്ന പാര്‍ട്ടിയായ കോണ്‍ഗ്രസിന്റെ നേതാവായിട്ടും രമേശ് ചെന്നിത്തല ഈ ഏജന്‍സികള്‍ക്കു പരവതാനി വിരിക്കുകയാണ്. കേന്ദ്രത്തിനെതിരെ സംസ്ഥാന സര്‍ക്കാരിനു ശബ്ദിക്കാന്‍ പരിമിതിയുണ്ട്. പക്ഷേ, രാഷ്ട്രീയകക്ഷികള്‍ക്ക് അവരുടെ രാഷ്ട്രീയ നിലപാടു പറയാന്‍ ഒരു മടിയും കാണിക്കേണ്ടതില്ല. സിപിഎമ്മിന്റെ പ്രമേയം വന്നല്ലോ. കേന്ദ്ര ഏജന്‍സികള്‍ക്കെതിരെയുള്ള പ്രചാരണത്തിനു കൂടിയാണ് ഇടതുമുന്നണി 29ലെ സമരത്തോടെ തുടക്കം കുറിക്കുന്നത്. പ്രതിരോധമല്ല, പ്രത്യാക്രമണമാണു വേണ്ടതെന്നും അദ്ദേഹം പറഞ്ഞു.