ബിജെപിയിലെ വിഭാഗീയത ആര്‍എസ്എസ് നേതൃത്വത്തിന് പി.കെ. കൃഷ്ണദാസ് പക്ഷം പരാതി നല്‍കി.

പാലക്കാട്: പാര്‍ട്ടി പുനഃസംഘടനയില്‍ സംസ്ഥാന ബിജെപിയിലെ വിഭാഗീയത മറനീക്കി പുറത്ത്. ആര്‍എസ്എസ് നേതൃത്വത്തിന് പി.കെ. കൃഷ്ണദാസ് പക്ഷം പരാതി നല്‍കി. സംഘടനാ ജനറല്‍ സെക്രട്ടറി ബി എല്‍ സന്തോഷിനും വി മുരളീധരനുമെതിരെയാണ് പരാതി. ഇരുവരും കേന്ദ്ര നേതൃത്വത്തെ തെറ്റിദ്ധരിപ്പിച്ചെന്നും പരാതിയില്‍ പറയുന്നു. കേരളത്തിലെ പ്രവര്‍ത്തകരുടെ വികാരം ഉള്‍ക്കൊള്ളുന്ന പട്ടികയല്ല ഇത്. പ്രവര്‍ത്തകരെ ദുഃഖിപ്പിക്കുന്ന പട്ടികയാണ്. കുമ്മനത്തെ കേന്ദ്ര മന്ത്രിസഭ പുനഃസംഘടനയില്‍ ഉള്‍പ്പെടുത്താന്‍ ആര്‍എസ്എസ് ഇടപെടല്‍ നടത്തണമെന്നാണ് ഇവരുടെ പക്ഷം. തത്കാലം അതൃപ്തി പരസ്യമായി പ്രകടിപ്പിക്കണ്ട എന്നാണ് കൃഷ്ണദാസ് പക്ഷത്തിന്റെ തീരുമാനം.കഴിഞ്ഞ ദിവസമാണ് ബിജെപി നേതൃത്വം പുനഃസംഘടിപ്പിച്ചത്. എ. പി അബ്ദുള്ളക്കുട്ടിയെ പാര്‍ട്ടി ദേശീയ ഉപാധ്യക്ഷ സ്ഥാനത്തേക്കാണ് തെരഞ്ഞെടുത്തത്. ടോം വടക്കന്‍ ദേശീയ വക്താവാകും. ഡല്‍ഹിയില്‍ നിന്നുള്ള അരവിന്ദ് മോനോന്‍ ദേശീയ സെക്രട്ടറിയായും പട്ടികയില്‍ ഇടംനേടി. അഹമ്മദാബാദില്‍ നിന്നുള്ള രാജീവ് ചന്ദ്രശേഖറും പാര്‍ട്ടി ദേശീയ വക്താവായി തെരഞ്ഞെടുക്കപ്പെട്ടു. കര്‍ണാടകയില്‍ നിന്നുള്ള തേജസ്വി സൂര്യയെ യുവമോര്‍ച്ച ദേശീയ പ്രസിഡന്റായും തെരഞ്ഞെടുത്തു.പാര്‍ട്ടി ദേശീയ ഉപാധ്യക്ഷ സ്ഥാനത്തേക്ക് കുമ്മനം രാജശേഖരന്‍ എത്തുമെന്നായിരുന്നു നേരത്തേ കരുതിയിരുന്നത്. ഇത് സംബന്ധിച്ച റിപ്പോര്‍ട്ടുകളും പുറത്തുവന്നിരുന്നു. എന്നാല്‍ അപ്രതീക്ഷിതമായി എ പി അബ്ദുള്ളക്കുട്ടി പട്ടികയില്‍ ഇടംപിടിക്കുകയായിരുന്നു. കേരളത്തില്‍ ബിജെപി നേതൃത്വത്തിന്റെ ഭാഗമായുള്ള ആരും പട്ടികയില്‍ ഇടം പിടിച്ചിട്ടില്ല എന്നതും ശ്രദ്ധേയമായി.