∙ സ്വത്തു വകകൾ സംബന്ധിച്ച വിവരങ്ങൾ കൈമാറാനാവശ്യപ്പെട്ട് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ ബിനീഷ് കോടിയേരിക്ക് എൻഫോഴ്സ്മെന്റ് ഡയറക്ടറേറ്റിന്റെ (ഇഡി) നോട്ടിസ്. ബിനീഷിന്റെ വസ്തുവകകൾ മുൻകൂർ അനുമതി ഇല്ലാതെ കൈമാറരുതെന്ന് സംസ്ഥാന റജിസ്ട്രേഷൻ വകുപ്പിനോടും ഇഡി ആവശ്യപ്പെട്ടു. കള്ളപ്പണം വെളുപ്പിക്കൽ നിയമപ്രകാരമാണ് ഇഡി നോട്ടിസുകൾ നൽകിയത്. കഴിഞ്ഞ മാസം ഒൻപതിന് ബിനീഷിനെ ഇഡി 11 മണിക്കൂർ ചോദ്യം ചെയ്തിരുന്നു. ലഹരിക്കടത്തിന് ബെംഗളുരൂവിൽ എൻസിബിയുടെ പിടിയിലായവർ സ്വർണക്കടത്തിന് ബിനീഷ് വഴി സഹായം നൽകിയിട്ടുണ്ടോ എന്നതു സംബന്ധിച്ചായിരുന്നു ചോദ്യം ചെയ്യൽ. ലഹരിമരുന്നു കേസിൽ പിടിയിലായ അനൂപ് മുഹമ്മദും ബിനീഷ് കോടിയേരിയും തമ്മിലുള്ള ബന്ധം പുറത്തുവന്ന പശ്ചാത്തലത്തിലായിരുന്നു  ചോദ്യം ചെയ്യൽ. നേരത്തെ ബിനീഷിന്റെ സ്വത്തുക്കളെക്കുറിച്ചും അതിന്റെ ഉറവിടങ്ങൾ സംബന്ധിച്ചും അന്വേഷണ സംഘം ചോദ്യങ്ങൾ ഉയർത്തിയിരുന്നു. ഇതിന് നൽകിയ മറുപടികളിൽ വ്യക്തത വരാതിരുന്ന സാഹചര്യത്തിൽ നടത്തിയ തുടർ അന്വേഷണത്തിനു ശേഷമാണ് ഇഡി ബിനീഷിന് നോട്ടിസ് അയച്ചിരിക്കുന്നത്. ബിനീഷിന്റെ ഉടമസ്ഥതയിലുള്ള ആസ്തികൾ സംബന്ധിച്ച വിവരങ്ങൾ കൈമാറണമെന്നാണ് ആവശ്യം. ഈ സ്വത്തുക്കൾ അന്വേഷണ പരിധിയിലാണെന്നും ഇഡിയുടെ അനുമതിയില്ലാതെ ക്രയവിക്രയം ചെയ്യുന്നതിന് അനുവദിക്കരുതെന്ന് റജിസ്ട്രേഷൻ വകുപ്പിനോടും ആവശ്യപ്പെടുകയായിരുന്നു.