ബി ജെ പി തണലുതേടി കോണ്‍ഗ്രസ് നേതാക്കള്‍ , അണികള്‍ ചോരുമോ എന്ന് ആശങ്ക

തദ്ദേശസ്വയംഭരണ തിരഞ്ഞെടുപ്പ് അടുത്തിരിക്കെ കേരളത്തിലെ കോണ്‍ഗ്രസ് നേതൃത്വം ബി ജെ പി പിന്‍തുണ തേടുന്നത് പാര്‍ട്ടിയില്‍ പുതിയ വിവാദം. കേന്ദ്രസര്‍ക്കാര്‍ ഏജന്‍സികള്‍ നടത്തുന്ന അന്വേഷണങ്ങള്‍ക്ക് കുടപിടിച്ചും , അത് പ്രോല്‍സാഹിപ്പിക്കാന്‍ പുതിയ പരാതികള്‍ കെട്ടിച്ചമച്ചു നടത്തുന്ന സമരം ദേശീയ തലത്തില്‍ കോണ്‍ഗ്രസിന് തിരിച്ചടി ആകുമെന്നാണ് മുതിര്‍ന്ന നേതാക്കളുടെ ഭീതി. ഒരു ഡസനിലേറെ കോണ്‍ഗ്രസ് നേതാക്കളുടെയും ബന്ധുക്കളുടെയും പരാതികളാണ് വിവിധ കേന്ദ്രഏജന്‍സികളുടെ മുന്നിലുള്ളത്. അതില്‍ പലതും ആ സംസ്ഥാനങ്ങളിലെ തിരഞ്ഞെടുപ്പുകള്‍ അടുക്കുമ്പോള്‍ സജീവമാക്കാന്‍ തീരുമാനിച്ചിരിക്കുകയാണ് സര്‍ക്കാര്‍. ഇപ്പോള്‍ അന്വേഷണ ഏജന്‍സികള്‍ക്ക് കുടപിടിച്ചാല്‍ ആ സമയം എങ്ങനെ മറിച്ചു പറയും എന്നാണ് അവരുടെ ചോദ്യം . പാര്‍ട്ടി നേതാവ് രാഹുല്‍ ഗാന്ധിയെയും , പ്രിയങ്കാ ഗാന്ധിയെയും മുള്‍മുനയില്‍ നിര്‍ത്താനുള്ള നീക്കത്തിലാണവര്‍. കേരളത്തില്‍ സി പി എം ഭരണത്തെ ദുര്‍ബലപ്പെടുത്താനുള്ള നീക്കം ബി ജെ പി യില്‍ നിന്ന് ഉണ്ടാവില്ല , മറിച്ച് കോണ്‍ഗ്രസ് അണികളെ തീവ്രതയില്‍ ആക്കി അവരെ പതുക്കെ ബിജെപി ക്യാമ്പിലേക്ക് അടുപ്പിക്കുകയാണന്ന് തിരിച്ചറിയണമെന്ന് ഇവര്‍ പറയുന്നു. ശബരിമല സമരം കഴിഞ്ഞപ്പോള്‍ പല നേതാക്കളും ബിജെപി ക്യാമ്പിനോട് അടുത്തത് ഇവര്‍ ചൂണ്ടിക്കാണിക്കുന്നുണ്ട്. സ്വര്‍ണക്കടത്തു വിഷയം സജീവമാക്കി നിര്‍ത്താനുള്ള രാഷ്ട്രീയ എതിരാളികളുടെ ശ്രമങ്ങളെ ചെറുക്കാന്‍ ശ്രമിക്കുമ്പോഴും അന്വേഷണ ഏജന്‍സികളുടെ നീക്കം എവിടെയെത്തുമെന്നാണ് പരിഭ്രമവും കോണ്‍ഗ്രസ് നേതൃത്വത്തിനുണ്ട്. പരസ്യ പ്രതികരണത്തിനു മുതിരുന്നില്ലെങ്കിലും മുന്നണിയിലെ ഘടകകക്ഷികള്‍ ചിലരും മലബാര്‍ ബന്ധങ്ങളിലെ ആരോപണങ്ങളുടെ കുത്തൊഴുക്കിനൊടുവില്‍ ജനങ്ങളോട് വിശദീകരണം നടത്തേണ്ടി വരില്ലേ എന്ന സംശയം ഉന്നയിച്ചു കഴിഞ്ഞു.