കേന്ദ്രമന്ത്രി കൊച്ചിയില്‍ എത്തിയത് എന്തിന്

സ്വര്‍ണക്കടത്ത് കേസ് ചോദ്യം ചെയ്യലിനിടെ കേന്ദ്രമന്ത്രി വി മുരളീധരന്‍ തിരിക്കിട്ട് നടത്തിയ കൊച്ചി സന്ദര്‍ശനം ബിജെപി രാഷ്ട്രീയത്തില്‍ വിവാദമാവുന്നു. മുരളീധരന്റെ കൊച്ചി നീക്കങ്ങള്‍ക്കെതിരെ കേന്ദ്രനേതൃത്വത്തിന് പരാതി നല്‍കാന്‍ ഒരുങ്ങുകയാണ് ഇവര്‍. കേന്ദ്രമന്ത്രിയുടെ നടപടികള്‍ പ്രവര്‍ത്തകരില്‍ സംശയം ജനിപ്പിക്കുന്നു, പാര്‍ട്ടിയെ പ്രതിരോധത്തില്‍ ആക്കുന്നു . സംസ്ഥാന രാഷ്ട്രീയത്തില്‍ ഈ വിഷയത്തില്‍ ആദ്യഘാത്തില്‍ ലഭിച്ച മേല്‍ കൈ ഇല്ലാതാക്കി തുടങ്ങിയ ആക്ഷേപങ്ങളാണ് ഇവര്‍ ഉന്നയിക്കുന്നത്. സ്വര്‍ണകടത്ത് കേസിലെ ചിലര്‍ക്കൊപ്പം ചിത്രങ്ങള്‍ വന്നതിനെ തുടര്‍ന്ന് പാര്‍ട്ടിക്കുള്ളില്‍ പ്രതിരോധത്തിലായ സംസ്ഥാന നേതാവാണ് ഇതിന് ചുക്കാന്‍ പിടിക്കുന്നത്. ജനംടിവി കോ--ഓര്‍ഡിനേറ്റിങ് എഡിറ്റര്‍ അനില്‍ നമ്പ്യാരെ കസ്റ്റംസ് ചോദ്യം ചെയ്തതിന്റെ അടുത്ത ദിവസങ്ങളിലാണ് രണ്ടുനാള്‍ കേന്ദ്രമന്ത്രി കൊച്ചിയില്‍ തങ്ങിയത്. ആഗസ് ത് 27ന് പകല്‍ 2.15ന് നെടുമ്പാശേരിയില്‍ വിമാനമിറങ്ങിയ മന്ത്രി ആകെ അഞ്ച് ദിവസമാണ് കേരളത്തില്‍ സന്ദര്‍ശനം നടത്തിയത്. ഇതില്‍ ഒരു രാത്രിയും പകലും കൊച്ചിയിലായിരുന്നു. അവിടെ പൊതു പരിപാടിയിലോ സ്വകാര്യചടങ്ങിലോ പങ്കെടുത്തതിന് രേഖയുമില്ല. അതേസമയം, ഉന്നത ഉദ്യോഗസ്ഥരടക്കം പലരും ഗസ്റ്റ്ഹൗസില്‍ സന്ദര്‍ശകരായി എത്തിയിരുന്നു. നെടുമ്പാശേരിയില്‍നിന്ന് തൃശൂര്‍വഴി കോഴിക്കോട് എത്തിയ മന്ത്രി അവിടെതങ്ങി. 29ന് പുലര്‍ച്ചെ തലശേരിയിലെത്തിയ അദ്ദേഹം അന്നുതന്നെ കൊച്ചിയില്‍ തിരിച്ചെത്തി. വൈകിട്ട് ആറിന് കൊച്ചിയില്‍ എത്തിയ കേന്ദ്രമന്ത്രി രാത്രിയില്‍ എറണാകുളം ഗസ്റ്റ്ഹൗസില്‍ കഴിച്ചുകൂട്ടി. പിറ്റേന്ന് പകലും മന്ത്രി കൊച്ചിയില്‍ തന്നെയുണ്ടായിരുന്നു. ഈ ദിവസങ്ങളില്‍ അനില്‍ നമ്പ്യാരും കൊച്ചിയിലുണ്ടായിരുന്നു. കോഴിക്കോട്ടും തലശേരിയിലും ചില സ്വകാര്യ ചടങ്ങുകളില്‍ പങ്കെടുത്ത കേന്ദ്രമന്ത്രി പരിപാടികളില്ലാതെ എറണാകുളത്ത് തങ്ങിയതിലാണ് ദുരൂഹത. കൊച്ചിയില്‍നിന്ന് തിരുവനന്തപുരത്ത് എത്തിയ വി മുരളീധരന്‍ സെപ്തംബര്‍ ഒന്നിന് ഡല്‍ഹിക്ക് തിരിച്ചുപോയി. സ്വര്‍ണം കടത്തിയത് നയതന്ത്ര ബാഗിലൂടെ അല്ലെന്ന് കസ്റ്റംസിന് എഴുതിക്കൊടുക്കാന്‍ നിര്‍ദേശിച്ചത് അനില്‍ നമ്പ്യാര്‍ ആണെന്ന് സ്വപ്ന സുരേഷ് മൊഴി നല്‍കിയിരുന്നു. ഇത് പുറത്തായതിനെ തുടര്‍ന്നാണ്, കസ്റ്റംസ് ഉദ്യോഗസ്ഥരെ സ്ഥലം മാറ്റിയത്. വി മുരളീധരന്റെ കൊച്ചി സന്ദര്‍ശനത്തിന് പിന്നാലെയാണ് കസ്റ്റംസ് ഉദ്യോഗസ്ഥര്‍ക്കെതിരെ നടപടി എടുത്തത്. ഇതൊക്കെ പാര്‍ട്ടിയെ ദുര്‍ബലപ്പെടുത്തുകയാണ്. ഇതിന് മുന്‍പ് മന്ത്രിയുടെ ഓഫീസുമായി ബന്ധപ്പെട്ട് ഉയര്‍ന്ന പ്രശ്‌നങ്ങളും മുരളീധരനെതിരെ പരാതിയായി സംഘപരിവാറിന് നല്‍കിയിട്ടുണ്ട്.