ഹൂസ്റ്റണ്‍ കാട്ടുതീ മരണസംഖ്യ 20

 

ഹൂസ്റ്റണ്‍ ∙ പടിഞ്ഞാറന്‍ തീരപ്രദേശങ്ങളിലെ നഗരങ്ങളിലേക്ക് ആളിപടരുന്ന കാട്ടുതീ കാര്യമായി വ്യാപിച്ചതോടെ മരണസംഖ്യ ഇരുപതു കവിഞ്ഞു. രക്ഷാപ്രവര്‍ത്തനം പുരോഗമിക്കുന്നുണ്ടെങ്കിലും കാര്യക്ഷമമല്ലെന്നാണ് റിപ്പോര്‍ട്ട്. നൂറു കണക്കിനാളുകളെക്കുറിച്ച് യാതൊരു വിവരവുമില്ല. രക്ഷാപ്രവര്‍ത്തകര്‍, അഗ്നിശമന സേന എന്നിവര്‍ മുന്നേറ്റനിരയിലുണ്ടെങ്കിലും അഗ്നിതാണ്ഡവം നിയന്ത്രണവിധേയമാക്കാനായിട്ടില്ല. ആയിരക്കണക്കിന് ആളുകള്‍ വീടുകളില്‍ നിന്ന് പലായനം ചെയ്തു. ഇവരില്‍ പലരും കാര്യമായ ഷെല്‍ട്ടറുകള്‍ ലഭിക്കാതെ റോഡരുകിലും പാര്‍ക്കിങ് ബേയിലുമായാണ് കഴിച്ചു കൂട്ടുന്നത്. കോവിഡ് പകര്‍ച്ചവ്യാധിയുടെ വ്യാപനം രൂക്ഷമായ കാലിഫോര്‍ണിയ സംസ്ഥാനത്താണ് സ്ഥിതിഗതികള്‍ രൂക്ഷമായിരിക്കുന്നത്. മരങ്ങളേറുയെള്ള പ്രദേശങ്ങളെ ലക്ഷ്യമിട്ട് കാട്ടുതീ വ്യാപിച്ചതോടെ നഗരങ്ങളിലടക്കം പുക കനത്തിട്ടുണ്ട്. സാന്‍ ഫ്രാന്‍സിസ്‌കോ നഗരം വളരെ കനത്ത പുകയില്‍ പുതഞ്ഞിരിക്കുകയാണ്. അത് സൂര്യരശ്മിയെ പോലും തടഞ്ഞു ഇരുട്ടിലാഴ്ത്തി. ചാരവും അവശിഷ്ടങ്ങളും എല്ലായിടത്തും വര്‍ദ്ധിച്ചിട്ടുണ്ട്. കാലിഫോര്‍ണിയയില്‍ മാത്രം 30 ദശലക്ഷത്തിലധികം ഏക്കര്‍ കത്തിനശിച്ചു, സംസ്ഥാന ചരിത്രത്തിലെ ഏറ്റവും വലിയ അഞ്ച് തീപിടുത്തങ്ങളില്‍ മൂന്നെണ്ണവും ഈ സീസണിലാണ് നടന്നത്. ഇവിടെ മാത്രമല്ല, മറ്റു സമീപസംസ്ഥാനങ്ങളായ ഒറിഗണ്‍, വാഷിംഗ്ടണ്‍ എന്നിവിടങ്ങളിലെ വലിയ തീപിടുത്തങ്ങളും ഇപ്പോള്‍ നടന്നു കൊണ്ടിരിക്കുകയാണ്. ഇവിടെയെല്ലാം തന്നെ അഗ്നിശമനസേനാംഗങ്ങള്‍ നിസ്സഹായരായി നില്‍ക്കുന്ന കാഴ്ചയാണ് കാണുന്നത്. രക്ഷാപ്രവര്‍നത്തില്‍ ഏര്‍പ്പെടുന്നവര്‍ ജനങ്ങളോട് കൂടുതല്‍ സുരക്ഷിത സ്ഥാനത്തേക്ക് മാറാന്‍ തുടര്‍ച്ചയായി ആവശ്യപ്പെടുന്നുണ്ട്.  ഫീനിക്‌സിലാണ് വലിയ നാശനഷ്ടമുണ്ടായതായി റിപ്പോര്‍ട്ടുകളുള്ളത്. ഇവിടെ, കാട്ടുതീ മൂലം നഗരത്തിലെ നൂറുകണക്കിന് വീടുകള്‍ കത്തി നശിച്ചു. പ്രദേശമാകെ ഉപേക്ഷിക്കപ്പെട്ട നഗരം പോലെയാണ് കാണുന്നത്. ഇവിടെ, കണക്കാക്കാനാവാത്ത വിധമാണ് നഷ്ടങ്ങളെന്നു പ്രദേശത്തു നിന്നുള്ള ഉദ്യോഗസ്ഥര്‍ അറിയിച്ചിരിക്കുന്നു. വാഷിങ്ടണ്‍ സംസ്ഥാനത്തും സമീപ പ്രദേശത്തുള്ള മറ്റ് ആറോളം സംസ്ഥാനങ്ങളിലേക്കും തീ പടര്‍ന്നിട്ടുണ്ട്.