എന്‍.ഐ.എ എംഎല്‍എയിലേക്ക് എത്തുമോ, ഭയന്ന് യു ഡി എഫ് നേതൃത്വം

സ്വര്‍ണകടത്ത് അന്വേഷിക്കുന്ന എന്‍ ഐ എ സംഘം യു ഡി എഫ് എം എല്‍ എ യുടെ സ്വര്‍ണ ബന്ധങ്ങള്‍ തേടുമോ എന്ന് നേതൃത്വത്തിന് ഭയം. ഇന്നലെ ചേര്‍ന്ന മുസ്‌ളീം ലീഗ് ഉന്നതാധികാരസമിതിയ യോഗത്തില്‍ ചിലര്‍ ഈ ആശങ്ക പ്രകടിപ്പിക്കുകയും ചെയ്തു. പ്രതികളില്‍ ചിലയുടെ ബന്ധുതകള്‍ സി പി എം ആയുധമാക്കിയതിനെ പ്രതിരോധിക്കാന്‍ ലീഗ് നന്നായി വിഷമിച്ചിരുന്നു ആ സമയത്താണ് എം എല്‍ എ തന്നെ മറ്റൊരു സ്വര്‍ണ കുടുക്കില്‍ പെട്ടിരിക്കുന്നത്. മഞ്ചേശ്വരം എംഎല്‍എയും മുസ്ലിംലീഗ് നേതാവുമായ എം സി ഖമറുദ്ദീന്‍ മുഖ്യ പ്രതിയായ 150 കോടി രൂപയുടെ ഫാഷന്‍ ഗോള്‍ഡ് ജ്വല്ലറി തട്ടിപ്പ് അന്വേഷണം ക്രൈംബ്രാഞ്ച് ഏറ്റെടുത്തു. കാസര്‍കോട് ജില്ലാ പൊലീസ് മേധാവിയുടെ കീഴില്‍ ഡിവൈഎസ്പി സതീഷ് ആലക്കലിന്റെ നേതൃത്വത്തിലുള്ള പ്രത്യേക സംഘം കേസ് അന്വേഷിക്കും. ലീഗ് സംസ്ഥാന പ്രവര്‍ത്തക സമിതി അംഗവും മുന്‍ജില്ലാ പ്രസിഡന്റുമായ ഖമറുദ്ദീന്‍ യുഡിഎഫ് ജില്ലാ ചെയര്‍മാനുമാണ്. എംഎല്‍എയുമായി ഫോണില്‍ ബന്ധപ്പെടാന്‍ നിക്ഷേപകര്‍ ശ്രമിച്ചെങ്കിലും ഫലമുണ്ടായില്ല. എംഎല്‍എ ഒളവിലാണെന്നാണ് നിക്ഷേപകര്‍ പറയുന്നത്. 800 ഓളം നിക്ഷേപകരില്‍നിന്ന് 150 കോടി രൂപ തട്ടിയെടുത്ത സംഭവത്തില്‍ ചന്തേര പൊലീസ് സ്റ്റേഷനില്‍ 11 ഉം കാസര്‍കോട് സ്റ്റേഷനില്‍ അഞ്ച് കേസും എംഎല്‍എക്കെതിരെ രജിസ്റ്റര്‍ ചെയ്തു. നിയമ വിരുദ്ധമായി സ്വകാര്യ നിക്ഷേപം സ്വീകരിക്കല്‍, വഞ്ചന തുടങ്ങിയ കുറ്റങ്ങളാണ് ചുമത്തിയിരിക്കുന്നത്. വണ്ടിച്ചെക്ക് നല്‍കി വഞ്ചിച്ചതിന് സിവില്‍, ക്രിമിനല്‍ കേസുകള്‍ വേറെയുമുണ്ട്. അഞ്ച് ചെക്കുകേസുകളില്‍ നേരിട്ട് ഹാജരാകാന്‍ ഹൊസ്ദുര്‍ഗ് മജിസ്ട്രേട്ട് കോടതി സമന്‍സ് അയച്ചു. ജ്വല്ലറിയില്‍ പണം നിക്ഷേപിച്ച മദ്രസ അധ്യാപകനുള്‍പ്പെടെയുള്ള ഏഴുപേര്‍ ജില്ലാ പൊലീസ് ചീഫിന് നേരത്തെ പരാതി നല്‍കിയിരുന്നു. സിവില്‍ കേസായാണ് പരിഗണിച്ചത്. ചട്ടവിരുദ്ധമായി നിക്ഷേപം സ്വീകരിച്ച് വഞ്ചിക്കുകയും തിരിച്ചുചോദിച്ചവരെ ഭീഷണിപ്പെടുത്തുകയും ചെയ്തപ്പോഴാണ് ക്രിമിനല്‍ കേസെടുത്തത്. ആദ്യ മൂന്ന് പരാതികളില്‍ ചന്തേര പൊലീസ് കേസെടുത്ത് അന്വേഷണം ആരംഭിച്ചതോടെ കൂടുതല്‍ പരാതിക്കാര്‍ രംഗത്തുവന്നു. രാഷ്ട്രീയ സ്വാധീനം ഉപയോഗിച്ച് പണപ്പിരിവ് 2013ലാണ് എം സി ഖമറുദ്ദീന്‍ ചെയര്‍മാനും മുസ്ലിംലീഗ് കാസര്‍കോട് ജില്ലാ പ്രവര്‍ത്തക സമിതി അംഗം ടി കെ പൂക്കോയ തങ്ങള്‍ എംഡിയുമായി ചെറുവത്തൂരില്‍ ഫാഷന്‍ ഗോള്‍ഡ് ഇന്റര്‍നാഷണല്‍ ജ്വല്ലറി തുടങ്ങിയത്. പൊതുപ്രവര്‍ത്തകരെന്ന സ്വാധീനം ഉപയോഗപ്പെടുത്തി ഇവര്‍ ജ്വല്ലറിക്ക് കോടികള്‍ നിക്ഷേപമായി സ്വീകരിച്ചു. ഡയറക്ടര്‍മാരായ 15 പേരും ലീഗ് നേതാക്കളാണ്. കബളിപ്പിക്കപ്പെട്ടവരില്‍ ഭൂരിപക്ഷവും ലീഗ് പ്രവര്‍ത്തകരാണ്. 2014ല്‍ കാസര്‍കോടും 15ല്‍ പയ്യന്നൂരിലും ശാഖ ആരംഭിച്ചു. 2017 മുതല്‍ ജ്വല്ലറി നഷ്ടത്തിലാണെന്നാണ് ഇവര്‍ അവകാശപ്പെട്ടിരുന്നത്. ജ്വല്ലറിക്ക് 2019 ജൂണില്‍വരെ മുദ്രപത്രത്തില്‍ കരാര്‍ എഴുതി ലക്ഷങ്ങള്‍ സമാഹരിച്ചു. ജ്വല്ലറിയുടെ ചെറുവത്തൂര്‍, പയ്യന്നൂര്‍, കാസര്‍കോട് ബ്രാഞ്ചുകള്‍ കഴിഞ്ഞ ജനുവരിയില്‍ നവീകരിക്കാനെന്നപേരില്‍ അടച്ചു. കാസര്‍കോട്ടെയും പയ്യന്നൂരിലെയും ഭൂമിയും കെട്ടിടവും ബംഗളൂരുവിലെ ആസ്തിയും വിറ്റു. ഇതോടെയാണ് നിക്ഷേപകര്‍ പരാതിയുമായെത്തിയത്.