പ്രവീണിന്റെ മരണം; ചുരുളഴിയാതെ ദുരൂഹതകൾ

യുവാവിനെ ദുരൂഹ സാഹചര്യത്തിൽ കാഡ കനാൽചാലിൽ മരിച്ച നിലയിൽ കണ്ടെത്തി. കുത്തനൂർ പൊന്നംകുളം പരേതനായ മണികണ്ഠന്റെ മകൻ പ്രവീണിന്റെ (22) മൃതദേഹമാണ് വീട്ടിൽ നിന്ന് 400 മീറ്റർ അകലെയുള്ള പൊന്നംകുളത്തിനു സമീപത്തെ ചാലിൽ കണ്ടത്. രാവിലെ അതുവഴി ചായക്കടയിലേക്കു പോയവരാണ് കമിഴ്ന്നു കിടക്കുന്ന നിലയിൽ മൃതദേഹം കണ്ടത്. ഇടതു കയ്യിൽ ഷോക്കേറ്റ പാടും നെറ്റിയിൽ മുറിവുമുണ്ട്. മൃതദേഹം കോവിഡ് പരിശോധനയ്ക്കും പോസ്റ്റ്മോർട്ടത്തിനുമായി ജില്ലാ ആശുപത്രിയിലേക്കു മാറ്റി. സ്റ്റീൽ ഫാബ്രിക്കേഷൻ ജോലിക്കാരനാണ്. അമ്മ: പാർവതി, സഹോദരങ്ങൾ: പവിത്രൻ, പ്രിൻസ്.   കുഴൽമന്ദം ∙ രാവിലെ ചായകുടിക്കാൻ പോയവർ കണ്ടത് ഒരു ചെറുപ്പക്കാരൻ റോഡരികിൽ കമിഴ്ന്നു കിടക്കുന്ന കാഴ്ച. മദ്യപിച്ചു കിടക്കുകയാണോ എന്നു സംശയിച്ചവർ അടുത്തു ചെന്നതോടെ ഞെട്ടി. പിന്നീടാണ് കുത്തനൂർ പൊന്നംകുളത്ത് പരേതനായ മണികണ്ഠന്റെ മകൻ പ്രവീണിന്റെ (22) മൃതദേഹമാണെന്നു തിരിച്ചറിഞ്ഞത്. വീട്ടിൽ നിന്ന് ഏകദേശം 400 മീറ്റർ അകലെയുള്ള റോഡരികിലെ ചാലിൽ കണ്ട ശരീരത്തിന്റെ ഇടതു കയ്യിലും കാലിലും ഷോക്കേറ്റ പാടും നെറ്റിയിൽ മുറിവുമുണ്ട്. ഡിവൈഎസ്പി കെ.എം. ദേവസ്യ, കുഴൽമന്ദം ഇൻസ്പെക്ടർ ഇ.പി. രാമദാസ്, ഡോഗ് സ്ക്വാഡിലെ പൊലീസ് നായ റോക്കിയോടൊപ്പം എ.വി. രാജീവ്, പി.ആർ. അരുൺപ്രകാശ് എന്നിവരും എത്തി. റോക്കി മൃതദേഹത്തിനു സമീപത്തു നിന്നു പാടവരമ്പിലൂടെ രണ്ടു കിലോമീറ്റർ പോയി തിരികെ വന്നു. സ്റ്റീൽ ഫാബ്രിക്കേഷൻ ജോലി കഴിഞ്ഞു രാത്രി വീട്ടിലെത്തിയ പ്രവീൺ 9 മണി വരെ അവിടെയുണ്ടായിരുന്നു. രാവിലെയാണ് വീട്ടുകാർ കാണാതായ വിവരം അറിയുന്നത്. പ്രവീണിന് ഒരു പെൺകുട്ടിയുമായി ഉണ്ടായിരുന്ന പ്രണയത്തെക്കുറിച്ച് അന്വേഷണം നടക്കുന്നുണ്ട്.