കേന്ദ്രസർക്കാരിന്റെ ജനദ്രോഹനടപടികൾക്കെതിരെ രാജ്യമെമ്പാടുമുള്ള അഞ്ഞൂറോളം വനിതാസംഘടനകളുടെ നേതൃത്വത്തിൽ ഭരണഘടനാ സംരക്ഷണ കൂട്ടായ്‌മ സംഘടിപ്പിക്കും. അഞ്ചിന്‌ വൈകിട്ട് അഞ്ചരയ്ക്കാണ്‌ "ഇഫ്‌ വീ ഡു നോട്ട്‌ റ‌യ്സ്‌' എന്ന പേരിൽ ഓൺലൈനായി കൂട്ടായ്മ നടക്കുക. If we -Do -Not-Rise-Kerala എന്ന ഫെയ്‌സ്ബുക്ക് പേജിലൂടെയാണ് പരിപാടി. കേരളത്തിലെ ഏകോപനസമിതി രൂപീകരണയോഗം ഭരണഘടനാ സംരക്ഷണ കൂട്ടായ്മ ദേശീയ കൺവീനർ ഷബ്‌നം ഹശ്‌ശി ഉദ്ഘാടനം ചെയ്‌തു. ജനാധിപത്യ മഹിളാ അസോസിയേഷൻ സംസ്ഥാന സെക്രട്ടറി പി സതീദേവി, കെ അജിത, പ്രൊഫ. എ ജി ഒലീന, ഗീത നസീർ, ആര്യ രാജേന്ദ്രൻ, വിജി പെൺകൂട്ട്, കെ രാധൻ എന്നിവർ സംസാരിച്ചു. ഡോ. ടി ഗീനാകുമാരി, ഡോ. സംഗീത ചേനംപുല്ലി, പി വി ഷബി എന്നിവരാണ്‌ പരിപാടിയുടെ സംസ്ഥാന കോ–-ഓർഡിനേറ്റർമാർ. എഴുത്തുകാരും വനിതാസംഘടനകളും സാമൂഹ്യ- സാംസ്‌കാരിക നേതാക്കളും മനുഷ്യാവകാശ പ്രവർത്തകരുമടക്കം വിവിധ മേഖലകളിലുള്ളവർ പങ്കെടുക്കും.