കൊലപാതകം ആസൂത്രിതം സിസി ക്യാമറ മാറ്റി

വെഞ്ഞാറമൂട്ടില്‍ ഇന്നലെ അര്‍ദ്ധരാത്രി നടന്ന കൊലപാതകം വളരെ ആസൂത്രിതമായി നടത്തിയ രാഷ്ട്രീയ കൊലപാതകമാണെന്ന് പൊലീസിന് സൂചന ലഭിച്ചു. മിഥിലാജിന്റെ നെഞ്ചില്‍ ഒറ്റക്കുത്താണ് കുത്തിയത്. ഹഖ് മുഹമ്മദിനെ ക്രൂരമായി ഒട്ടേറെത്തവണ വെട്ടിയിട്ടുണ്ട്.. ഇതിനെല്ലാം പിന്നില്‍ മികച്ച ക്രിമനല്‍ സംഘങ്ങളുടെ സഹായമുണ്ടെന്നാണ് വിലയിരുത്തല്‍ . അതേസമയം, വളരെ ആസൂത്രിതമായി നടത്തിയ കൊലപാതകമാണെന്ന് വ്യക്തമാക്കുന്ന സൂചനകള്‍ പുറത്തു വന്നിരുന്നു. കൊലപാതകം നടന്ന പ്രദേശത്തെ സിസിടിവി ക്യാമറകള്‍ തിരിച്ചുവച്ചിരിക്കുന്നതായി വ്യക്തമായി. കൊലപാതകം നടന്ന സ്ഥലത്തിനു സമീപത്തെ കെട്ടിടത്തിലെ ക്യാമറയാണ് ഇത്തരത്തില്‍ ദിശമാറ്റിയതായി കണ്ടെത്തിയത്. ലോക്‌സഭാ തിരഞ്ഞെടുപ്പുമായി ബന്ധപ്പെട്ട് തുടങ്ങിയ തര്‍ക്കമാണു കൊലപാതകത്തില്‍ കലാശിച്ചതെന്നാണു പൊലീസ് നല്‍കുന്ന സൂചന. അഞ്ചുപേരടങ്ങുന്ന സംഘമാണ് കൊലയ്ക്ക് പിന്നിലെന്നാണ് പ്രാഥമിക നിഗമനം. വെഞ്ഞാറമ്മൂടിലെ ഡിവൈഎഫ്ഐ നേതാക്കളുടെ കൊലപാതകവുമായി ബന്ധപ്പെട്ട് ആറ് പേര്‍ കസ്റ്റഡിയിലായിട്ടുണ്ട്. . മുഖ്യപ്രതിയുടെ സുഹൃത്ത് ഷജിത്തും ബൈക്ക് ഉടമയുമടക്കം ആറ് പേരാണ് കസ്റ്റഡിയിലായത്. ഐഎന്‍ടിയുസി പ്രവര്‍ത്തകനാണ് കസ്റ്റഡിയിലായ ഷജിത്ത്. വാട്സ്ആപ്പ് ഗ്രൂപ്പില്‍ കൊലപാതകത്തിന് ശേഷം കറുത്തകൊടിയുടെ ചിഹ്നം ഇട്ടത് ഷജിത്തായിരുന്നു. അക്രമിസംഘത്തിലുണ്ടായിരുന്നത് ആറ് പേരായിരുന്നുവെന്ന് ഇപ്പോള്‍ ലഭിക്കുന്ന വിവരം. ഇവരുടെ പിടികൂടാനുള്ള ഊര്‍ജിത ശ്രമം നടക്കുന്നുണ്ട്. ബൈക്കിലെത്തി കൊല നടത്തിയ ശേഷം ഇവര്‍ ബൈക്ക് ഉപേക്ഷിച്ച് കാറില്‍ രക്ഷപ്പെടുകയായിരുന്നു. പ്രതികള്‍ ഉപയോഗിച്ച മൂന്ന് ബൈക്കുകള്‍ പൊലീസ് കണ്ടെത്തി കസ്റ്റഡിയിലെടുത്തിട്ടുണ്ട്. ബൈക്കിലെത്തിയ സംഘം ഇരുവരേയും വളയുകയും മാരകായുധങ്ങളുപയോഗിച്ച് വെട്ടിക്കൊലപ്പെടുത്തുകയുമായിരുന്നു. നെഞ്ചിന് കുത്തേറ്റ മിഥിലാജ് സംഭവസ്ഥലത്ത് വെച്ചും ഹക് മുഹമ്മദ് ആശുപത്രിയിലും മരിച്ചു. മിഥില്‍ രാജ് ഡിവൈഎഫ്ഐ തേമ്പാമൂട് യൂണിറ്റ് ജോ. സെക്രട്ടറിയും ഹക്ക് മുഹമ്മദ്- കലിങ്കിന്‍ മുഖം യൂണിറ്റ് പ്രസിഡന്റും പാര്‍ട്ടി അംഗവുമാണ്. വെഞ്ഞാറമൂട്ടില്‍ രണ്ട് ഡിവൈഎഫ്‌ഐ നേതാക്കളെ വെട്ടിക്കൊലപ്പെടുത്തിയ കേസില്‍ പ്രതികള്‍ കോണ്‍ഗ്രസ് പ്രവര്‍ത്തകര്‍ തന്നെയെന്ന് ദൃക്സാക്ഷി. ആക്രമി സംഘം ലക്ഷ്യമിട്ടതുകൊല്ലപ്പെട്ട ഡിവൈഎഫ്ഐ കലിങ്ങിന്‍ മുഖം യൂണിറ്റ് പ്രസിഡന്റ് ഹഖ് മുഹമ്മദ് (24)നെയാണെന്നും ഇവര്‍ക്കൊപ്പം സഞ്ചരിച്ചിരുന്ന എസ്എഫ്ഐ തേമ്പാമുട് മേഖല സെക്രട്ടറി സഹിന്‍ പൊലീസിന് മൊഴി നല്‍കി. വെഞ്ഞാറമൂട് ഇരട്ടക്കൊലപാതകം ആസൂത്രണം ചെയ്ത് നടപ്പാക്കിയതാണെന്ന് ഡിവൈഎഫ്‌ഐ നേതാവ് മുഹമ്മദ് റിയാസ് പറഞ്ഞു. കോണ്‍ഗ്രസിന്റെയും യൂത്ത് കോണ്‍ഗ്രസിന്റെയും സംസ്ഥാന നേതാക്കള്‍ നടത്തുന്ന ഇടതുവിരുദ്ധ പ്രചാരണങ്ങളാണ് ഇത്തരത്തില്‍ െകാലപാതകങ്ങളില്‍ എത്തുന്നതെന്നും റിയാസ് പറഞ്ഞു. ത്രിപുര മോഡല്‍ കേരളത്തിലും നടപ്പാക്കാനാണു ശ്രമമെന്നും അദ്ദേഹം ആരോപിച്ചു.