കോണ്‍ഗ്രസില്‍ പോര് ശക്തം കേരളത്തില്‍ നിന്ന് കുര്യനും തരൂരും

കോണ്‍ഗ്രസ് നേതൃത്വത്തില്‍ അഴിച്ചുപണിവേണമെന്ന കലാപത്തിന് പുതിയ മാനം. ഇതുവരെ യുവ നേതാക്കളാണ് ഇക്കാര്യം ആവശ്യപ്പെട്ടതെങ്കില്‍ ഇപ്പോള്‍ മുതിര്‍ന്ന നേതാക്കളും രംഗത്തുവന്നു. കേരളത്തില്‍ ഇതുവരെ ഇല്ലാതിരുന്ന പുതിയ ഗ്രൂപ്പും ഇതില്‍ ചേര്‍ന്നിട്ടുണ്ട്. രാഹുല്‍ സംഘത്തിലെ മുതിര്‍ന്നവരും എ ഐ ഗ്രൂപ്പുകള്‍ ഒന്നിച്ചു തകര്‍ക്കാന്‍ ശ്രമിക്കുകയും ചെയ്യുന്ന ശശി തരൂരും, പി ജെ കുര്യനുമാണ് ഇതിന് നേതൃത്വം കൊടുക്കുന്നത്. രണ്ടു പേരും സോണിയ ഗാന്ധിയുടെ വിശ്വസ്ഥരാണ് എന്നത് ശ്രദ്ധേയം. സമ്പൂര്‍ണ മാറ്റം ആവശ്യപ്പെട്ടാണ് കോണ്‍ഗ്രസ് അധ്യക്ഷ സോണിയ ഗാന്ധിക്ക് പ്രമുഖ നേതാക്കളുടെ കത്ത് നല്‍കിയിരിക്കുന്നത്. അഞ്ചു മുന്‍ മുഖ്യമന്ത്രിമാരും മുന്‍ കേന്ദ്രമന്ത്രിമാരും ഉള്‍പ്പെടെ 23 പേരാണ് കത്തില്‍ ഒപ്പിട്ടിരിക്കുന്നത്. കോണ്‍ഗ്രസിനുള്ളില്‍ മുകള്‍ത്തട്ടു മുതല്‍ താഴേത്തട്ടു വരെ സമ്പൂര്‍ണ പൊളിച്ചെഴുത്ത് വേണമെന്നാണ് ആവശ്യം. നാളെ പ്രവര്‍ത്തക സമിതി ചേരാനിരിക്കെയാണ് നേതാക്കള്‍ സോണിയയ്ക്ക് കത്ത് നല്‍കിയിരിക്കുന്നത്. ഗുലാം നബി ആസാദ്, കബില്‍ സിബല്‍, മനീഷ് തിവാരി, പി.ജെ. കുര്യന്‍, ശശി തരൂര്‍ എന്നിവരും കത്തില്‍ ഒപ്പിട്ടവരില്‍ ഉള്‍പ്പെടുന്നു. കത്തില്‍ ആറ് ആവശ്യങ്ങളാണ് ഉന്നയിച്ചിരിക്കുന്നത്. തിരിച്ചുവരവിന് വഴിയൊരുക്കാന്‍ കൃത്യമായ നേതൃത്വം വേണമെന്നു കത്തില്‍ വിശദീകരിക്കുന്നു. എഐസിസിയിലും പിസിസികളിലും മുഴുവന്‍ സമയ അധ്യക്ഷന്‍ വേണം. പാര്‍ട്ടി വിട്ടവരെ തിരിച്ചെത്തിക്കണം. പാര്‍ലമെന്ററി ബോര്‍ഡ് രൂപീകരിക്കണം. സംഘടനാതിരഞ്ഞെടുപ്പ് സുതാര്യമാകണമെന്നും കത്തില്‍ ആവശ്യപ്പെടുന്നു. പാര്‍ട്ടിക്കുള്ള പിന്തുണ ഇല്ലാതാകുന്നതും യുവാക്കളുടെ ആത്മവിശ്വസം നഷ്ടപ്പെടുന്നതും ഗൗരവമായി കാണണമെന്ന് കത്തില്‍ ചൂണ്ടിക്കാട്ടുന്നു. പൂര്‍ണ സമയ സജീവ നേതൃത്വം ആവശ്യപ്പെടുന്ന നേതാക്കള്‍ ബ്ലോക്ക് തലം മുതല്‍ എഐസിസി തലം വരെ ഭരണഘടാപരമായ തിരഞ്ഞെടുപ്പ് അത്യാവശ്യമാണെന്ന് പറയുന്നു. പാര്‍ട്ടിയിലുടനീളം വിപുലമായ പരിഷ്‌കാരങ്ങള്‍, അധികാരം വികേന്ദ്രീകരണം, സംസ്ഥാന ഘടകങ്ങളുടെ ശാക്തീകരണം എന്നിവയും കത്തിലെ ആവശ്യങ്ങളില്‍ ഉള്‍പ്പെടുന്നു.