തദ്ദേശ തെരഞ്ഞെടുപ്പ് പ്രചാരണത്തിന്‌ കർശന നിയന്ത്രണം

തദ്ദേശ തെരഞ്ഞെടുപ്പിന്റെ പ്രചാരണത്തിന്‌ കർശന നിയന്ത്രണം ഏർപ്പെടുത്തിയേക്കും. രണ്ടാഴ്‌ചയ്‌ക്കുള്ളിൽ ആരോഗ്യ വിദഗ്‌ധസമിതിയുടെ മാർഗനിർദേശം തെരഞ്ഞെടുപ്പ്‌ കമീഷന്‌ സമർപ്പിക്കും. ഇത്‌ പരിശോധിച്ചശേഷം രാഷ്‌ടീയ പാർടികളുമായി സെപ്‌തംബർ ആദ്യവാരം കൂടിയാലോചന നടത്താനാണ്‌ കമീഷൻ ആലോചിക്കുന്നത്‌. ഈ യോഗത്തിലെ അഭിപ്രായങ്ങൾകൂടി പരിഗണിച്ചാകും തെരഞ്ഞെടുപ്പിനുള്ള കോവിഡ്‌ പ്രോട്ടോകോൾ പുറപ്പെടുവിക്കുക‌. പ്രചാരണത്തിലെ നിയന്ത്രണങ്ങളും സ്ഥാനാർഥികളും പാർടികളും പാലിക്കേണ്ട നിർദേശങ്ങളും പ്രത്യേകമായിതന്നെ പുറപ്പെടുവിക്കും. പെരുമാറ്റച്ചട്ടത്തിന്റെ ഭാഗമായി ഇത്‌ ഉൾപ്പെടുത്തും. ഇക്കാര്യങ്ങൾ കൃത്യമായി പാലിക്കുന്നുവെന്ന്‌ ഉറപ്പാക്കാൻ പൊലീസിന്റെയും ആരോഗ്യവകുപ്പിന്റെയും സേവനം ആവശ്യപ്പെടും. തെരഞ്ഞെടുപ്പ്‌ കൃത്യസമയത്തുതന്നെ നടത്താനാണ്‌ ലക്ഷ്യമിടുന്നതെന്നും ആരോഗ്യ മാനദണ്ഡങ്ങൾ സംബന്ധിച്ച അന്തിമരൂപം വിദഗ്‌ധസമിതിയുടെ റിപ്പോർട്ടിനുശേഷം തയ്യാറാക്കുമെന്നും സംസ്ഥാന തെരഞ്ഞെടുപ്പ്‌ കമീഷണർ വി ഭാസ്കരൻ പറഞ്ഞു.